MAKAWP SUMHPA | CHYUM LAIKA GRIN WA AI LAM
Tsam Nna Hten Mat Ai Lam N Nga Ai Sha Grin Nga Ai Chyum Laika
SHOIHPA NGA AI LAM: Chyum Laika ka ai ni, bai ka la ai ni gaw, tinggaw lap ni, shanhpyi ni hta ka ma ai. * (2 Timohti 4:13) Dai arai ni gaw, Chyum Laika matut grin nga na matu, hpa majaw shoihpa nga ai kun?
Tinggaw lap ni gaw, aloi sha je nna nsam ni galai shai chye ai, aten na na n hkam ai. “Tinggaw lap langai tsam mat jang lap lasa ni, nhpu ni sha ngam ai. Tinggaw lap laika katsu hpe zing da ai shaloi, mut wa chye ai, salu a majaw hten mat chye ai, ga kaw lup da yang mung, yu ni, latung shingtai ni sha kau chye ai” ngu, moi na Egutu laika dingsa ni, htung hking hpe sawk sagawn ai Ritchyat Pakisan hte Satibin Kwaki yan tsun ai. Tam mu wa ai tinggaw lap laika nkau hpe, nhtoi grai htoi ai shara, salu pru chye ai shara hta tawn jang alawan hten mat ai hpe chye lu ai.
Shanhpyi gaw, tinggaw lap laika hta na aten na na hkam tim, dai hpe kabai da na (sh) kahtet ai, salu pru ai, nhtoi grai htoi ai shara hta tawn da na nga yang, shanhpyi hten mat chye ai. * Shanhpyi hpe latung shingtai ni grai ra ai. Dai majaw, “moi na dingsa ai laili laika ni hpe n hten ai sha mu na matu gaw n loi ai” ngu laika buk langai (Everyday Writing in the Graeco-Roman East) hta tsun ai. Lama na, Chyum Laika she tsam nna hten mat jang, dai hta lawm ai shiga ni mung mat mat na re.
CHYUM LAIKA MATUT GRIN WA AI LAM: Yuda tara hte maren Hkawhkam shagu gaw, Chyum Laika a shawng na buk 5 re ai jep ai tara hpe shanhte nan “bai ka ra” ai. (Tara Jahprang 17:18, NW) Dai hta n-ga, Chyum Laika hpe bai ka ai ni gaw, lata hte ka ai laika law law hpe bai ka wa ai. Dai majaw, A.D. tsaban langai hta Chyum Laika hpe Israela mung ting, grai tsan ai Meksidonia hta nga ai tara jawng ni hta pyi mu lu ai. (Luka 4:16, 17; Kasa 17:11) Lata hte ka ai moi na laika dingsa nkau mi gaw, dai ni aten du hkra gara hku grin wa ai kun?
Panglai Si Laika Katsu Ni ngu masha law law chye da ai moi na lata hte ka da ai laika ni hpe hkun hkraw ai ginra ni a lungpu hku ni hta ga di bu ni hte zing da ai majaw, shaning tsa lam hku na hkra n hten ai
“Yuda ni gaw Chyum Laika katsu ni na na hkam na matu hka di bu, ga di bu ni hta zing da chye ai” ngu Ga Shaka Ningnnan hpaji du Hpilip Dabalu Kunhpawt tsun ai. Hkristan ni gaw dai htung hpe hkan wa ai. Dai majaw, lata hte ka ai moi na laika dingsa nkau mi hpe ga di bu ni, nhtoi shim ai shara ni, lungpu hku ni hta mu lu ai. Kalang lang hkun hkraw ai ginra ni hta mung mu lu ai.
AKYU LU AI LAM: Moi na lata hte ka ai Chyum Laika daw ni, hkying lam hku law hkra nga ai. Nkau gaw shaning 2,000 jan daram na sai. Dai zawn dingsa ai gara laika hpe mung, ndai daram ting lata hte ka wa ai lam n mu lu ai.
^ pang 3 Tinggaw lap hpe, hka kaw tu ai hpun langai kaw na lu ai. Shanhpyi gaw, dusat hpyi kaw na lu ai.
^ pang 5 Ga shadawn, Amerikan mungdan a shang lawt lam ndau shana laika hpe shanhpyi hta ka da ai. Shaning 250 daram na ai hpang, ya nga yang dai shanhpyi laika mut mat ai majaw hti na matu yak ai.
