Determinado dagiti agtutubo a kakabsattayo iti intero lubong nga agtultuloy a nasayaat ti naespirituan a rutinada. Nangbirokda kadagiti pamay-an a mangasaba ken mangparegta kadagiti kapammatianda bayat ti coronavirus pandemic.

Idiay New Zealand, adu a lumugar ti agikabkabil kadagiti ay-ayam, teddy bear, ken piktiur kadagiti tawa ti balayda tapno makita dagiti aglabas nga ubbing. Ket nakita dayta dagiti agtutubo iti nagduduma a kongregasion kas oportunidad a mangasaba. Nangaramidda kadagiti plakard a mangipakpakita kada Caleb ken Sophia nga ibagbagada, “Buyaendakami iti jw.org.”

Ni Emilia, siam ti tawenna nga ubing idiay Switzerland a nakapuy ti salun-atna, sinuratanna dagiti residente ti maysa a nursing home. Inragpin ni Emilia iti suratna ti naidrowing a daong ken ni Noe. Inlawlawagna a saan met idi a mabalin a rummuar da Noe ken ti pamiliana, ngem gapu iti dayta, saanda a naan-ano. Pinaregtana dagiti agnanaed iti nursing home nga “agyanda laeng iti uneg ti balay, kas ken Noe.” Inton malpas ti pandemic, kayat ida a personal a bisitaen ni Emilia.

Nagsayaat ti resulta ti panagsurat ni Emilia, ken sinuratanna manen dagiti nagsubalit kenkuana. Naammuan ti maysa a lokal a reporter ti inaramid ni Emilia ket insuratna dayta iti maysa nga artikulo iti diario.

Da Peyton ken Ella Kempf, babbalasitang nga agkabsat a taga-Ontario, Canada, agtultuloy a komkomustaenda dagiti kakabsatda bayat ti pandemic. Kuna ti amada a ni Jared: “Bayat ti panagdaydayaw ti pamiliami, tultulongandak dagiti annakmi a mangilista kadagiti mayat nga agkonek.” Innayon met ti inada a ni Jessica: “Kayatmi nga isuro kadagiti annakmi a napateg nga iparikna kadagiti kakabsat, kapamilia, ken gagayyemmi a sipapanunotkami kadakuada.”

Kasta met, idiay Colorado, U.S.A., ti siam ti tawenna a ni Stella ken ni nanangna, komkomustaenda dagiti nataengan a kakongregasionda. Nagaramidda iti listaan ken tinawaganda ida amin.

Ti agkabsat a da Jonathan ken Sean McKampson, nga agtawen iti 12 ken 15, ket agserserbi iti Chinese ti lengguahena a kongregasion a kaduada ti nagannakda. Intultuloyda ti ministerioda babaen ti panagaramidda iti surat iti Chinese kada bigat sakbay a sumrekda iti eskuelaan. Gapu ta agsursuroda pay laeng iti Chinese, medio nabayagda nga agaramid iti surat. Ngem determinadoda a mangiranud iti mensahe ti Biblia kadagiti agsasao iti Chinese.

Innem nga annak nga agtawen iti 2 agingga iti 15 ti kanayon a bumisbisita iti maysa a nursing home iti makinlaud a Michigan a kadua ti nanangda ken ti maysa a sister a payunir. Ngem gapu iti coronavirus pandemic, imparit dagiti autoridad ti bumisita iti nursing home. Ita, agipatpatulod dagiti nagannak kadagiti aggigian iti nursing home iti rekording dagiti ubbing nga agkankansion kadagiti kanta ti Pagarian wenno agbasbasa kadagiti teksto iti Biblia. Imbaga ti maysa nga agtrabtrabaho iti nursing home a maysa kadagiti video ti nangpakalma iti nataengan a nadepres gapu kadagiti nabuyana a report dagiti matmatay gapu iti coronavirus.

Agtalektayo nga ipatpateg ni Jehova dagiti ar-aramiden dagitoy nga agtutubo bayat nga ipakpakitada ti ayatda iti padada a tao ken idaydayawda ni Jehova iti panangipamuspusanda a mangasaba.—Salmo 148:12, 13.