Ĩvindanĩ ya ũla thĩna mũnene, kũkeethĩwa na thĩna ũtaaĩthĩwa kuma nthĩ yoombwa. Kwosana na wathani wa Mbivilia, thĩna ũsu ũkeethĩwa “mĩthenyanĩ ya mũminũkĩlyo,” kana “ĩvinda ya mũminũkĩlyo” (2 Timotheo 3:1; Ndanieli 12:4) Ũsu nĩ ‘thĩna ũtaaĩthĩwa kuma mwambĩlĩlyo wa kũmbwa kwa syĩndũ ila Ngai wombie kũvika na yu, o na kũikethĩwa ũngĩ nongi.’​—Maliko 13:19; Ndanieli 12:1; Mathayo 24:21, 22.

Maũndũ ala makekĩka ĩvindanĩ ya ũla thĩna mũnene

•   Kwanangwa kwa ndĩni sya ũvũngũ. Ndĩni sya ũvũngũ ikaanangwa kwa ĩvinda ĩkuvĩ mũno. (Ũvuanʼyo 17:​1, 5; 18:​9, 10, 21) Mosumbĩ ma nthĩ ĩno ala mongamĩwe nĩ Ngwatanĩo ya Nthĩ (United Nations) nĩmo makananga ndĩni sya ũvũngũ maitũmĩwa nĩ Ngai kwĩanĩsya kwenda kwake.​—Ũvuanʼyo 17:​3, 15-​18. a

•   Kũvithũkĩwa kwa athaithi ma wʼo. Mbaĩ ikooka vamwe syĩ ngwatanĩo iyenda kũmina vyũ athaithi ma wʼo, na nĩsyo syĩtĩtwe woninĩ wa Esekieli ‘Ngoki wa nthĩ ya Makoki.’ Ĩndĩ Ngai akasũvĩa andũ make.​—Esekieli 38:​1,​2, 9-12, 18-​23.

•   Kũsilĩlwa kwa andũ ĩũlũ wa nthĩ. Yesũ akasilĩla andũ onthe na ‘kũmavathanyʼa aa na aya, tondũ mũĩthi ũvathanasya malondu na mbũi.’ (Mathayo 25:31-​33) Andũ makasilĩlwa kwosana na ũndũ mamekie “ana-a-asa” ma Yesũ, namo nĩ ala makasumbĩka vamwe nake ĩtunĩ.​—Mathayo 25:34-46.

•   Kũmbanwʼa kwa ala mesumbĩka Ũsumbĩnĩ wa Ngai. Aĩkĩĩku ala manyuvĩtwe mesumbĩka vamwe na Klĩsto makakwʼa na maithayũũkwʼa na mĩĩ ya veva mathi ĩtunĩ.​—Mathayo 24:31; 1 Akolintho 15:50-​53; 1 Athesalonika 4:​15-​17.

•   Ali–Maketoni. Ũũ nĩ ‘kaũ wa mũthenya mũnene wa Ngai, Mwene Vinya Wʼonthe’ na ĩngĩ wĩtawa “mũthenya wa Yeova.” (Ũvuanʼyo 16:14, 16; Isaia 13:9; 2 Vetelo 3:​12) Ala makasilĩlwa ta athũku nĩ Klĩsto makaanangwa. (Nzevania 1:​18; 2 Athesalonika 1:​6-​10) O na mosumbĩ onthe ma nthĩ ĩno ala Mbivilianĩ maelekanĩtwʼe na nyamũ yĩ mĩtwe mũonza makaanangwa.​—Ũvuanʼyo 19:19-​21.

Maũndũ ala makekĩka ĩtina wa ũla thĩna mũnene

•   Kwovwa kwa Satani na ndaimoni. Mũlaĩka wa Yeova akamwĩkya Satani na ndaimoni syake ĩimanĩ yĩte kĩtulu na ũu nĩ kwasya kana maikethĩwa matonya kwĩka ũndũ o na ũmwe. (Ũvuanʼyo 20:​1-3) Satani e ĩimanĩ yĩu, akeethĩwa nĩ ta mũvingĩe vandũ, na kwoou ndakethĩwa atonya kwasya andũ ĩũlũ wa nthĩ.​—Ũvuanʼyo 20:7.

•   Kwambĩĩa kwa Ũsumbĩki wa Myaka Ngili. Ũsumbĩki wa Myaka Ngili waambĩĩa, andũ makakwata moathimo maingĩ. (Ũvuanʼyo 5:​9, 10; 20:​4, 6) “Ĩkomano ĩnene” ya andũ “maumĩte thĩnanĩ ũla mũnene” makoona Ũsumbĩki wa Ngai wa Myaka Ngili ũyambĩĩa vaa ĩũlũ wa nthĩ.​—Ũvuanʼyo 7:​9, 14; Savuli 37:​9-​11.