1. Ania ti gagangay a pagbutbutngan ti dadduma a kapammatiantayo?

 USIGENTAYO ti kapadasan ti dadduma a kapammatiantayo. Kayat ti agassawa a da Nestor ken María ti agserbi iti lugar a dakdakkel ti panagkasapulanna. * Tapno maaramidda dayta, masapul a pasimplienda ti biagda. Ngem mabutengda di la ket ta saandanton a naragsak no bassiten ti kuartada. Idi nagbalin ni Biniam a Saksi ni Jehova iti pagilian a mangbusbusor iti trabahotayo, ammona a maidadanes ta maysa isunan nga adipen ti Dios. Dayta ti pagbutbutnganna. Ngem ti ad-adda a pagbutnganna ket no maammuan ti pamiliana a sabalin ti relihionna. Grabe met ti kanser ni Valérie ken marigrigatan nga agsapul iti mangopera kenkuana a mangraem iti naibatay-Biblia a pammatina maipapan iti dara. Natural laeng a mabuteng ta baka dayta ti ipatayna.

2. Apay a masapul a kontrolentayo ti butengtayo?

² Adu kadatayo ti makarikna kadagiti kasta a buteng. Marikriknam met kadi dagita? No ditay sursuruen a kontrolen ti butengtayo, posible a makaaramidtayo kadagiti di umiso a desision a mabalin a mangdadael iti relasiontayo ken Jehova. Dayta ti kayat ni Satanas. Padpadasenna met nga usaren dagiti pagbutbutngantayo tapno saantayo a suroten dagiti linteg ni Jehova, agraman ti bilin nga ikasabatayo ti naimbag a damag. (Apoc. 12:17) Nagdakes, naulpit, ken adda pannakabalin ni Satanas. Ngem maprotektaram ti bagim manipud kenkuana. Kasano?

3. Ania ti makatulong tapno maparmektayo ti butengtayo?

³ Maabaktayo dagiti us-usaren ni Satanas no kombinsidotayo nga ay-ayatennatayo ni Jehova ken adda iti abaytayo. (Sal.  118:6) Kas pagarigan, naipasango ti nangisurat iti Salmo 118 kadagiti nakarigrigat a situasion. Adu ti kalabanna agraman ti dadduma a prominente a tattao (bersikulo 9, 10). Adda dagiti tiempo a madandanagan unay (bersikulo 13). Dinisiplina met ni Jehova iti nadagsen (bersikulo 18). Kaskasdi nga inkanta dayta a salmista: “Saanakto nga agbuteng.” Apay a kalmado ken natalged ti riknana? Ammona ngamin nga uray dinisiplina ni Jehova, ay-ayaten latta unay isuna ti nailangitan nga Amana. Kombinsido ti salmista nga aniaman ti mapasamak kenkuana, kanayon a sisasagana a tumulong kenkuana ti nadungngo a Diosna.​—Sal. 118:29.

4. No kombinsidotayo nga ay-ayatennatayo ti Dios, ania dagiti maparmektayo a pagbutbutngantayo?

⁴ Masapul a kombinsidotayo nga ay-ayaten ni Jehova ti tunggal maysa kadatayo. Makatulong dayta tapno maparmektayo ti tallo a gagangay a pagbutbutngantayo, (1) panagbuteng a ditay maipaay dagiti kasapulan ti pamiliatayo, (2) panagbuteng iti tao, ken (3) panagbuteng ken patay. Dagiti kakabsat a nadakamat iti parapo 1 naparmekda ti butengda gapu ta kombinsidoda nga ay-ayaten ida ti Dios.

