SUMAGMAMANO a tawen ti napalabasen, nanam-ay ti biag ti agassawa a da Cesar ken Rocio nga agnanaed iti California. Full-time ti trabaho ni Cesar iti heating, ventilation, ken air-conditioning ket part-time met ti trabaho ni Rocio iti maysa a klinika ti doktor. Adda bukodda a balay ken awan ti anakda. Ngem adda napasamak a nangbalbaliw iti biagda. Ania dayta?

Idi Oktubre 2009, nangipatulod ti sanga nga opisina ti Estados Unidos iti surat kadagiti amin a kongregasion iti pagilian. Maaw-awis dagiti boluntario nga addaan iti naisangsangayan a paglaingan nga agaplay kas temporario a Bethelite para iti pannakapalawa dagiti pasilidad ti sangay iti Wallkill, New York. Naparegta nga agaplay uray dagiti kakabsat a limbesen ti tawenda iti gagangay a tawen dagiti maawis nga agserbi iti Bethel. “Gapu iti edadmi, ammomi a daytoy laengen ti tsansami a makapagserbi iti Bethel,” kuna da Cesar ken Rocio. “Saanmi a kayat a palabsen daytoy nga oportunidad!” Dagus nga impasada dagiti aplikasionda.

Limmabas ti nasurok a makatawen ngem saan pay a naawis da Cesar ken Rocio iti Bethel. Ngem desididoda iti kalatda isu a pinasimpleda ti biagda. Kuna ni Cesar: “Pinagbalinmi nga apartment ti garahemi a 25 metro kuadrado (270 sq ft) sa impaabangmi ti nabiit pay a naibangon a dream house-mi a 200 metro kuadrado (2,200 sq ft). Inaramidmi dagitoy a panagbalbaliw tapno saankaminto a marigatan no maayabankami nga agserbi iti Bethel.” Ania ti simmaruno a napasamak? “Makabulan kalpasan ti iyaakarmi iti bassit nga apartment-mi,” kuna ni Rocio, “naawiskami kas temporario a boluntario iti Wallkill. Nalawag kadakami a babaen ti panangpasimplemi iti biagmi, inikkanmi ni Jehova iti banag a bendisionanna.”

Kas kada Cesar ken Rocio, ginasut a kakabsat a lallaki ken babbai ti nagsakripisio tapno makiramanda iti trabaho a panagibangon iti New York. Adu kadakuada ti tumultulong iti pannakaibangon dagiti kanayonan a pasilidad iti Wallkill, ket tumultulong met ti dadduma kadakuada iti pannakaibangon ti  sangalubongan a hedkuarter iti Warwick. * Adu a pagassawaan ti nangpanaw iti napintas a pagtaenganda, nasayaat a trabahoda, ken uray dagiti tarakenda iti balay tapno naan-anay a makapagserbida ken Jehova. Binendisionan kadi ni Jehova ti panagsakripisioda? Wen!

Kas pagarigan, usigentayo ti inaramid ni Way a maysa nga electrician ken ti asawana a ni Debra, a taga-Kansas nga agpada nga ag-60 ti tawenda. Inlakoda ti pagtaenganda ken ti kaaduan a sanikuada ket immakarda iti Wallkill tapno agserbida kas commuter Bethelite. * Nupay kasapulanda ti ag-adjust, mariknada a saan a sayang dagiti panagsakripisioda. Kinuna ni Debra maipapan iti trabahona iti Bethel: “Adda dagiti gundaway a mariknak a kasla addaak iti maysa kadagiti eksena ti panagibangon idiay Paraiso kas iti maipakpakita kadagiti publikasiontayo!”

Da Melvin ken Sharon a taga-South Carolina inlakoda ti pagtaengan ken dagiti sanikuada tapno tumulongda iti Warwick. Nupay saan a kaskarina dagitoy a panagsakripisio, ibilangda kas pribilehio ti makiraman iti kasta a historiko a proyekto. Kinunada: “Nakaragragsakkami ta ammomi a magunggonaan ti sangalubongan nga organisasion iti banag nga ar-aramidenmi!”

