Idi Marso 2020, indeklara ti World Health Organization a pandemia ti COVID-19. Saan nga ekspektaren ti adu a daytoy a virus ket ap-apektaranna pay laeng ti intero a lubong kalpasan ti nasurok a makatawen. Gapu iti pandemia, minilion a tattao a karaman dagiti Saksi ni Jehova, ti naapektaran iti pisikal, emosional, ken pinansial. Kasano nga inorganisar dagiti Saksi ni Jehova ti pannakaiwaras dagiti relief bayat ti krisis?

 Iti panangiwanwan ti Coordinators’ Committee ti Bagi a Manarawidwid dagiti Saksi ni Jehova, nabukel ti nasurok a 950 a Disaster Relief Committee (DRC) iti intero a lubong para iti COVID-19. Adda dagiti lugar nga inyurnosda nga agtitinnulong dagiti Saksi, ken adda met dagiti lugar nga immawat dagiti Saksi iti ayuda manipud iti gobierno. Nangorganisar met dagiti DRC iti dakdakkel ken nalawlawa a panagiwaras iti relief.

 Maysa a pagarigan ti napasamak idiay Paraguay. Inreport ti maysa a newspaper a rimmigat ti ekonomia gapu iti pandemia, “isu nga adu a taga-Paraguay ti agkurangen ti kanenda.” Ngem ti DRC iti Paraguay ket nangrugin nga agiwaras kadagiti pakete a naglaon kadagiti taraon ken gamit a pagdalus ken para iti salun-at nga umanay nga usaren ti uppat ti miembrona a pamilia iti dua a lawas. Tunggal pakete ket agbalor iti agarup $30 (wenno ₱1,400).

 Kasano a protprotektaran dagiti boluntario ti bagida ken ti sabsabali tapno saanda a makaptan iti COVID-19? Agisuotda iti mask ken sursurotenda ti physical distancing. Sigsiguraduenda a dagiti kompania nga agsuplay kadagiti makan ket nadalus dagiti pagar-aramidanda kadagita ken sursurotenda dagiti safety protocol. Malaksid iti dayta, sigsiguraduenda met nga amin nga agiggem kadagiti pakete ket nakasuot iti personal protective equipment, dalusan ken i-disinfect-da dagiti lugan, ken na-disinfect dagiti pagikabilanda kadagiti pakete. Sa no mai-deliver-en dagiti pakete, adda physical distancing kadagiti kakabsat nga agiwaras ken dagiti kakabsat nga umawat kadagita.

 Idi Enero 2021, addan nasurok a $25 milion (nasurok a ₱1.2 bilion) nga inaprobaran ti Coordinators’ Committee para iti relief iti COVID-19. Us-usaren a naimbag dagiti sangay ken DRC dagiti naidonar a pondo ken ikagkagumaanda ti gumatang kadagiti bambanag a kasapulan iti kalakaan a presio. Kas pagarigan, idiay Chile, kayat dagiti kakabsat a mangor-organisar iti relief ti gumatang iti 750 a kilo a bukbukel. Ngem nagdoble ti presio iti uneg la ti makabulan! Dua nga oras kalpasan a nag-order-da iti nanginngina a presio, impakaammo ti aglaklako nga adda nangibabawi iti orderna isu a pabayadanna lattan dagiti bukbukel iti nalaklaka a presio iti napalabas a bulan imbes a ti nanginngina a presio a nagtutulaganda!

 Ngem idi mapan alaenen dagiti kakabsat ti bukbukel, ibabawi metten ti aglaklako ti tulaganda. Inakusaranna dagiti kakabsat a kasda met la iti sabali nga organisasion a saan a patas ti panagiwarasda kadagiti makan. Kalpasan a nagkararag iti apagbiit ken naulimek, maysa kadagiti kakabsat ti nangilawlawag iti aglaklako a nasurbey ti tunggal kongregasion tapno maammuan no asino a talaga ti agkasapulan. Inlawlawag pay dagiti kakabsat a gapu ta agduduma ti kultura dagiti umawat, tunggal pakete ket aglaon kadagiti produkto a talaga a kasapulan ti tunggal pamilia. Impasiguradoda pay iti aglaklako a boluntario a naipaay ti amin a donasion a kuarta ken tulong a naited kadagiti Saksi ni Jehova. Nagbilib ti aglaklako. Saan laeng nga immanamong iti nalaklaka a presio, nagdonar pay iti 400 a kilo ti bukbukel iti simmaruno nga order dagiti kakabsat.

 Ni Lusu, a baketen a balo idiay Liberia, ket kaduana ti lima pay a miembro ti pamiliana. Maysa nga agsapa bayat a mamigbigatda ken pagsasaritaanda ti teksto iti dayta nga aldaw, nakita ti pito ti tawenna nga apo ni Lusu a naibusen ti suplayda a makan. Dinamagna, “Anianto ngaruden ti kanentayo?” Imbaga ni Lusu nga inkararagnan ti tulong ni Jehova ken agtalek nga ipaayna ti tulong a kasapulanda. Kamalmanna, tinawagan dagiti panglakayen iti kongregasion ni Lusu tapno mapanna alaen ti suplayna a makan. Inyestoriana: “Kuna ti apok nga ammona itan a dumdumngeg ni Jehova iti kararag ken sungsungbatanna dayta gapu ta sinungbatan ni Jehova ti kararagko.”

 Maysa a babai idiay Democratic Republic of Congo ket adda kaarrubana a maysa a pamilia a Saksi. Idi nakitana ti pamilia nga immawat iti makan kadagiti kapammatianda, kinunana, “Kalpasan ti pandemia agbalintayo metten a Saksi ni Jehova gapu ta dida baybay-an dagiti kapamatianda iti tiempo ti rigat.” Dinamag ti asawana, “Agbalinka kadi a Saksi ni Jehova gapu laeng iti sangasako a bagas?” Insungbatna, “Siempre, saan. Ngem ti sangasako a bagas ket ebidensia ti pudno nga ayat.”

 Dagus a nakaipaay dagiti Saksi ni Jehova iti tulong kadagiti kakabsattayo bayat ti pandemia gapu iti adu a donasionyo. Pagyamanan kadagiti donasion nga impaayyo babaen kadagiti pamay-an a makita iti donate.dan124.com.