AḤRIC WIS 2
Ḥerzet zzwaǧ-nwen
“Ayen yesdukel [Ṛebbi], amdan ur t-iferreq ara!”—Marqus 10:9
Yahwa yefka-d lameṛ-agi: “Ur xeddɛet ara!” (Malaxi 2:16) Lameṛ-agi yesɛa azal abeɛda di zzwaǧ, axaṭer m’ur yeqqim ara wergaz d unṣiḥ i tmeṭṭut-is, neɣ tameṭṭut ţ-ţunṣiḥt i wergaz-is, ur yeţţili ara laman gar-asen. Ma ulac laman, ur teǧǧuǧǧug ara leḥmala-nsen.
Ass-a, nnṣaḥa ger wergaz ţ-ţmeṭṭut-is tezga teţţujeṛṛeb. Iwakken ihi aţ-ţḥerzem zzwaǧ-nwen, ilaq-awen aţ-ţṭebbqem snat n lewṣayat-agi i d-iţeddun.
1 ŢŢAKET AMKAN AMEZWARU I ZZWAǦ-NWEN
AYEN I D-IQQAR WEDLIS IQEDSEN: Issinet “amek ara textiṛem ayen ifazen.” (Ifilibiyen 1:10, Awal n tudert) Zzwaǧ-nwen d yiwet ger leḥwayeǧ akk ifazen di tudert-nwen. Ilaq a s-teţţakem amkan amezwaru.
Yahwa yebɣa aţ-ţeţxemmimeḍ ɣef tmeṭṭut-ik w’aţ-ţfarṣeḍ ddunit yid-es. (Amusnaw 9:9) Yessefham-ed belli ur ilaq ara maḍi aţ-ţestehzayeḍ deg-s, meɛna aţ-ţeţnadiḍ amek ara ţ-tessefṛḥeḍ. (1 Ikurintiyen 10:24) Xdem ayen ilaqen iwakken aţ-ţḥuss tmeṭṭut-ik belli teḥwaǧeḍ-ţ yerna tḥemmleḍ-ţ.
AYEN I TZEMREḌ AŢ-ŢXEDMEḌ:
-
Sɛedday daymen lweqt ţ-ţmeṭṭut-ik yerna ţţarra mliḥ ddehn-ik ɣur-es
-
M’ara teţxemmimeḍ, ţxemmim “nekni” mačči “nekkini”
2 ḤADER ƔEF WUL-IK
AYEN I D-IQQAR WEDLIS IQEDSEN: “Win ara imuqlen tameṭṭut, iḍmeɛ-iţ, izna yakan deg wul-is.” (Matta 5:28) Ma yella teţxemmimeḍ ɣef leḥwayeǧ icudden ɣer lɛaṛ, am wakken txedɛeḍ tameṭṭut-ik.
Yahwa yenna-d: “Ḥader ɣef wul-ik.” (Lemtul 4:23; Irmiya 17:9) Bac aţ-ţḥadreḍ ɣef wul-ik, ilaq aţ-ţɛasseḍ allen-ik. (Matta 5:29, 30) Tbeɛ lemtel n Yub i gefkan “lɛahd” i wallen-is iwakken ur yeţmuqul ara maḍi tameṭṭut s yir tamuɣli. (Yub 31:1) Qsed deg yiman-ik iwakken ur teţmuquleḍ ara yakk lɛaṛ s ţţeswiṛa, iwakken daɣen ur tɛeccqeḍ ara tayeḍ, siwa tameṭṭut-ik.
AYEN I TZEMREḌ AŢ-ŢXEDMEḌ:
-
Ssken-ed ɛinani i medden belli tcuddeḍ mliḥ ɣer tmeṭṭut-ik
-
Ţţak azal i wayen i teţḥussu tmeṭṭut-ik. Ɣef lemtel, ma twalaḍ belli tesɛiḍ kra n lɛalaqa ur s-neɛǧib ara, ḥbes din din lɛalaqa-yagi