5. Ania dagiti mabalin a pagdandanagan unay dagiti ulo ti pamilia? (Kitaen ti ladawan iti akkub.)

⁵ Ikagumaan nga itungpal ti tunggal Kristiano nga ulo ti pamilia ti responsabilidadna a mangipaay kadagiti material a kasapulan ti pamiliana. (1 Tim. 5:8) No maysaka nga ulo ti pamilia, mabalin a madanaganka amangan no masesanteka iti trabahom bayat ti pandemic. Nalabit madanaganka di la ket ta awan ti maipakanmo iti pamiliam ken awan pagbayadmo iti abang wenno pagtinnagmo iti balayyo. Mabalin a mabutengka a no masesanteka, awanen ti mabirokam a trabaho. Wenno kas kada Nestor ken María a nadakamat itay, baka agpangaduaka a mangpasimple iti biagmo. Adun ti nabiktima ni Satanas gapu kadagita a pagbutbutngan.

6. Ania ti kayat ni Satanas a patientayo?

⁶ Kayat ni Satanas a patientayo a saan nga ay-ayaten ni Jehova ti tunggal maysa kadatayo ken saannatayo a tulongan a mangipaay kadagiti kasapulan ti pamiliatayo. No mapasamak dayta, baka panunotentayon a masapul nga aramidentayo ti amin tapno laeng agtalinaedtayo iti agdama a trabahotayo uray kaipapanan dayta a maikompromisotayo dagiti prinsipio ti Biblia.

7. Ania ti ipaspasigurado kadatayo ni Jesus?

⁷ Ni laeng Jesus ti ad-adda a makaam-ammo iti Ama ngem iti asinoman. Ipaspasiguradona nga ‘ammo ni Amatayo ti kasapulantayo sakbay pay a kiddawentayo.’ (Mat. 6:8) Ammo met ni Jesus a sisasagana ni Jehova a mangipaay kadagiti kasapulantayo. Kas Kristiano, miembrotayo iti pamilia ti Dios. Gapu ta ni Jehova ti Ulo ti pamilia, masiguradotayo nga aramidenna ti imbilinna nga aramiden dagiti ulo ti pamilia kas mabasa iti 1 Timoteo 5:8.

8. (a) Ania ti makatulong kadatayo a mangparmek iti butengtayo a ditay maipaay dagiti kasapulan ti pamiliatayo? (Mateo 6:31-33) (b) Kasano a matuladtayo ti ulidan ti agassawa iti ladawan a mapan mangted iti makan iti maysa a sister?

⁸ No kombinsidotayo nga ay-ayatennatayo ni Jehova ken ti pamiliatayo, ditay pagduaduaan nga ipaayna dagiti kasapulantayo. (Basaen ti Mateo 6:31-33.) Kayat ni Jehova nga aramiden dayta ta isu ket talaga a naayat ken nakaparparabur! Idi pinarsuana ti daga, saanna laeng nga impaay dagiti kangrunaan a kasapulantayo tapno agbiagtayo. Siaayat a pinunnona ti daga kadagiti banag a  mangparagsak kadatayo. (Gen. 2:9) Uray no adda dagiti tiempo nga eksakto laeng dagiti adda kadatayo, ti napateg ket adda dagiti kasapulantayo. Saan a pulos nga agpalia ni Jehova a mangipaay kadagiti kasapulantayo. (Mat. 6:11) Laglagipentayo nga aniaman a material a banag nga isakripisiotayo ita ket awan ti kaimudinganna kadagiti ipaay ti nadungngo a Diostayo, ita ken iti masanguanan. Dayta ti napaneknekan da Nestor ken María.​—Isa. 65:21, 22.

9. Ania ti masursurom iti kapadasan da Nestor ken María?

⁹ Nanam-ay idi ti biag da Nestor ken María idiay Colombia. “Pinampanunotmi idi a pasimplien ti biagmi tapno mapalawami ti ministeriomi,” imbagada, “ngem mabutengkami a baka saankaminton a naragsak no bassiten ti kuartami.” Ania ti nakatulong tapno maparmekda ti butengda? Linagipda ti adun a pamay-an a pinaneknekan ni Jehova nga ay-ayatenna ida. Gapu ta kombinsidoda a kanayon nga aywanan ida ni Jehova, immikkatda iti trabahoda a dakkel ti sueldona. Inlakoda ti balayda ken immakarda iti lugar iti pagilianda nga agkasapulan iti ad-adu a manangaskasaba iti Pagarian. Ania ti makunada iti inaramidda a desision? Imbaga ni Nestor: “Napaneknekanmi nga agpayso ti Mateo 6:33. Pulos a dikami nagkurang iti aniaman ken naragragsakkami ita.”

