Kas tignay iti adu a bilang ti agpakpakamatay iti estado ti Tabasco idiay Mexico, inyurnos dagiti Saksi ni Jehova ti dua a bulan nga espesial a kampania idi 2017 a mangiwaras manen iti Abril 2014 a ruar ti Agriingkayo! A napauluan iti “Apay a Dika Sumuksuko?—Tallo a Rason nga Agtultuloyka nga Agbiag.” Adu ti agyamyaman iti dayta.

Ni Faustino, a maysa a Saksi ni Jehova, ket nakisarita iti babai a madanagan iti barona nga agtawen iti 22. Adda depresion ti agtutubo ken pinadasna idi ti agpakamatay. Saan nga ammo ti babai no kasano a tulonganna ti anakna. Ngem idi impaima ni Faustino ti magasin, imbaga ti babai, “Daytoy ti talaga a kasapulan ti barok.” Kalpasan ti sumagmamano a panagsarungkar, simmayaat ti emosion ti anakna. Kuna ni Faustino, “Mas relaks ken naragragsak itan.” Kasta met, ibagbagana iti kabsatna, nga addaan met iti depresion, no ania ti maad-adalna.

Ni Karla, nga agnanaed iti siudad ti Huimanguillo, inusarna ti magasin a tumulong iti klasmeytna. “Nadlawko a naliday ti maysa a klasmeytko nga agtawen iti 14,” kuna ni Karla. “Kinasaritak, ket inlawlawagna ti situasion ti pamiliada. Bayat ti panagsaritami, nadlawko dagiti piglat iti kannigid nga imana.” Masansan gayam a sugaten daytoy a balasitang dagiti ima ken sakana. Ibagana a saan a napintas ken awan ti serserbi ti biagna. Inikkan ni Karla iti magasin nga Agriingkayo! Idi nabasan ti balasitang, imbagana ken Karla a kasla naisurat ti magasin para kenkuana. Immisem sa imbagana a mamatin nga adda serbi ti biagna.

Iti siudad ti Villahermosa, adda desperado a pamiliado a lalaki. Naawanan iti trabaho, ken pinanawan ti asawana. Nagpatulong iti Dios ngem mariknana latta nga awan namnamana. Agpakamatay koman ngem nagtuktok iti ruanganna ti dua a Saksi ni Jehova a da Martín ken Miguel. Linuktan ti lalaki ti ruangan, ket impaima dagiti Saksi ti magasin nga Agriingkayo! Idi nakita ti lalaki ti paulo ti magasin, nariknana a dayta ti sungbat ti Dios iti kararagna. Imbasaan da Martín ken Miguel kadagiti makaliwliwa a bersikulo ti Biblia sa nagsublida kalpasan ti sumagmamano nga aldaw, ket mas kalmado ken nasaysayaaten ti emosion ti lalaki. Iyad-adalanda itan iti Biblia iti mamindua iti makalawas.

Kas paset daytoy a kampania, binisita dagiti Saksi ti dadduma a pagbaludan iti estado ti Tabasco tapno iranudda kadagiti balud dagiti prinsipio ti Biblia a makatulong iti panagbirok iti panggep ti biag. Nangisagana dagiti Saksi iti presentasion a buklen dagiti video, palawag a naibatay iti Biblia, ken ti pannakailawlawag dagiti rason nga agtultuloy nga agbiag a linaon ti magasin. Inapresiar dagiti balud kasta met dagiti opisial ti pagbaludan dagitoy nga ibibisita. Kas pagarigan, imbaga ti maysa a balud: “Namitlon a pinadasko ti agpakamatay. Adda dagiti nangibaga nga ipatpategnak ti Dios, ngem saanda a pulos inusar ti Biblia a mangpaneknek nga umiso ti imbagada. Talaga a naparegtaak kadagiti imbagayo.”

Adu ti nakapaliiw iti dayta a kampania. Nagyaman ti sekretario ti salun-at iti dayta nga estado gapu iti panagregget dagiti Saksi a tumulong iti komunidad, ken nangisurat ti lokal a newspaper iti artikulo maipapan iti dayta a kampania a napauluan iti “Linabananda ti Panagpakamatay.”