KIP WACH!
Piipl A Mash Op Di Ort—Wa Di Baibl Av Fi Se Bout Dis?
“Kaaz a di prablem dem we a mek di weda chienj op chienj op aal uova di ort, ef wi no main shaap, wi a-go av som big big prablem fi diil wid. Laik, wol iip a di big siti dem a-go flod out. Di plies a-go get ata an ata. Som big staam gweehn mash op di plies. Aal uova di plies piipl kyaahn go get no waata. An wol iip a di plaant dem an animal dem gweehn ded aaf. A no Anansi stuori dis, an a no fraitn wi a chrai fraitn unu. Di piipl dem we stodi bout di ort mek wi nuo se a dat a-go gwaan kaaz a di wie ou di govament dem a du tingz so dat piipl kyan get lait an di gyas we kyaar an dem sitn de niid fi ron.”—António Guterres, di man we inchaaj a di Yuunaitid Nieshan, se dis bout wan ripuot we di “Intergovernmental Panel on Climate Change” gi pan Iepril 4, 2022.
“[Iina Merika] yu av 423 paak we dem kaal nashinal paak an di piipl dem we stodi bout di ort an dem ting de a se suun suun, nieli di wol a dem gweehn mash op. Kaaz wen di taim a get ata an ata, it mek it aada fi di animal dem, di chrii dem, an di ada sitn dem we de iina dem paak ya fi liv. Di wol iip a prablem dem soun laik som jojment we yu wuda riid bout iina di Baibl: faiya an flod, ais a melt, sii waata a raiz, an taim a get ata an ata.”—“Flooding Chaos in Yellowstone, a Sign of Crises to Come,” The New York Times, Juun 15, 2022.
Dem bad sitn ya we a mash op di ort, yu tingk dem a-go don we wid wan die? An uu yu tingk a-go mek dat apm? Mek wi luk pan wa di Baibl se.
Di Baibl did mek wi nuo se piipl a-go a du tingz fi mash op di ort
Di Baibl tel wi se Gad a-go “mash op di piipl dem we a mash op di ort.” (Revilieshan 11:18) A chrii tingz wi lorn fram da Baibl vors ya:
1. Piipl wudaana du wol iip a tingz we mash op di ort.
2. Wan taim a-go kom wen nobadi naa go mash op di ort agen.
3. A no piipl, a Gad a-go si tu it dat dem bad sitn de no mash op di ort.
No fret yuself. Di ort naa no we a go.
Di Baibl tel wi se ‘di ort a-go de ya fi eva.’ (Iikliiziyastiiz 1:4) Yu naa go eva av wan taim wen piipl naa go a liv pan di ort.
“Di piipl dem we du wa Gad se rait, a dem a-go de pan di ort, an liv pan it fi eva.”—Saam 37:29.
Di ort gweehn get bak gud agen.
“Di plies we ful op a bier bush an di lan we jrai bad, tingz a-go staat gruo de, aal som priti flowaz. An iina di dezot, flowaz a-go gruo an blasom de.”—Aizaiya 35:1.
You May Also Like
ESSENTIAL BIBLE TEACHINGS
Wa Mek Gad Mek Di Ort?
Uol iip a priti tingz de pan di ort. It de a di rait distant fram di son, it set pan wan anggl, an it naa spin tuu faas ar tuu sluo. Wa mek Gad did work so aad fi mek di ort so nais?
DI WACHTOWA
Wa Gad Kindom A-Go Du Fi Wi?
Wid aal a di bad sitn dem we a gwaan iina da worl ya, Jiizas did nuo se di onggl govament we kyan get rid a dem prablem de a Gad Kindom govament. Wa a som a di sitn dem we da govament de du aredi we mek wi nuo se wi kyan chos it?
