Agserserbi iti nasulinek a teritoria ti Brazil ti maysa nga agassawa nga special pioneer. Naammuanda ti maipapan ken Valdira, maysa a babai a nakipagadal iti Biblia 13 a tawenen ti napalabas. Kalpasan ti panagbiahe ti agassawa iti natapok a kalsada ken kadagiti karayan a delikado a ballasiwen, nadanonda ni Valdira, a magagaran a mangituloy iti panagadalna. Gapu ta narigat a madanon ti lugarda, masapul  a mangaramid ti agassawa iti pamay-an tapno mayadalan latta ni Valdira. Adda selponna ngem masapul pay a mapan iti lugar nga adayo iti kabalbalayan tapno maaddaan iti napigpigsa a signal. Kasta met, makapagadal laeng iti Biblia kalpasan ti alas nuebe ti rabii. Panunotem ti maysa a balasang nga agmaymaysa iti rabii iti lugar nga adayo iti kabalbalayan, a makipagad-adal iti Biblia babaen ti selpon a kandela ti silawna.

Dumdumngeg met ni Valdira iti gimong iti kada Domingo babaen ti selponna. Mapan iti lugar nga adayo iti kabalbalayan nga adda awitna a Biblia, Pagwanawanan, ken pagkantaan ket no agtudtudo, mangitugot pay iti payong.

Idi Marso, nagbiahe ni Valdira iti agarup 95 a kilometro a napan iti Kingdom Hall tapno agatender iti espesial a miting a nakairuaran ti rebisado nga edision ti New World Translation iti Portuguese. Naayatan idi nakaawat iti kopia ti baro a Biblia. Idi nakomendaran gapu iti kinapingetna nga agadal iti Biblia, kinuna ni Valdira, “Saan met unay a narigat!”

Dagiti Yukpa ket kabilang kadagiti Amerindian (Native American) nga aggigian idiay Colombia. Sakbay a napan ti special pioneer a ni Frank iti maysa kadagiti purokda, napakdaaran maipapan ken John Jairo, a panguluen ti purok a nangpapanaw iti sumagmamano a grupo ti relihion a mayat a mangasaba sadiay. Naminsan, idi naammuan ni John nga agkolkolekta iti apagkapullo ti maysa a ministro, namin-adu a pinaputokna ti paltogna iti tangatang ket pirmi ti taray ti ministro.

Kinuna ni Frank: “Idi nakadanonkamin iti purokda, maysa kadagiti annak a babbai ni John Jairo ti umuna a  nakasaritami! Idi impakitami ti libro nga Ania a Talaga ti Isursuro ti Biblia?, kinunana a dagus, ‘Daytoy a relihion ti kayatko a pakimiembroan!’ Sa nagtartaray a napan ken tatangna tapno ibagana nga addakami. Pinaayabannakami a dagus ni John. Agnernerbioskami a simmango kenkuana. Sakbay pay nga agsaokami, kinunana: ‘Ammok a ti relihionyo ti pudno a relihion. Walo a tawenen ti napalabas, iti maysa a pagbasuraan idiay Becerril, adda nakitak a libro a kas iti intedyo iti anakko. Binasbasak dayta, ket manipud idin, ur-urayekon nga umaykayo ditoy. Ammok nga addanto aldaw nga umaykayo. Kayatko a suruandak, ti pamiliak, ken daytoy a purok iti maipapan iti Biblia. Silulukat dagiti ruanganmi para kadakayo.’

 “Nakasangitkami iti imbagana. Immay nagdengngeg dagiti lumugar iti panangasabami, nga impatarus ni John Jairo iti lengguaheda. Idi pumanawkamin, nangipabulod iti bassit nga asno a nangkarga kadagiti bagahemi. Mangikonkonduktakami itan iti 47 a panagadal iti Biblia iti 120 a Yukpa manipud iti nagduduma a purok, a pakairamanan ni John Jairo ken ti anakna a babai.”

Ni José a taga-Ecuador ket dati a napeklan a Katoliko. Insuratna: “Kagurgurak la unay dagiti Saksi ni Jehova. Sangapulo a tawen nga indaddadanesko ida. Mangor-organisarak idi kadagiti grupo a mangraut kadagiti Saksi, kabkabilek ida, ken ak-akusarak ida nga agtatakaw. Sa idiay presinto,  ipapilitko a siak ti mangikandado iti seldada. Adda idi dinadaelmi a lugan ti maysa a Saksi. Adda pay motorsiklo ti maysa a Saksi nga intapuakmi iti derraas.

“Idi 2010, nagsakitak iti swine flu. Imbaga ti doktorko a masapul a pumanawak iti kabambantayan ti Andes ket agyanak iti asideg ti igid ti baybay a nabarbara ti klimana tapno agpaimbag. Nagyanak iti bassit a farm ti kabagiak. Idi agangay, siakon ti nangaywan iti dayta. Gapu ta agmaymaysaak, desperadoak a makisarita iti uray siasino. Ket asino ti immay? Dagiti Saksi ni Jehova! Malidlidayak isu a nakisaritaak kadakuada ket nasdaawak iti panangilawlawagda iti Biblia. Immanamongak a mayadalan iti Biblia gapu laeng ta agusiosoak. Kalpasan ti innem a bulan, nakigimongakon. Nagbilibak iti kinaimbagda ken iti naayat a panangtratoda kaniak isu a naisaludsodko iti bagik, ‘Isuda ngatan dagiti pudno nga adipen ti Dios?’ Nagtultuloyak a rimmang-ay iti naespirituan ket nabautisaranak idi Abril 2014.

“Agbabbabawiak ta indadanesko idi dagiti Saksi. Ngem inikkannak ni Apo Jehova iti gundaway a mangilinteg iti dadduma a naaramidak. Iti asamblea sirkito idi Oktubre 4, 2014, nainterbiuak maipapan iti panangbusbusorko idi kadagiti Saksi. Insaludsod kaniak ti ispiker, ‘No maikkanka iti gundaway nga agpadispensar iti maysa kadagiti indadanesmo, asino ti kayatmo a pagpadispensaran?’ Dagus nga imbagak a kayatko ti agpadispensar iti maysa a kabsat nga agnagan Edmundo ngem saanko nga ammo no kasanok a mabirokan. Diak impagarup nga adda gayam ni Edmundo iti likud ti stage ta inyurnos dayta ti manangaywan iti sirkito. Nakasangit dagiti immatender idi naginnarakup ken nagsangsangitkami a dua iti stage.”

Nakapudpudot ken katengngaan ti aldaw idi nalpas ti maysa a grupo dagiti kakabsat a babbai idiay Asunción,  Paraguay, ti teritoria a naited kadakuada. Nupay kasta, intultuloyda latta ti nangasaba iti sumagmamano a balay iti asideg. Imbaga ti maysa kadakuada, “Baka adda agkarkararag dita.” Iti maysa a balay, adda babai nga immisem kadagiti kakabsat ket dinamagna no Saksida. Imbagana a naggapu isuna idiay Bolivia ken makabulanen manipud idi immakar iti Paraguay gapu iti trabahona. Makipagad-adal idin iti Biblia idiay Bolivia. Awan ti am-ammo dagiti kaarrubana a Saksi, isu nga inkararagna, “Apo Jehova, pangngaasim, mabirokandak koma dagiti Saksim.” Iti dayta met laeng nga aldaw, bimmisita dagiti kakabsat a babbai ket nayurnos ti panagadal iti Biblia.