“Awan ti sulisog a dimteng kadakayo malaksid iti gagangay kadagiti tattao. Ngem matalek ti Dios, ket dina ipalubos a masulisogkayo iti diyo kabaelan, no di ket mangisagana iti dalan a pagruaran tapno maibturanyo dayta a sulisog.”—1 Corinto 10:13, Baro a Lubong a Patarus.

 “Tunggal sulisog nga umay kadakayo, gagangay a dumteng iti tao. Ngem tungpalen ti Dios ti karina; dina ipalubos a masulisogkayo iti nalabes a diyo kabaelan a sarangten. No masulisogkayo, ikkannakayo iti pigsa a mangibtur, ket iti kasta, makalisikayo.”—1 Corinto 10:13, Ti Baro a Naimbag a Damag Biblia.

 Ipakita daytoy a bersikulo ti nakasaysayaat a kualidad ti Dios, ti kinamatalekna. Dagiti matalek nga agdaydayaw iti Dios manamnamada ti tulongna, nangruna no maipasangoda kadagiti suot wenno sulisog.

 “Awan ti sulisog a dimteng kadakayo malaksid iti gagangay kadagiti tattao.” Mabalin a masulisog dagiti agdaydayaw iti Dios nga agaramid iti saan a makaay-ayo kenkuana. Dagita a suot wenno pakarigatan ket gagangay wenno saan a karkarna ta napadasan dagita ti adu a tattao. a Masigurado ngarud dagiti agdaydayaw iti Dios a maibturanda met dagita.

 “Matalek ti Dios.” Ni Jehova b a Dios ket mapagtalkan ken mapangnamnamaan. Kanayon a tungpalenna ti karina ta dina baybay-an dagiti mangay-ayat, matalek, ken natulnog kenkuana. (Deuteronomio 7:9; Salmo 9:10; 37:28) Gapuna, makapagtalek met dagiti agdaydayaw kenkuana nga aramidenna ti dua pay a karina iti daytoy a bersikulo.

 “Dina ipalubos a masulisogkayo iti diyo kabaelan.” Ipakpakita ti Dios ti kinamatalekna babaen ti saanna a panangipalubos a mapadasan ti maysa dagiti suot nga imposible a maibturan. Ammona ti limitasion ti amin nga agdaydayaw kenkuana.—Salmo 94:14.

 “Mangisagana iti dalan a pagruaran tapno maibturanyo dayta a sulisog.” Mabalin nga ikkaten ti Dios ti suot wenno tulonganna dagiti agdaydayaw kenkuana nga agibtur. Kas pagarigan, mabalin nga ipaayna ti panangiwanwan babaen ti nasantuan nga espiritu, liwliwa manipud iti Biblia, wenno praktikal a tulong manipud kadagiti kapammatian.—Juan 14:26; 2 Corinto 1:3, 4; Colosas 4:11.

 Daytoy a bersikulo ket masarakan iti surat ni apostol Pablo kadagiti Kristiano iti kongregasion iti Corinto. Iti daytoy a paset ti surat ni Pablo, inusarna ti pakasaritaan ti nagkauna nga Israel tapno pakdaaranna dagiti taga-Corinto. (1 Corinto 10:11) Inlista ni Pablo ti sumagmamano a suot ken pakasulisogan a nakaipasanguan dagiti Israelita, a pakairamanan ti idolatria ken seksual nga immoralidad. (1 Corinto 10:6-10) Dadduma kadakuada ti timmulok kadagitoy a pakasulisogan. Maibatay iti napasamak kadagiti Israelita, pinalagipan ni Pablo dagiti Kristiano a saanda koma nga agtalek unay iti bagida ken panunoten a saanda a pulos masulisog. (1 Corinto 10:12) Nupay kasta, impasiguradona iti 1 Corinto 10:13 a mapagballigian dagiti matalek nga agdaydayaw iti Dios ti aniaman a suot.

 Buyaem daytoy ababa a video tapno makitam ti pakabuklan ti libro nga 1 Corinto.