NUPAY mabalin nga adda dagiti pagsayaatan ti panagbalin a baknang, mabalin nga adda met pagdaksanna nangruna ta agbibiagtayon iti napeggad a tiempo. (2 Timoteo 3:1-5) Iti dadduma a pagilian, ti puntiria dagiti agtatakaw ken kidnaper ket dagiti babaknang, agraman dagiti turista nga aglanglanga a baknang.

Kuna ti damag maipapan iti maysa a napanglaw a pagilian: “Gapu kadagiti naranggas a panagtakaw, panagsaur ken panagkidnap, agbinnusor dagiti nabaknang ken napanglaw. Adda dagiti armado a guardia kadagiti restawran; dagiti balay ti babaknang ket nalikmut kadagiti pader a naparabawan iti siitsiitan a barut, addaan kadagiti napigsa a silaw, kamera, ken guardia.” Kasta met laeng ti kasasaad iti adu pay a pagilian.

Ngem kuna ti Biblia nga “awan ti mangisikat [wenno mangpangta] iti napanglaw.” Kasano a mabenepisiaranka iti dayta a nagpateg a sirib? No agnanaed wenno mapanka iti lugar a nasaknap ti krimen ken kinaranggas, simple la koma ti itsuram tapno di makaawis iti atension. Panunotem a naimbag no ania ti isuot ken itugotmo iti publiko a lugar, nangruna no nakadkadlaw dagita. Sigun iti Proverbio 22:3, masirib wenno ‘nasaldet daydiay nakakita iti didigra ket aglemmeng, ngem daydiay awanan kapadasan limmasat ket agsagaba.’

Ipakita ti sirib a linaon ti Biblia a maseknan ti Namarsua kadatayo. Kayatna a natalgedtayo. Dayta a ‘sirib ket salaknib,’ kuna ti Eclesiastes 7:12, ta “taginayonenna a sibibiag dagiti agik-ikut iti dayta.”