10. Apay a di pakasdaawan a mabuteng dagiti tattao iti padada a tao?

¹⁰ Sipud pay idi un-unana, dangdangranen dagiti tattao ti padada a tattao. (Ecl. 8:9) Kas pagarigan, adda dagiti mangab-abuso iti autoridadda, agar-aramid dagiti kriminal kadagiti naranggas a krimen, ken dagiti bully iti eskuelaan in-insultuen ken butbutngenda dagiti kaklaseda. Adda pay ketdi dagidiay brutal ti panangtratoda kadagiti kapamiliada. Di pakasdaawan a mabuteng dagiti tattao iti padada a tattao! Kasano a gunggundawayan ni Satanas dayta a panagbutengtayo iti tao?

11-12. Kasano nga us-usaren ni Satanas ti panagbuteng iti tao tapno mabiktimanatayo?

¹¹ Us-usaren ni Satanas ti panagbuteng iti tao tapno pilitennatayo nga agkompromiso ken isardengtayo ti mangasaba. Gapu iti impluensia ni Satanas, adda dagiti gobierno a mangiparparit iti trabahotayo ken mangidaddadanes kadatayo. (Luc. 21:12; Apoc. 2:10) Agiwarwaras ti lubong ni Satanas kadagiti di  umiso nga impormasion ken nakaro a kinaulbod maipapan kadagiti Saksi ni Jehova. Mabalin nga uyawen wenno dangrandatayo pay ketdi dagiti tattao a mamati kadagita a kinaulbod. (Mat. 10:36) Masdaawtayo kadi kadagita a taktika ni Satanas? Saan. Inusarna dagitan idi umuna a siglo.​—Ara. 5:27, 28, 40.

¹² Saan la a ti panagbuteng iti panangidadanes dagiti gobierno ti us-usaren nga armas ni Satanas. Mabuteng met ti dadduma iti reaksion dagiti kapamiliada no agbalinda a Saksi. Lallalo a dayta ti pagbutnganda ngem iti pisikal a pannakadangran. Ay-ayatenda unay dagiti kabagianda ket kayatda a maam-ammo ken ayatenda met koma ni Jehova. Masaksaktanda no mangngegda ti dakes nga ibagbaga dagiti kakabagianda maipapan iti pudno a Dios ken kadagiti agdaydayaw kenkuana. Ngem no dadduma, nagbalin met laeng a Saksi dagiti dati a bumusbusor a kakabagianda. Ngem kasanon ngay no gupdenen dagiti kapamiliatayo ti relasionda kadatayo gapu ta nagbalintayo a Saksi? Ania ti reaksiontayo?

13. No kombinsidotayo nga ay-ayatennatayo ti Dios, kasano a makatulong dayta uray no ilaksiddatayo dagiti kapamiliatayo? (Salmo 27:10)

¹³ Maliwliwatayo iti nagpintas nga ibagbaga ti Salmo 27:10. (Basaen.) No laglagipentayo nga ay-ayatennatayo unay ni Jehova, natalged ti riknatayo a mangsango iti ibubusor. Ken masiguradotayo a gunggonaanna ti panagibturtayo. Adayo a nasaysayaat ti panangipaay ni Jehova kadagiti pisikal, emosional, ken naespirituan a kasapulantayo ngem iti asinoman! Dayta ti napaneknekan ni Biniam a nadakamat itay.

