Ĩĩ, nũndũ ũtethyo ũla mũseo vyũ wumaa kwa “Ngai, ũla ũkiakiasya, wĩkĩaa vinya, ũvuũũkasya na ũtanĩthasya ala makwʼĩte ngoo.”​—2 Akolintho 7:6, The Amplified Bible.

•   Nũmanengae vinya. Ngai ‘nũkũvuũũkasya na kũũtanĩthya,’ ti kwa kũũminĩa thĩna ũla wĩ nawʼo ĩndĩ kwa kũsũngĩa mboya syaku ĩla wamũvoya vinya wa kũmĩĩsya. (Avilivi 4:13) No wĩthĩwe na mũĩkĩĩo kana akasũngĩa mboya syaku nũndũ Mbivilia yaĩtye: “Yeova e vakuvĩ na ala matũlĩkĩte ngoo, na nũtangĩĩaa ala mekwĩlila vevanĩ.” (Savuli 34:18) Vate nzika, Yeova no amanye ĩla ũkwenda ũtethyo o na ĩla ũtatonya kũmũtavya mboyanĩ.​—Alomi 8:26, 27.

•   Kwĩsĩla ngelekanyʼo sya angĩ. Mũandĩki ũmwe wa Mbivilia avoyie: “Nĩ thĩnanĩ mũnene nĩngũkwĩkaĩla.” Mũandĩki ũũ wa Savuli nĩwakwataa vinya ĩla walilikana kana Ngai nũekeaa. Aisye: “Ethĩwa we Mwĩaĩi Ngai ũkatala mavĩtyo maitũ, nũũ ũla wĩvonoka? Ĩndĩ we nũtũekeaa, nĩ kana tũkũnenge ndaĩa.”​—Savuli 130:1, 3, 4, The Holy Bible in Current Kikamba Language.

•   Nũmanengae wĩkwatyo. O na eka kũtũnenga ũkiakisyo ũmũnthĩ, Ngai nũtwathĩte kana akamina mathĩna ala matumaa tũkwʼa ngoo. Ĩla ũkeanĩsya watho ũsu, “maũndũ ma mbee [ala nĩ vamwe na kũkwʼa ngoo] matikalilikanwa, o na matikalika kĩlilikanonĩ.”​—Isaia 65:17.

 Lilikana: O na kau Ngũsĩ sya Yeova nĩsyĩtĩkĩlĩte kana Ngai no aitetheesye, syo nimanthaa ũiiti ĩla syakwʼa ngoo mũno weethĩa nĩsyaĩle kwona ndakĩtalĩ. (Maliko 2:17) Ĩndĩ o na ũu wĩ o vo, vaiĩ ũiiti ũla tũtonya kwasya nĩwʼo mũseo. Na nũndũ wa kĩtumi kĩu, kĩla mũndũ nĩwe waĩle kwĩtwʼĩĩa ũiiti ũla ũkwona waĩle.