Iti agsapa ti Lunes, Oktubre 10, 2022, nangipatayab ti Russia kadagiti missile iti agduduma a siudad ti Ukraine. Inaramidda dayta tapno ibalesda ti nakaro a panagbomba a nangdadael iti kangrunaan a rangtay a mangikonektar ti Crimea iti Russia, dua nga aldaw sakbayna. Napasamak dagitoy nabiit pay kalpasan nga impakdaar ti dadduma a politiko a kasla asidegen ti Armagedon.

•   “Sipud idi napasamak ti Cuban Missile Crisis idi tiempo ni [U.S. President John F.] Kennedy, ita laeng manen a kastoy kaasidegtayo iti Armagedon. . . . Kasla imposible nga agusarka iti nuklear nga armas a saan nga agresulta iti Armagedon.”—Joe Biden, Presidente ti U.S., Oktubre 6, 2022.

•   “Mamatiak a dandanin ti Armagedon, ket agpegpeggad ti intero a planetatayo.”—Volodymyr Zelensky, Presidente ti Ukraine, idi napagsaludsodan kadagiti pagdaksan ti panagusar iti nuklear nga armas, BBC News, Oktubre 8, 2022.

 Posible kadi nga agresulta iti Armagedon ti panagusar iti nuklear nga armas? Ania ti ibaga ti Biblia?

 Saan. Ti sao nga “Armagedon” ket naminsan laeng a nagparang iti Biblia iti Apocalipsis 16:16. Saan a tumukoy dayta iti gubat iti nagbaetan dagiti nasion no di ket gubat iti nagbaetan ti Dios ken dagiti “ari iti intero a daga.” (Apocalipsis 16:14) Usarento ti Dios ti gubat ti Armagedon tapno pagpatinggaenna ti turay dagiti tattao.—Daniel 2:44.

 Tapno maammuam ti ad-adu pay no ania ti mapasamak iti daga inton Armagedon, basaem ti artikulo nga Ania ti Gubat ti Armagedon?

 Saan. Uray no agusarto dagiti agtuturay iti nuklear nga armas, saan nga ipalubos ti Dios a madadael ti daga. Ibaga ti Biblia:

•   “Ti daga agtalinaed iti agnanayon.”—Eclesiastes 1:4.

•   “Dagiti nalinteg kukuadanto ti daga, ket agyandanto iti dayta iti agnanayon.”—Salmo 37:29.

 Ngem ipakita dagiti padto ti Biblia ken agdama a pasamak nga asidegen ti dakkel a panagbalbaliw iti pakasaritaan ti tao. (Mateo 24:3-7; 2 Timoteo 3:1-5) Ammuem ti ibagbaga ti Biblia maipapan iti masanguanan babaen ti libre nga interactive a panagadal iti Biblia.