14. Ania ti masursurom iti kapadasan ni Biniam?

¹⁴ Pinili ni Biniam ti agbalin a Saksi ni Jehova uray no ammona a maipasango iti nakaro a pannakaidadanes. Kitaentayo no kasano a naparmek ni Biniam ti panagbutengna iti tao gapu ta ammona nga ay-ayaten isuna ni Jehova. “Diak man la impagarup a kasdiay kakaro ti mapadasak a pannakaidadanes,” imbagana. “Ngem mas nagbutengak iti ibubusor ti pamiliak imbes nga iti panangidadanes ti gobierno. Mabutengak idi a no agbalinak a Saksi, madismaya ti saan a Saksi a tatangko ket panunoten ti pamiliak nga imbabainko ida.” Ngem kombinsido ni Biniam a kanayon nga aywanan ni Jehova dagiti ay-ayatenna. Imbagana: “Pinampanunotko no kasano a tinulongan ni Jehova ti dadduma a mangibtur iti rigat ti biag, diskriminasion, ken naranggas a  pannakaidadanes. Ammok a no agtalinaedak a matalek ken Jehova, bendisionannak. Namin-adu a naarestoak ken naparparigat pay ketdi. Ngem napadasak a mismo a kanayon a tulongannatayo ni Jehova iti tiempo a kasapulantayo no la ket ta agtalinaedtayo a matalek.” Para ken Biniam, ni Jehova ti nagbalin a pudpudno nga Amana, ken ti ili ti Dios ti nagbalin a pudpudno a pamiliana.

15. Apay a normal laeng a mabutengtayo a matay?

¹⁵ Ibaga ti Biblia a ni patay ket maysa a kabusor. (1 Cor. 15:25, 26) Ditay kayat a panunoten ti ipapatay nangnangruna no adda grabe a sakittayo wenno dagiti ay-ayatentayo iti biag. Apay a mabutengtayo a matay? Pinarsuanatayo ngamin ni Jehova nga addaan iti tarigagay nga agbiag a naragsak iti agnanayon. (Ecl. 3:11) Ngem makatulong ti balanse a panagbutengtayo iti ipapatay tapno maprotektarantayo ti biagtayo. Kas pagarigan, gapu iti dayta, mangantayo iti nasustansia ken agehersisiotayo, agpadoktor ken agtomartayo iti agas no kasapulan, ken liklikantayo dagiti mamagpeligro iti biagtayo.

16. Kasano a gunggundawayan ni Satanas ti gagangay a panagbutengtayo a matay?

¹⁶ Ammo ni Satanas nga ipatpategtayo ti biagtayo. Ngem imbagana nga isakripisiotayo kano ti amin nga adda kadatayo​—uray ti pannakigayyemtayo ken Jehova​—tapno laeng maprotektarantayo ti biagtayo. (Job 2:4, 5) Saan a husto dayta nga imbaga ni Satanas! Ngem gapu ta ni Satanas ti “addaan pannakabalin a mangyeg iti ipapatay,” gunggundawayanna ti gagangay a panagbutengtayo a matay tapno tallikudantayo ni Jehova. (Heb. 2:14, 15) Adda dagiti tiempo nga im-impluensiaan ni Satanas ti dadduma a tattao tapno pangtaanda a papatayen dagiti agdaydayaw ken Jehova no dida tallikudan ti pammatida. Mabalin met a gundawayan ni Satanas ti medikal nga emerhensia a mabalin a pakatayantayo tapno agkompromisotayo. Baka pilitendatayo dagiti doktor wenno dagiti ditay kapammatian a kapamiliatayo nga agpayalison iti dara a maikontra iti linteg ti Dios. Wenno baka adda mangibaga kadatayo a padasentayo ti sabali a pamay-an ti panangagas a maikontra kadagiti prinsipio ti Biblia.

