Ti Maikadua nga Ar-ari 5:1-27
5 Ita, ni Naaman a pangulo ti armada ti ari ti Siria ket nalatak ken ipatpateg ti apona, ta babaen kenkuana pinagballigi* ni Jehova ti Siria. Isu ket nabileg a mannakigubat, nupay agkukutel.*
2 Iti naminsan nga irarautda, tiniliw dagiti Siriano ti maysa a balasitang nga Israelita ket nagbalin nga adipen ti asawa ni Naaman.
3 Kinuna ti balasitang iti amona a babai: “No laeng koma mapan ti amok a lalaki iti propeta+ idiay Samaria! Paimbagenna la ketdi ti kukutelna.”+
4 Iti kasta, napan* iti apona ket impadamagna ti imbaga ti balasitang nga Israelita.
5 Kinuna ti ari ti Siria: “Mapanka! Mangipatulodak iti surat iti ari ti Israel.” Gapuna, napan ket nangitugot iti 10 a talento* a pirak, 6,000 a pedaso a balitok, ken 10 a bado.
6 Intedna iti ari ti Israel ti surat, a kastoy ti linaonna: “Karaman iti daytoy a surat, imbaonko ti adipenko a ni Naaman tapno paimbagem ti kukutelna.”
7 Apaman a nabasa ti ari ti Israel ti surat, pinisangna dagiti badona ket kinunana: “Siak aya ti Dios, a makabael a mangpapatay ken mangtaginayon iti biag?+ Ta imbaonna kaniak daytoy a lalaki tapno paimbagek ti kukutelna! Nalawag a kayatna ti makiriri kaniak.”
8 Idi nadamag ni Eliseo, ti adipen ti pudno a Dios, a pinisang ti ari ti Israel dagiti badona, dagus nga impaibagana iti ari: “Apay a pinisangmo dagiti badom? Pangngaasim ta ibaonmo kaniak tapno maammuanna nga adda propeta iti Israel.”+
9 Gapuna, napan ni Naaman agraman dagiti kabalio ken karuahena a pakigubat ket nagtakder iti ruangan ti balay ni Eliseo.
10 Ngem nangibaon ni Eliseo iti mensahero a mangibaga kenkuana: “Inka agdigus iti mamimpito+ idiay Jordan,+ ket umimbagto ti kudilmo, ken madalusanka.”
11 Gapu iti daytoy, agpupungtot a pimmanaw ni Naaman sa kinunana: “Imbagak iti bagik, ‘Rummuarto ken agtakder ditoy ket umawag iti nagan ni Jehova a Diosna. Iwagiswagisna ti imana iti kukutelko tapno umimbagak.’
12 Saan aya a nasaysayaat ti Abana ken Farpar, dagiti karayan ti Damasco,+ ngem ti amin a danum iti Israel? Saanko aya a mabalin ti agdigus kadagita tapno madalusanak?” Iti kasta, timmallikud sa agpupungtot a pimmanaw.
13 Inasitgan dagiti adipenna ket kinunada: “Apo,* no adda narigat nga ipaaramid kenka ti propeta, saanmo kadi nga aramiden? Saan kadi a nalaka laeng ti imbagana nga, ‘Agdiguska ket madalusanka’?”
14 Napan ngarud idiay Jordan ket bimmatok iti mamimpito, maitunos iti kinuna ti adipen ti pudno a Dios.+ Iti kasta, immimbag ket nagbalin ti kudilna a kas iti kudil ti ubing,+ ken nadalusan.+
15 Kalpasanna, nagsubli iti adipen ti pudno a Dios,+ agraman ti amin a kakaduana,* ket nagtakder iti sanguananna sa kinunana: “Ita, ammokon nga awan ti Dios iti sadinoman a paset ti daga no di laeng iti Israel.+ Pangngaasim ta awatem ti sagut* daytoy adipenmo.”
16 Ngem kinuna ni Eliseo: “Isapatak iti nagan ni Jehova, ti sibibiag a Dios a pagserserbiak,* diak awaten dayta.”+ Impapilit ni Naaman nga awaten dayta ni Eliseo, ngem saanna latta nga inawat.
17 Kamaudiananna, kinuna ni Naaman: “No saanmo a kayat, pangngaasim ta ikkam daytoy adipenmo iti daga iti daytoy a lugar nga awiten ti dua a mulo, ta saanton a mangted daytoy adipenmo iti daton a mapuoran wenno sagut iti asinoman a dios, no di laeng ken Jehova.
18 Ngem pakawanen koma ni Jehova daytoy adipenmo no mapasamak daytoy: No ngamin mapan ti apok iti balay* ni Rimmon tapno agruknoy, kumpet iti takiagko, isu a kapilitan nga agruknoyak iti balay ni Rimmon. Pakawanen koma ni Jehova daytoy adipenmo no agruknoyak iti balay ni Rimmon.”
19 Gapuna, kinuna ni Eliseo: “Mapankan, dika agdanag.” Idi medio nakaadayon ni Naaman,
20 pinampanunot ni Gehazi+ a katulongan ni Eliseo, nga adipen ti pudno a Dios:+ ‘Pinalubosan ti apok ni Naaman a Siriano+ a di man la nangawat iti it-itedna. Isapatak iti nagan ti sibibiag a Dios a ni Jehova, kamatek ket dumawatak.’
21 Kinamat ngarud ni Gehazi ni Naaman. Idi nakita ni Naaman nga adda kumamkamat, dimsaag iti karuahena tapno sumabat ket kinunana: “Adda kadi napasamak?”
22 Insungbatna: “Awan. Imbaonnak ti apok ket kinunana, ‘Adda kasangsangpet a dua nga agtutubo a lallaki manipud iti kabambantayan ti Efraim. Annak ida dagiti propeta. Pangngaasim ta ikkam ida iti maysa a talento a pirak ken dua a bado.’”+
23 Kinuna ni Naaman: “Sige, mangalaka iti dua a talento.” Impapilitna a mangala,+ ket inkabilna ti dua a talento a pirak ken ti dua a bado iti dua a supot. Intedna dagita iti dua kadagiti katulonganna, a mangawit para ken Gehazi.
24 Idi nakadanon idiay Ofel,* innalana dagita kadagiti katulongan ket inkabilna iti balay sa pinapanawna ida. Idi nakapanawdan,
25 simrek sa nagtakder iti abay ti apona. Kinuna ni Eliseo: “Naggapuam, Gehazi?” Ngem insungbatna: “Awan ti napanan daytoy adipenmo.”+
26 Kinuna ni Eliseo: “Ipagarupmo kadi a diak ammo a kinamatmo ti lalaki ket bimmaba iti karuahena tapno sabtennaka? Panagkunam, maitutop kadi nga umawatka ita iti pirak wenno bado wenno kaolibuan wenno kaubasan wenno karnero wenno baka wenno adipen a lallaki wenno babbai?+
27 Ita, ti kukutel ni Naaman+ ket kumpet kenka ken iti kaputotam iti agnanayon.” Dagus a rimmuar ni Gehazi nga agkukutelen a kas kapuraw ti niebe.+
Footnotes
^ Wenno “insalakan.”
^ Wenno “naaddaan ti kudilna iti sakit.”
^ Mabalin a ni Naaman.
^ Lit., “Ama.”
^ Lit., “bendision.”
^ Lit., “kampona.”
^ Lit., “nga agtaktakderak iti sanguananna.”
^ Wenno “templo.”
^ Maysa a lugar idiay Samaria a mabalin a turod wenno torre.