Saan nga isursuro ti Biblia ti doktrina a ‘no naisalakanen, agnanayonen a naisalakan.’ Ti tao a naisalakan gapu iti pammatina ken Jesu-Kristo ket mabalin a mapukawna dayta a pammati ken ti pannakaisalakan a kakuykuyog dayta. Kuna ti Biblia a tapno saan a maawan ti pammati, masapul ti napalalo a panagporsegi, wenno panangited iti ‘amin a kabaelan.’ (Judas 3, 5, Ti Baro a Naimbag a Damag Biblia) Naibaga kadagiti nagkauna a Kristiano a nangawat idin ken Kristo: “Itultuloyyo nga itrabaho ti bukodyo a pannakaisalakan buyogen ti buteng ken panagpigerger.”—Filipos 2:12.

Dagiti sasao ti Biblia a mangkontra iti sursuro a ‘no naisalakanen, agnanayonen a naisalakan’

•   Ibagbaga ti Biblia a ditay ar-aramiden dagiti nadagsen a basol ta lapdandatayo a sumrek iti Pagarian ti Dios. (1 Corinto 6:9-11; Galacia 5:19-21) No saan a mabalin a mapukaw ti pannakaisalakan, awan serserbina no kuan dayta nga imbaga ti Biblia. Ipakita ketdi ti Biblia a ti maysa a naisalakanen ket mabalin a mapukawna ti pannakaisalakanna no sublianna manen ti nakaro a basolna. Kas pagarigan, kuna ti Hebreo 10:26: “No sipapakinakem nga iyugalitayo ti panagbasol kalpasan nga inawattayon ti umiso a pannakaammo iti kinapudno, awanen ti nabati nga aniaman a sakripisio maipaay iti basbasol.”—Hebreo 6:4-6; 2 Pedro 2:​20-​22.

•   Babaen iti maysa nga ilustrasion, insuro ni Jesus nga importante nga itultuloytayo nga aywanan ti pammatitayo. Iti daytoy nga ilustrasion, impada ni Jesus ti bagina iti maysa a puon ti ubas ken impadana met dagiti adalanna kadagiti sanga dayta nga ubas. Dadduma kadakuada ti nangipakita met idi iti pammati kenkuana babaen kadagiti bungada, wenno ar-aramidda, ngem saanda nga intultuloy dayta, isu a ‘maibellengda a kas maysa [nga awan bungana] a sanga,’ kayatna a sawen, mapukawda ti pannakaisalakanda. (Juan 15:1-6) Nagusar met ni apostol Pablo iti ilustrasion a kapada dayta. Kunana a dagiti Kristiano a saan nga agtultuloy a mangipakita iti pammati ket ‘maputedto.’—Roma 11:17-​22.

•   Naibilin kadagiti Kristiano nga ‘agtultuloyda nga agbantay.’ (Mateo 24:42; 25:13) Dagidiay maturog iti naespirituan, babaen man iti panangyugalida kadagiti “aramid nga agpaay iti sipnget” wenno ti saanda a panangaramid iti amin a kabaelanda a mangitungpal iti trabaho nga imbilin ni Jesus, mapukawda ti pannakaisalakanda.—Roma 13:11-13; Apocalipsis 3:1-3.

•   Adu a bersikulo iti Biblia ti mangipakita a dagidiay naisalakanen ket masapul a matalek nga agibtur agingga iti panungpalan. (Mateo 24:13; Hebreo 10:36; 12:2, 3; Apocalipsis 2:10) Inyebkas dagiti Kristiano idi umuna a siglo ti ragsakda idi naammuanda nga agib-ibtur dagiti kapammatianda kas panangipakitada iti pammatida. (1 Tesalonica 1:2, 3; 3 Juan 3, 4) Rasonable ngata nga ibaga ti Biblia nga importante ti matalek a panagibtur no maisalakanto met laeng gayam uray dagidiay saan met a makapagibtur?

•   Sa laeng narikna ni apostol Pablo a siguradon ti pannakaisalakanna idi ammona a dandanin matay. (2 Timoteo 4:6-8) Nabayag pay sakbay dayta, ammona a posible saan a maisalakan isuna no masulisog a mangaramid iti dakes a kayat ti lasagna. Insuratna: “Disdisnogek ti bagik ket ad-adipenek, tapno, kalpasan a nakaskasabaak ti sabsabali, uray kasano siak saanak nga agbalin a di naanamongan.”—1 Corinto 9:27; Filipos 3:12-14.