Ni Kenneth a maysa a retirado a construction worker ken ni Maureen a baketna ket taga-California ken agpada nga agtawenen iti agarup 55. Immakarda iti Warwick tapno tumulongda iti panagibangon. Tapno maaramidanda dayta, impaaywanda ti pagtaenganda iti maysa a sister a kakongregasionda ken impaaywanda met ti lakayen nga ama ni Kenneth kadagiti kapamiliada. Pagbabawyanda kadi ti inaramidda a panagsakripisio tapno makapagserbida iti Bethel? Saan! “Adu ti nagunggonami,” kuna ni Kenneth. “Ngem siempre, saanna a kayat a sawen nga awanen ti parikutmi. Adda latta, ngem makapnek ti biagmi, ket naimpusuan nga irekomendami iti sabsabali daytoy a kita ti panagserbi.”

Adda dagiti lapped a masapul a sanguen dagiti boluntario. Kas pagarigan, da William ken Sandra, nga agtawen iti nasurok nga 60, ket addaan iti nanam-ay a biag iti Pennsylvania. Narang-ay ti kompaniada nga agar-aramid kadagiti piesa ti makina ken adda 17 a trabahadorda. Dida pay immak-akar iti kongregasion sipud kinaubingda, sa agaassidegda laeng iti kaaduan a kakabagianda. Isu nga idi naawisda nga agserbi kas commuter Bethelite iti Wallkill, ammoda a kaipapanan dayta a panawanda ti gistay amin nga am-ammoda ken amin a nakairuamanda. “Ti karigatan nga inaramidmi ket ti panangpanaw  iti nanam-ay a kasasaadmi,” kuna ni William. Ngem kalpasan ti adu a kararag, inkeddeng daytoy a pagassawaan nga ituloyda ti planoda, ket saanda a pulos nagbabawyan dayta. “Awan ti kapada ti panagtrabaho ken panagserbi a kadua ti pamilia ti Bethel,” kuna ni William. “Naragragsakkami itan ken Sandra.”

Ni Ricky, a maysa a construction manager iti Hawaii, ket naimbitaran nga agserbi kas commuter Bethelite tapno tumulong iti proyekto iti Warwick. Kayat ni baketna a Kendra nga agboluntario ni lakayna. Ngem adda dakkel a pakaseknanda: ti 11 ti tawenna nga anakda a ni Jacob. Pinampanunotda no nasayaat nga umakarda iti New York ken no maka-adjust ngata ti anakda iti naiduma nga aglawlaw.

“Maysa kadagiti prioridadmi ket ti panagsapul iti kongregasion nga addaan kadagiti nareregta nga agtutubo,” kuna ni Ricky. “Kayatmi a maaddaan ni Jacob iti adu a nasayaat a gagayyem.” Nupay kasta, manmano laeng ti ubbing iti kongregasion a nasarakanda ngem adda sumagmamano a Bethelite. Kuna ni Ricky: “Kalpasan ti umuna a pannakigimongmi sadiay, dinamagko ken Jacob no ania ti makunana iti baro a kongregasionmi, aglalo ta awan ti ubbing a katawenanna. Kinunana, ‘Dika madanagan, Dad. Dagiti babbaro a Bethelite ti agbalinto a gagayyemko.’”

Agpayso, ginayyem isuna dagiti babbaro a Bethelite. Ania ti epektona? “Idi lumabasak iti kuarto ti anakko iti maysa a rabii, nakitak a nakalukat pay laeng dagiti silawna,” kuna ni Ricky. “Ekspektarek nga agay-ayam iti electronic game, ngem agbasbasa met gayam iti Biblia! Idi dinamagko no ania ti ar-aramidenna, kinunana, ‘Maysaak nga ubing a Bethelite, isu a basaek ti Biblia iti makatawen.’” Naragsakan da Ricky ken Kendra, saan laeng a gapu ta makapagboluntario ni Ricky iti panagibangon iti Warwick no di ket makatulong pay ti iyaakarda iti naespirituan nga irarang-ay ti anakda.—Prov. 22:6.