17. Sigun iti Roma 8:37-39, apay a rumbeng a ditay pagbutngan ti ipapatay?

¹⁷ Ditay kayat ti matay. Ngem no bilang mataytayo, ammotayo a saan nga agpatingga ti panagayat ni Jehova kadatayo. (Basaen ti Roma 8:37-39.) No matay dagiti gagayyem ni Jehova, malaglagipna latta ida a kas man la sibibiagda pay laeng. (Luc. 20:37, 38) Kayatna la unayen a pagungaren ida. (Job 14:15) Nagdakkel ti imbayad ni Jehova tapno ‘maaddaantayo iti biag nga agnanayon.’ (Juan 3:16) Ammotayo a kasta la unay ti panagayat ken panangipateg kadatayo ni Jehova. Isu nga imbes a tallikudantayo ni Jehova no agsakit wenno agngangabit ti biagtayo, kiddawentayo kenkuana ti liwliwa, sirib, ken bileg. Dayta ti eksakto nga inaramid da Valérie ken ni lakayna.​—Sal. 41:3.

18. Ania ti masursurom iti kapadasan ni Valérie?

¹⁸ Idi agtawen iti 35 ni Valérie, nadayagnos nga adda karkarna ken grabe a kanserna. Kitaentayo no kasano a nakatulong kenkuana ti ayat tapno maparmekna ti panagbutengna a matay. Imbagana: “Bigla a nagbaliw ti biagmi idi naammuak nga adda kanserko. Masapul a maoperaak a dagus tapno saanak a matay. Nagkonsultaak iti adu a doktor, ngem saanda amin a kayat ti agopera nga awan ti dara. Napabutnganak, ngem diak pulos kayat ti agpayalison iti dara ta imbilin ti Dios dayta! Iti intero  a panagbiagko, namin-adun a nakitak nga ay-ayatennak unay ni Jehova. Gundawayko met itan nga ipakita nga ay-ayatek isuna. Kada adda negatibo nga ipadamag dagiti doktor, lallalo a porsegidoak a diak itulok a mangabak ni Satanas tapno maipagpannakkelnak ni Jehova. Idi agangay, nagballigi met laeng ti operasionko nga awan ti nausar a dara. Nupay adda latta dagiti problema iti salun-atko, kanayon nga ipapaay ni Jehova dagiti kasapulanmi. Kas pagarigan, sakbay a naammuak ti sakitko, napagadalanmi iti gimong iti ngudo ti lawas ti artikulo a ‘Sanguen Dagiti Pakarigatan Buyogen ti Napigsa a Pakinakem.’ * Naliwliwakami unay iti dayta nga artikulo. Inulit-ulitmi a binasa dayta. Dagiti artikulo a kas iti dayta ken ti nasayaat a naespirituan a rutina ti nakatulong kadakami ken lakayko isu a natalna ti panunotmi, kalmadokami, ken nakaaramidkami kadagiti nasayaat a desision.”

19. Ania ti asidegen a mapasamak?

¹⁹ Iti tulong ni Jehova, naparmek dagiti Kristiano iti intero a lubong dagiti narigat a situasion ken nagballigida a nangbusor iti Diablo. (1 Ped. 5:8, 9) Kayam met dayta. Asidegen nga ibilin ni Jehova ken ni Jesus ken kadagiti kakaduana nga agturay a ‘dadaelenda dagiti aramid ti Diablo.’ (1 Juan 3:8) Kalpasan dayta, ‘awanton ti pagbutngan ken pagamkan’ dagiti adipen ti Dios ditoy daga. (Isa. 54:14; Mik. 4:4) Ngem bayat nga ur-urayentayo dayta, masapul nga agporsegitayo a mangparmek iti butengtayo.

20. Ania ti makatulong tapno maparmektayo ti butengtayo?

²⁰ Masapul nga itultuloytayo a patibkeren ti panagtalektayo nga ay-ayaten ken protprotektaran ni Jehova dagiti adipenna. Maaramidtayo dayta no kanayontayo a pampanunoten ken es-estoriaen no kasano a prinotektaran ni Jehova dagiti adipenna iti napalabas. Laglagipentayo met no kasanonatayo a personal a tinulongan ni Jehova kadagiti narigat a situasion. Iti tulong ni Jehova, kabaelantayo a parmeken ti butengtayo!​—Sal. 34:4.