Nĩ Itumi Ilĩ Syĩva Ila Itumaa Ngai Ũtethukĩĩsya Mboya Imwe?
Ũndũ Mbivilia yaasya
Ve mboya imwe Ngai ũtethukĩĩasya. Kwasũanĩa maũndũ elĩ ala matonya kũtuma Ngai alea kwĩthukĩĩsya mboya.
1. Mboya ila itosanĩte na kwenda kwa Ngai
Ngai ndethukĩĩasya mboya ila itosanĩte na kwenda kwake o tondũ kwonanĩtwʼe Mbivilianĩ. (1 Yoana 5:14) Kwa ngelekanyʼo, Mbivilia yaĩtye tũikethĩwe na ĩtomo. Ũndũ ũmwe ũtumaa mũndũ ethĩwa na ĩtomo nĩ kũtha kalata. (1 Akolintho 6:9, 10) Kwoou Ngai ndesa kũsũngĩa mboya ethĩwa mũndũ avoya asinde kalata. Ngai ndethĩawa vo nĩ kana atwĩanĩĩsye kĩla wendi twĩ nawʼo. Ũndũ ũsu waĩle kũtuma tũtana nũndũ nĩvatonyeka tũkethĩwa na wia ĩũlũ wa kĩla ala angĩ meũvoya Ngai eke.—Yakovo 4:3.
2. Ethĩwa ũla ũkũvoya ndekaa kwenda kwa Ngai
Ngai ndethukĩĩasya mboya sya andũ ala mekaa maũndũ ala mamũthatasya na ngũlũ. Kwa ngelekanyʼo, ve andũ maasyaa mamũthaithaa Ngai ĩndĩ meekaa maũndũ mathũku. Ameie atĩĩ: “Yĩla mwĩvoya mboya mbingĩ, ndikethukĩĩsya: moko menyu nĩmausũĩte nthakame.” (Isaia 1:15) Ĩndĩ takethĩwa andũ asu nĩmeetĩkĩlile ‘kũsũanĩa vamwe’ na Ngai, ethĩwa eethukĩĩisye mboya syoo.—Isaia 1:18.