TIMEƔRI 10
Amek ara tɛeqleḍ ddin n ṣṣeḥ?
1. Yiwen kan n ddin n ṣṣeḥ i gellan?
“Ḥadret iman-nwen si lanbeyya n lekdeb!”—MATTA 7:15.
Ɛisa yesseḥfeḍ i inelmaden-is yiwen kan n ddin: ddin n ṣṣeḥ. Icuba-t ɣer webrid iţţawin ɣer tudert n dayem yerna ‘drus n wid i t-iţţafen.’ (Matta 7:14) Ṛebbi iqebbel kan ddin ireṣṣan ɣef Wawal-is, ideg i tella tideţ. Iqeddacen n ṣṣeḥ n Ṛebbi zdin (ddukklen) deg yiwen n liman.—Ɣer Yuḥenna 4:23, 24; 14:6; Ifasusiyen 4:4, 5.
Wali bidyu Eɛni Ṛebbi iqebbel ddyanat meṛṛa?
2. Acu i d-inna Ɛisa ɣef imasiḥiyen n lekdeb?
“Qqaren belli ssnen Illu, lameɛna nekṛen-t s lefɛayel-nsen.”—TITUS 1:16.
Ɛisa iɛeggen i inelmaden-is belli lanbeyya n lekdeb ad sluɣen ddin i sen-yesselmed. Lanbeyya-yagi n lekdeb ţbanen-d amzun d iqeddacen n ṣṣeḥ n Ṛebbi. Yerna, Timezdayin-nsen (Tijemmuyaɛ-nsen) sselmadent belli d nutenti i ţ-ţimasiḥiyin. Acu kan, imasiḥiyen-agi n lekdeb ţwaɛqalen. Ala ddin n ṣṣeḥ i geţţarran lɛibad d imasiḥiyen n ṣṣeḥ. Yerna nezmer a neɛqel imasiḥiyen n ṣṣeḥ s ṣṣifat-nsen akk-d lefɛayel-nsen.—Ɣer Matta 7:13-23.
3. Amek i tzemreḍ aţ-ţɛeqleḍ imasiḥiyen n ṣṣeḥ?
Atentan xemsa n limaṛat swayes i ţwaɛqalen:
-
Iqeddacen n ṣṣeḥ n Ṛebbi ţqadaren Adlis Iqedsen. Ɣur-sen, d Awal n Ṛebbi. Xeddmen ayen akk iwumi zemren akken ad tebɛen leqwanen-is. Ihi, ddin n ṣṣeḥ yemxallaf ɣef ddyanat i geţreṣṣin aselmed-nsent ɣef ixemmimen n yemdanen. (Matta 15:7-9) Iqeddacen n ṣṣeḥ n Ṛebbi ur xeddmen ara ayen ixulfen ɣef wayen i ţberriḥen.—Ɣer Yuḥenna 17:17; 2 Timutawus 3:16, 17.
-
Inelmaden n ṣṣeḥ n Ɛisa ţɛuzzun isem n Ṛebbi, Yahwa. Ɛisa iɛuzz isem n Ṛebbi mi t-id-yesbeggen i yemdanen akken a t-issinen. Iɛawen-iten ad issinen Ṛebbi yerna yesseḥfeḍ-asen amek ara ţẓallan akken ad yeţwaqeddes yisem-is. (Matta 6:9) Anwa ddin i gesskanayen i lɣaci isem n Ṛebbi deg wemḍiq anda i tzedɣeḍ?—Ɣer Yuḥenna 17:26; Iṛumaniyen 10:13, 14.
-
Imasiḥiyen n ṣṣeḥ ţbecciṛen Tagelda n Ṛebbi. Ṛebbi iceggeɛ-ed Ɛisa ɣer lqaɛa iwakken ad ibecceṛ lexbaṛ n lxiṛ n Tgelda. Ḥaca Tagelda-yagi i gellan d asirem i yemdanen. Ɛisa yehdeṛ fell-as almi d asmi yemmut. (Luqa 4:43; 8:1; 23:42, 43) Yenna-d belli ula d inelmaden-is ad berrḥen ɣef Tgelda-yagi. Yella wasmi i d-yerza fell-ak walbeɛḍ bac a k-d-yehdeṛ ɣef Tgelda n Ṛebbi? Ɛlaḥsab-ik, d acu-t ddin-ines?—Ɣer Matta 24:14.
-
Inelmaden n ṣṣeḥ n Ɛisa ur ţekkin ara di ddunit-agi tamcumt. Amek ara ten-tɛeqleḍ? Ur ţekkin ara di tsertit akk-d ccwal iḍerrun ger yemdanen d lḥukumat. (Yuḥenna 17:16; 18:36) Yerna, ur ttabaɛen ara ddunit-agi, ama di lɛeqliya-ines ama di leɛwayed-ines n diri.—Ɣer Yeɛqub 4:4.
-
Imasiḥiyen n ṣṣeḥ myeḥmalen mliḥ. Yeţɛawan-iten Wawal n Ṛebbi akken ad ḥefḍen amek ara ţqadaren lɛibad n tmura n ddunit meṛṛa. Ddyanat n lekdeb ggarent mliḥ iman-nsent di lgirrat yeţţenkaren di ddunit. Ma d wid yeţţeɛbaden s ṣṣeḥ Ṛebbi ur qebblen ara ad xedmen ayagi. (Mixa 4:1-3) Imasiḥiyen n ṣṣeḥ, nutni, ssexdamen bla cceḥḥa lweqt-nsen akk-d cci-nsen iwakken ad ɛiwnen w’ad sseǧhden wiyaḍ.—Ɣer Yuḥenna 13:34, 35; 1 Yuḥenna 4:20.
4. Ɛlaḥsab-ik, anwa i d ddin n ṣṣeḥ?
Anwa ddin i greṣṣan ɣef Wawal n Ṛebbi ayen akk i gesselmad? Anwa ddin i geţɛuzzun isem n Ṛebbi? Anwa ddin i geţberriḥen belli siwa Tagelda n Ṛebbi i gellan d asirem i yemdanen? Anwa ddin ideg ara tafeḍ iɛeggalen-is myeḥmalen s tideţ yerna ur ţekkin ara di lgirrat? D acu i teţxemmimeḍ kečč?—Ɣer 1 Yuḥenna 3:10-12.
