Estoriaem man ti panagubingmo.

Nayanakak idi 1959 idiay Fuzhou City, Jiangxi Province, China. Idi walo ti tawenko, adda pay laeng ti epekto ti maaw-awagan itan a Cultural Revolution. Civil engineer ni Tatang ket naibaon a mangaramid iti riles ti tren iti adayo a lugar. Nabayag a maminsan laeng iti makatawen a mabisitanakami. Addaak idi iti poder ni Nanang a maysa a maestra iti elementaria. Nagyankami iti mismo nga eskuelaan a nagisuruanna. Idi 1970, masapul nga umakarkami idiay Liufang, a maysa idi a napanglaw ken nasulinek a purok ti Linchuan District, ket agkurkurang idi ti makan sadiay.

Ania ti patpatien idi ti pamiliayo?

Awan ti interes ni Tatang iti relihion wenno politika. Budista met ni Nanang. Naisuro idiay eskuelaan a napaadda ti biag babaen iti ebolusion ket namatiak iti dayta.

Apay a nagintereska iti mathematics?

Ramanen ngamin dayta ti panangammo no ania ti agpayso babaen iti lohikal a panagrasrason. Nagkolehioak kalpasan la unay a natay ti lider ti rebolusion a ni Mao Tse-tung idi 1976. Pinilik ti mathematics a major subject-ko. Kalpasan a nag-masteral-ak, nagtrabahoak kas research mathematician para iti panagdisenio kadagiti aparato a mangpataud iti enerhia.

Ania ti damo nga impresionmo iti Biblia?

Idi 1987, napanak iti Amerika tapno ag-doctorate idiay Texas A&M University. Ammok idin nga adu ti mamati iti Dios ken agbasbasa iti Biblia iti Amerika. Nangnangngegko pay nga adu a makatulong a prinsipio ti linaon ti Biblia isu a nariknak a masapul a basaek dayta.

 Nakitak a dakkel ti maitulong ti Biblia iti biagtayo. Ngem adda dagiti narigatko a maawatan isu nga insardengko a basaen.

Kasano a nagintereska manen iti Biblia?

Idi 1990, maysa a babai a Saksi ni Jehova ti nangasaba idiay balaymi ket impakitana ti ibagbaga ti Biblia maipapan iti nasaysayaat a masanguanantayo. Nakisarita iti agassawa a Saksi tapno isuda ti umay tumulong kaniak a mangtarus iti Biblia. Idi agangay, nakipagadal met iti Biblia ni Liping a baketko. Dati nga agisursuro isuna iti physics iti hayskul idiay China ken ateista met. Naammuanmi ti ibagbaga ti Biblia maipapan iti nangrugian ti biag. Baro kaniak ti ideya nga adda Namarsua isu a nagsukimatak a bukbukodko.

Kasanom nga inaramid dayta?

Kas mathematician, nasanayak a mangkalkular iti posibilidad a mapasamak ti maysa a banag. Naadalko idi a tapno bigla lattan a tumaud ti biag, masapul a datin nga adda dagiti protina. Isu a pinadasko a kalkularen ti posibilidad a mabukel ti maysa a protina a bukbukodna. Maysa ti protina kadagiti pagaammo a kakomplikaduan a molekula. Mabalin a maaddaan dagiti sibibiag a selula iti rinibu a nagduduma a klase ti protina nga eksakto ken naannayas ti panagtitinnulongda. Kas iti dadduma, nabigbigko a nakaim-imposible a basta lattan mabukel ti maysa a protina! Diak nakontento iti aniaman a panangilawlawag a nabasak iti teoria ti ebolusion no kasano a mabukel dagitoy komplikado unay a protina a bukbukodda. Kasano laengen dagiti sibibiag a parsua a nabukel iti tulong dagitoy a protina? Para kaniak, pammaneknek dagitoy nga adda Namarsua.

Apay a nakombinsirka a naggapu ti Biblia iti Dios?

Iti pannakipagadalko kadagiti Saksi ni Jehova, naammuak a naglaon ti Biblia iti adu a detalyado a padto a natungpalen. Nariknak metten dagiti pagsayaatan ti panangsurot kadagiti prinsipio ti Biblia. Kasano a nakaisurat dagiti mannurat ti Biblia a nagbiag rinibun a tawen ti napalabas kadagiti prinsipio nga epektibo pay laeng ita? In-inut a nabigbigko a ti Biblia ket Sao ti Dios.

Ania ti agtultuloy a mangkomkombinsir kenka nga adda Namarsua?

Bumilbileg ti pammatik nga adda Namarsua no pampanunotek ti adu a banag iti aglawlaw. Agdisdisenioak ita kadagiti software ti kompiuter ket masansan nga agsidsiddaawak no kasano a maatiw ti utektayo dagiti computer program. Kas pagarigan, makakulkol iti isip ti abilidad ti utek a makailasin iti sasao. Nalaka la a maawatan ti adu kadatayo ti kayat a sawen dagiti mangngegtayo a sasao uray no saan a kompleto ti sentensia, adda katawana, uyek, beddal, ayug wenno aweng, natagari, wenno agbaliw ti boses iti telepono. Mabalin a kasla gagangay laeng daytoy. Ngem makapabilib daytoy kadagiti software designer. Uray dagiti kasayaatan a software a makailasin iti sasao, kikit laeng no ikompara iti utek ti tao.

Saan a kas kadagiti kakomplikaduan a kompiuter, mailasin ti utektayo dagiti emosion, ayug, ken mabigbigna ti agsasao babaen iti timbre ti bosesna. Ad-adalen dagiti software designer no kasano a matulad ti kompiuter ti abilidad ti utek ti tao a makailasin iti sasao. Kombinsidoak nga iti dayta nga ar-aramidenda, ti obra maestra ti Dios ti talaga nga ad-adalenda.