Ti dakkel a rigat ket agresultanto iti kakaruan a rigat iti pakasaritaan ti tao. Sigun iti Biblia, mapasamakto dayta kadagiti “maudi nga aldaw,” wenno “tiempo ti panungpalan.” (2 Timoteo 3:1; Daniel 12:4) Dayta ket rigat a “saan pay a napasamak manipud idi panangrugi ti panamarsua a pinarsua ti Dios agingga iti dayta a tiempo, ket saanto a mapasamak manen.”—Marcos 13:19; Daniel 12:1; Mateo 24:21, 22.

Dagiti mapasamak bayat ti dakkel a rigat

•   Madadael ti ulbod a relihion. Nakaskasdaawto ti kapartak ti pannakadadael ti ulbod a relihion. (Apocalipsis 17:1, 5; 18:9, 10, 21) Dagiti agtuturay nga irepresentar ti United Nations ti mangitungpalto iti dayta a pagayatan ti Dios.—Apocalipsis 17:3, 15-18. a

•   Maraut ti pudno a relihion. Padasento ti aliansa dagiti nasion, a natukoy iti libro nga Ezequiel kas “Gog iti daga ti Magog,” a pukawen ti amin a miembro ti pudno a relihion. Ngem protektaranto ti Dios dagiti agdaydayaw kenkuana.—Ezequiel 38:1, 2, 9-12, 18-23.

•   Maukom dagiti tattao. Ukomento ni Jesus dagiti tattao ket “paglalasinennanto [ida] iti maysa ken maysa, a kas ti maysa a pastor ilasinna dagiti karnero manipud kadagiti kalding.” (Mateo 25:31-33) Dayta a panangukom ket agdepende no sinuportaran ti maysa a tao wenno saan dagiti ‘kakabsat’ ni Jesus, dagiti makipagturay kenkuana idiay langit.—Mateo 25:34-46.

•   Maummong dagiti agturay iti Pagarian. Mapagbiag ken agpalangitto dagiti matalek a napili a makipagturay ken Kristo inton malpas ti biagda ditoy daga.—Mateo 24:31; 1 Corinto 15:50-53; 1 Tesalonica 4:15-17.

•   Armagedon. Daytoy a “gubat ti naindaklan nga aldaw ti Dios a Mannakabalin-amin” ket maawagan met iti “aldaw ni Jehova.” (Apocalipsis 16:14, 16; Isaias 13:9; 2 Pedro 3:12) Dadaelento ni Kristo dagiti naukom a managdakdakes. (Sofonias 1:18; 2 Tesalonica 1:6-10) Karamanto iti dayta ti pannakadadael ti amin a gobierno ti tao, a natukoy iti Biblia kas atap nga animal a pito ti ulona.—Apocalipsis 19:19-21.

Dagiti mapasamak kalpasan ti dakkel a rigat

•   Maipupok ni Satanas ken dagiti demonio. Ti nakapigpigsa nga anghel ipuruaknanto ni Satanas ken dagiti demonio iti “mangliwengliweng,” wenno nakaun-uneg nga abut, a mangirepresentar iti arig ipapatay wenno kinaawan gaway. (Apocalipsis 20:1-3) Kaslanto adda ni Satanas iti pagbaludan; saannanto a kabaelan ti mangimpluensia.—Apocalipsis 20:7.

•   Mangrugi ti Sangaribu a Tawen. Mangruginto ti 1,000 a tawen a panagturay ti Pagarian ti Dios, a mangyeg iti nakaad-adu a bendision kadagiti tattao. (Apocalipsis 5:9, 10; 20:4, 6) Addanto “dakkel a bunggoy,” wenno grupo dagiti tattao, a di mabilang ti kaaduna a “naggapu iti dakkel a rigat.” Isuda dagiti naisalakan a makakita iti panangrugi ti Sangaribu a Tawen a panagturay ti Pagarian ditoy daga.—Apocalipsis 7:9, 14; Salmo 37:9-11.