TOPIKO ITI AKKUB | MAYUGALIM DAGITI NASAYAAT NGA ARAMID—KASANO?
2 Kontrolem ti Aglawlawmo
-
Determinadoka a mangan iti nasustansia, ngem makaay-ayo a kanen ti ice cream iti sanguanam.
-
Desididoka a mangisardeng iti panagsigarilio, ngem ik-ikkannaka manen ti gayyemmo iti sigarilio uray ammona daytan.
-
Planom ita ti agehersisio, ngem kasla nagrigat para kenka uray alaem laeng ti pagsapatosmo!
Makitam kadi ti nagpapadaan dagita? Masansan nga ipakita dagiti kapadasan a ti aglawlawtayo—dagiti situasion a resulta dagiti desisiontayo ken dagiti pakikadkaduaantayo—ket dakkel ti epektona tapno mairuamtayo dagiti nasayaat a bambanag a kayattayo nga iyugali, ken maisardengtayo dagiti madi a nakasanayantayo.
PRINSIPIO TI BIBLIA: “Nasaldet [wenno, masirib] daydiay nakakita iti didigra ket rugianna ti aglemmeng, ngem daydiay awanan kapadasan limmasat ket masapul a sagabaenna ti pannusa.”—Proverbio 22:3.
Ibalbalakad ti Biblia nga agplanotayo. Iti kasta, malisiantayo dagiti situasion a mabalin a mangparigat kadatayo a mangaramid iti kayattayo. Mapilitayo pay dagiti situasion a mangpalaka iti panangaramidtayo iti kayattayo. (2 Timoteo 2:22) Wen, masiribtayo no kontrolentayo ti aglawlawtayo.
Agaramidka iti pamay-an tapno narigrigatmo nga aramiden ti madi ken nalaklakam nga aramiden ti husto
TI MABALINMO NGA ARAMIDEN
-
Agaramidka iti pamay-an tapno narigrigatmo nga aramiden ti madi. Kas pagarigan, no kayatmo nga isardeng ti mangan iti junk food, dika mangikabkabil iti ammom a saan a nasustansia a makan iti kosina. Iti kasta, inton makapangpanganka iti junk food, narigrigatmo nga aramiden dayta.
-
Agaramidka iti pamay-an tapno nalaklakam nga aramiden ti husto. Kas pagarigan, no planom ti agehersisio iti agsapa, isaganamon iti rabii dagiti isuotmo, sa ikabilmo iti abay ti katrem. No malakaanka a mangirugi, dakdakkel ti posibilidadna a maitultuloymo dayta.
-
Piliem a naimbag dagiti gagayyemmo. Dakkel ti posibilidadna nga agbalintayo a kas kadagiti tattao a kadkaduatayo. (1 Corinto 15:33) Isu a limitaram ti makikadkadua kadagiti mangimpluensia kenka a mangaramid kadagiti nakasanayam a kayatmon nga isardeng, ken makikaduaka kadagiti makatulong kenka a mangyugali kadagiti nasayaat a banag.