Idi Hulio 24-​26, 2015, rinibu a Saksi ni Jehova nga agsasao iti Tagalog ti immatender iti naisangsangayan a kombension idiay Rome, Italy—nasurok a 10,000 a kilometro (6,200 mi) manipud iti Pilipinas.

Sigun iti maysa a reperensia, nasurok a 850,000 a Pilipino ti aggigian itan idiay Europa. Kas resultana, agarup 60 a kongregasion ken babassit a grupo dagiti Saksi ni Jehova sadiay ti aggigimong iti Tagalog ken mangaskasaba kadagiti Pilipino iti lugarda.

Ngem iti daytoy a kombension idiay Rome, amin dagitoy a kongregasion ken grupo ket nagtitipon iti umuna a gundaway para iti tallo nga aldaw a kombension iti bukodda a pagsasao. Naragsakan ti 3,239 nga immatender a dimngeg iti pangserra a palawag iti kada aldaw nga imparang ni Brother Mark Sanderson, a maysa a miembro ti Bagi a Manarawidwid dagiti Saksi ni Jehova ken dati a nagserbi iti Pilipinas.

Ania ti nakaidumaanna no ti maysa ket umatender iti kombension a mausar ti nakayanakanna a lengguahe imbes a ti lengguahe a maus-usar iti paggigiananna a lugar? “Maawatak met bassit ti Ingles,” kuna ti agsolsolo nga ina a ni Eva, “ngem imbag laengen ta adda daytoy a kombension iti Tagalog. Dimmanon a dagus iti pusok dagiti pannursuro iti Biblia.” Tapno makaurnong da Eva ken ti dua nga annakna iti pagpleteda a mapan idiay Italy nga aggapu iti Spain, nagsasaritaanda a maminsanda laengen a mangan iti ruar iti kada bulan, imbes a linawas a kas iti dati. Kuna ni Eva, “Sulit ti panagsakripisiomi ta naawatak ti intero a kombension!”

Indawat ni Jasmin, nga aggigian idiay Germany, nga agbakasion iti trabaho tapno makaatender iti kombension. “Ngem idi pumanawak koman,” kunana, “naibaga kaniak a saanak a mabalin nga agbakasion ta adda masapul a maileppas a trabaho. Ngem kalmadoak latta, nagkararagak ken Apo Jehova, sa nakisaritaak iti boss-ko. Nayurnosmi dagiti trabaho tapno makaatenderak iti kombension! Maragragsakanak unay ta nakaduak dagiti kakabsat a padak a Pilipino ditoy Europa.”

Siempre, saan laeng a ti Pilipinas ti kailiw ti adu a Pilipino nga aggigian iti Europa. Kailiwda met dagiti Pilipino a gagayyemda nga adda iti sabali a paset ti Europa. Gapu iti daytoy a kombension, nagkikita manen dagitoy nga aggagayyem, ngem ita, agkakabsatdan iti pammati. (Mateo 12:48-​50) Kuna ni Fabrice, “Agliplippias ti pusok iti ragsak gapu ta nakitak dagiti am-ammok!” Idi nalpasen ti kombension, inulit-ulit nga imbaga ti maysa a kabsat a babai, “Maysa daytoy a dakkel a family reunion!”