LESN 26
Wa Mek So Moch Wikidnis A Gwaan Iina Di Worl, An Wa Mek Wi A Sofa?
Wen sitn bad apm, di iiziyis ting fi aks a “Wa mek?” Bot wi kyan fiil gud fi nuo se di Baibl mek wi nuo wa mek dem sitn ya a apm.
1. Wa Sietan did du wa mek so moch wikid sitn staat fi apm iina di worl?
Wa Sietan du a dat im ton gens Gad. An kaa im did waahn fi ruul uova ada piipl, im inviigl di fos man an uman, Adam an Iiv, fi ton gens Gad tu. So im go tel Iiv wan lai. (Jenisiz 3:1-5) Sietan mek Iiv tingk se Jeuova neehn waahn ar fi get sitn we Jeuova nuo se gud fi ar. An im mek ar tingk se piipl wuda betaraaf widout Gad. Yu si kaaz Sietan tel di fos lai wen im tel Iiv se shi naa go ded, a dat mek di Baibl kaal im wan “laiyad an . . . di faada fi aal lai.”—Jan 8:44.
2. A wa Adam an Iiv did du?
A neehn laik se Jeuova did miin tu Adam an Iiv, kaa im did tel dem se dem kuda nyam fram evri chrii we de iina di gyaadn a Iidn. A onggl wan dem neehn fi pik notn an nyam fram. (Jenisiz 2:15-17) Bot dem mek op dem main fi go nyam fram di siem chrii we Gad did don tel dem se dem no fi nyam notn aafa it. So Iiv “staat pik fruut aafa it an iit it.” An afta dat, Adam “staat iit it tu.” (Jenisiz 3:6) So di tuu a dem neehn du wa Gad se dem fi du. Fi du wa Gad waahn dem fi du a did a wan iizi wan-tuu dat. Bot insted-a dat, dem tek it op pan demself fi no du wa Gad tel dem fi du. A so dem en op sin gens Gad. An kaaz a wa dem du, dem mek Gad si se dem no waahn im fi a ruul dem. Wa dem du mek dem en op iina bier sofarieshan.—Jenisiz 3:16-19.
3. Kaa a wa Adam an Iiv did du, wa dat av fi du wid wi?
Kaa Adam an Iiv sin gens Gad, dem neehn porfek no muor. So kaaz a wa di pikni dem get fram Adam an Iiv, dem no porfek niida. Dis a wa di Baibl tel wi se bout Adam: “A wan man kaaz sin fi kom iina di worl, an a da man de sin kaaz im fi ded. An siem ou it go wid im a siem so it go wid evribadi—evribadi sin so evribadi a-go ded.”—Ruoman 5:12.
Wan uol iip a tingz mek wi sofa. Wi sofa som a di taim kaaz a di bad sitn dem we wi du. An som a di ada taim dem wen wi a sofa, a kaaz a di bad sitn dem we ada piipl du. Somtaim wi sofa an tingz apm kaa wi de iina di rang plies a di rang taim.—Riid Iikliiziyastiiz 9:11.
LORN SOM MUO
Luk pan wa mek wi nuo se aal a di wikid sitn dem an di sofarin we a gwaan iina di worl ya nou, a no Gad a kaaz it. An wi a-go luk pan ou it mek im fiil wen im si wi a sofa.
4. A uu riili mek wi a sofa so?
Uol iip a piipl fiil se a Gad a ruul di worl. Bot a riili so it go? Plie di VIDIYO.
Riid Jiemz 1:13 an 1 Jan 5:19, an den wi a-go taak bout da kwestiyan ya:
-
Yu tingk a Gad a kaaz aal a di wikid sitn dem an di sofarieshan we a gwaan iina di worl ya nou?
5. Wa a som a di sitn dem we yu si a apm sins Sietan staat fi ruul?
Riid Jenisiz 3:1-6, an den wi a-go taak bout dem kwestiyan ya:
-
A wa’a di lai we Sietan did tel?—Luk pan vors 4 an 5.
-
A wa Sietan did se fi mek it luk laik se Jeuova no waahn notn gud fi wi?
-
Bies pan wa Sietan se, wi niid Jeuova fi ruul wi fi wi api?
Riid Iikliiziyastiiz 8:9, an den wi a-go taak bout da kwestiyan ya:
-
Kaa Jeuova naa ruul di worl, wa’a som a di sitn dem we a gwaan nou?
-
Adam an Iiv did porfek an dem did liv iina Paradais. Bot dem neehn lisn tu wa Jeuova Gad se dem fi du. Insted-a dat, dem lisn tu Sietan
-
Afta Adam an Iiv ton dem bak pan Jeuova, di wol worl ful op a piipl we a sin, a sofa, an a ded
-
Jeuova a-go get rid a sin an sofarieshan, an piipl naa go ded agen. So piipl a-go porfek agen, an dem a-go liv iina Paradais
6. Jeuova fiil it fi wi wen im si wi a sofa
Yu tingk Jeuova fiil it fi wi wen wi a sofa? Luk pan wa wan king we did niem Dievid an di apasl Piita did rait se. Riid Saam 31:7 an 1 Piita 5:7, an den wi a-go taak bout da kwestiyan ya:
-
Nou dat yu nuo se Jeuova kier bout yu, an im fiil it fi yu wen yu a sofa, ou dat mek yu fiil?
7. Gad a-go get rid a evriting we mek wi a sofa
Riid Aizaiya 65:17 an Revilieshan 21:3, 4, an den wi a-go taak bout da kwestiyan ya:
-
Wa mek it mek yu fiil gud fi nuo se wen Jeuova saat out di prablem dem, it a-go komiin laik dem neehn apm iina di fos plies?
Yu did nuo se?
Di fos lai we Sietan did tel did doti op Jeuova niem. Im mek it luk laik se Jeuova a no wan gud Ruula we fier an kier bout wi. Wen Jeuova mek tingz beta fi wi an wi naa sofa agen, evribadi a-go si se a im a di bes Ruula fi wi, an a lai Sietan did a tel. Di bigis ting a fi mek evribadi si se a Jeuova a di bes Ruula an Sietan a laiyad.—Matyu 6:9, 10.
SUMADI MAIT-A SE: “Gad did mek wi fi wi a sofa.”
-
Ou yu wuda ansa dem?
DIS A WA YU FI MEMBA
Aal a di sofarin we wi a go chuu iina di worl tide a kaaz a Sietan an Adam an Iiv. Bot suun suun, Jeuova a-go get rid a aal a dat kaa im kier bout wi.
Wa yu did lorn iina da lesn ya?
-
A wa’a di lai we Sietan did tel Iiv?
-
Kaaz Adam an Iiv did ton dem bak pan Gad, wa it mek apm tu aal a wi?
-
Ou wi nuo se Jeuova fiil it fi wi wen wi a sofa?
CHEK OUT SOM MUO SITN
Lorn wa di Baibl se bout wa it miin fi sin.
Chek out di ansa fi som kwestiyan we did kom op kaaz a wa Sietan did se iina di gyaadn a Iidn.
“Wa Mek Gad Lou So Moch Sofarin Fi A Gwaan?” (Di Wachtowa, Janiweri 1, 2014)
Luk ou yu a-go fiil gud wen yu get di ansa fi da kwestiyan ya we a bada nof piipl.
Si uu da man ya lorn se a-go get rid a aal a di sofarieshan we a gwaan roun im.