Di agbayag, malpaston ti panagibangon iti Wallkill ken Warwick, ket ammo dagiti boluntario a temporario laeng ti panagserbida iti Bethel. Madanagan kadi dagitoy a kakabsat no sadinonton ti papananda wenno anianton ti aramidenda? Saan a pulos! Umanamong ti kaaduan kadakuada iti kunaen ti dua a pagassawaan a taga-Florida nga agtawen iti nasurok a 50. Kastoy ti kuna ni John, a maysa a construction manager, ken ni baketna a Carmen nga agpada a temporario a boluntario iti Warwick: “Nakitami no kasano nga ipapaay ni Jehova dagiti kasapulanmi agingga ita. Pampanunotenmi a no ni Jehova ti nangipan kadakami ditoy, sigurado a dinakamto baybay-an kalpasan ti proyekto.” (Sal.  119:116) Ni Luis, nga agdisdisenio kadagiti fire sprinkler system ken ni baketna a Quenia ket agbolboluntario met iti Wallkill. Kinunada: “Napaneknekanmin nga ipaay ni Jehova dagiti material a kasapulanmi. Nupay dimi ammo no kasano, kaano, wenno sadino, agtalekkami nga itultuloynakamto nga aywanan.”—Sal. 34:10; 37:25.

Adu kadagiti tumultulong iti panagibangon idiay New York ti kasla imposible a makapagboluntario gapu iti nagduduma a rason. Ngem sinubokda  ni Jehova, kas iti iyaw-awisna nga aramidentayo: “Subokendak, pangngaasiyo, . . . [ket luktakto] kadakayo dagiti aribengbeng ti langlangit ket pudno a mangibukbokakto kadakayo iti bendision agingga nga awanen panagkasapulan.”—Mal. 3:10.

Subokem met kadi ni Jehova tapno masagrapmo ti naruay a bendisionna? Nainkararagan nga usigem no ania ti mabalinmo nga aramiden para iti madama a teokratiko a panagibangon, iti man New York wenno iti dadduma pay a lugar, ket makitamto a mismo no kasano a gunggonaannaka ni Jehova.—Mar. 10:29, 30.

Daytoy a kita ti panagserbi ket iparparegta unay dagiti agassawa a ni Dale ken ni Cathy a taga-Alabama. Maysa a civil engineer ni Dale ket kastoy ti kunada maipapan iti panagboluntarioda iti Wallkill: “No ikeddengmo a panawan ti nanam-ay a biagmo, makitamto ti panagtignay ti espiritu ni Jehova.” Ania ti aramidem tapno makapagboluntarioka? Kuna ni Dale: “Pasimpliem ti biagmo, pasimpliem, sa pasimpliem pay. Dimonto pulos pagbabawyan dayta!” Ni Gary a taga-North Carolina ket 30 a tawennan kas construction manager. Ibilangda ken baketna a Maureen a ti maysa kadagiti bendision a tagtagiragsakenda iti Warwick ket ti “pannakaam-ammo ken pannakipagtrabaho iti adu a nagsasayaat a kakabsat a lallaki ken babbai a mangus-usar iti biagda nga agserbi ken Jehova iti Bethel.” Innayon ni Gary: “Tapno makapagserbika iti Bethel, masapul a simple ti biagmo. Dayta ti kasayaatan a biag iti daytoy a sistema ti bambanag.” Ni Jason, nga agtrabtrabaho kas maysa nga electrical contractor, ken ni baketna a Jennifer, agpada a taga-Illinois, kunada a ti panagtrabaho iti maysa a proyekto iti Bethel iti Wallkill ti “maysa kadagiti kasayaatan a pangpadasan iti biagto idiay baro a lubong.” Innayon ni Jennifer: “Dimo mailadawan ti ragsakmo ta ammom nga amin nga ar-aramidem ket napateg ken Jehova ken daytanto ti panggapuanna a mangbendision kenka iti masanguanan. Siguraduenna a maipaay ti amin a kasapulam.”