Neanĩie kĩsionĩ kĩtaĩ na maũndũ maingĩ kĩtawa Tampere, nthĩ ya Finland. Andũ ma mũsyĩ witũ wʼonthe mayakwatĩĩaa mũno maũndũ ma ndĩni ĩndĩ maĩ vata na kĩsomo na mwĩkalĩle mũseo. Inyia wakwa aumĩte nthĩ ya Germany, na nĩ mũnini nĩnaendaa mavinda kwa mavinda ngalĩko ya West Germany kũla ũmau na sũsũ mekalaa.

 Kuma nĩ mũnini nĩnendete maũndũ ma mathaũ. Mwambĩĩonĩ nathaũkaa mĩthemba yonthe ya mathaũ ĩndĩ yĩla navikisye myaka 14, nĩnatwie kũthaũkaa tennis yĩ yoka. Ndivikya myaka 16, neekaa masoesi kelĩ kana katatũ kwa mũthenya. Naĩ na mũndũ wamanyĩasya kelĩ kwa mũthenya kũthaũka ĩthaũ yĩu na ĩndĩ ĩ ya mawĩoo ndyĩka masoesi nĩweka. Nendeeawʼa mũno nĩ ũndũ ĩthaũ yĩu yandetheeasya maũndũnĩ me kĩvathũkanyʼo. Kwa ngelekanyʼo, noonaa yĩindetheesya kũsũanĩa na kwaka mwĩĩ. O na kũtwʼĩka nĩnatanĩaa kũtindanyʼa na anyanyawa na kunywʼa mavinda kwa mavinda, vai mũthenya o na ũmwe naalika mathĩnanĩ nũndũ wa kũtũmĩa ũkĩ kana ndawa sya kũmila. Kũthaũka tennis nĩkwʼo kwaĩ kwa vata vyũ thayũnĩ wakwa.

 Nĩ na myaka 17, nĩnambĩĩe kũthaũka masindanonĩ manene ma ATP. a Ĩtina wa kũsinda mavinda meana ũna masindanonĩ asu, nĩnamanyĩkie nĩ andũ onthe nthĩ yitũ. Ndivikya myaka 22, naĩ ũmwe katĩ wa athaũki 50 ala meesĩ kũthaũka tennis nesa vyũ nthĩ yonthe.

 Kwa myaka mingĩ nĩnaendaa nthĩ syĩ kĩvathũkanyʼo kũthaũka tennis. Ĩvindanĩ yĩu nĩneeyoneie kũndũ kwingĩ kũseo na kwĩ kĩvathũkanyʼo, ĩndĩ nĩnamanyie mathĩna amwe mathĩnasya andũ nthĩ yonthe. Mathĩna asu nĩ ta ũtũli wa mĩao, kũtũmĩa ndawa sya kũmila, na ũndũ nthĩ na nzeve syanangĩtwe. Kwa ngelakanyʼo, twĩ Amelika ve isio o na tweeiwe tũikathi nũndũ syĩthĩawa na ũtũli mwingĩ wa mĩao. Maũndũ asu nĩmambĩkĩie nzika. Kũthũkya ũvoo nĩ kana o na kũtwʼĩka nĩnendete kĩla neekaa, ndyeewʼaa nĩ mwĩanĩe.

 Mwĩĩtu ũla twaĩ ndũũ, Sanna, nĩwambĩĩie kwĩmanyĩsya Mbivilia vamwe na Ngũsĩ sya Yeova. Nĩwanzengʼisye nũndũ ndyeesĩ kana e vata na maũndũ ma ndĩni, ĩndĩ ndyaamũsiĩĩa ndakemanyĩsye. Nĩtwatwaanie mwaka wa 1990 na mwaka ũla waatĩĩe avatiswa na atwĩka ũmwe wa Ngũsĩ sya Yeova. Ngalĩko ĩ yakwa, ndyakwatasya maũndũ ma ndĩni, ĩndĩ nĩneesĩ kana kwĩ Ngai. Nĩnalilikanile ũndũ sũsũ wakwa wa Germany wasomaa Mbivilia mũno, o na ũndũ wamanyĩisye kũvoya.

 Mũthenya ũmwe nĩ na Sanna nĩtwathokeie Kari na mũka ala maĩ Ngũsĩ. Kari , nĩwambonisye wathani ũmwe wĩ Mbivilianĩ ũkonetye ‘mĩthenya ya mũminũkĩlyo.’ (2 Timotheo 3:1-5) Ũndũ ũsu wanzaanĩisye mũno, nũndũ nĩnamanyie nĩkĩ maũndũ mathũkĩte ũu ĩũlũ wa nthĩ. Mũthenya ũsu tũyaaneenea maũndũ ma ndĩni mũno. Ĩndĩ kuma mũthyenya ũsu nĩnambĩĩie kũneenea maũndũ ma Mbivilia nĩ na Kari, na maũndũ onthe ala neemanyĩisye maĩ ma wʼo. Nũndũ ĩvinda yĩu naĩ na maũndũ maingĩ na nekalaa nĩendete, ndyaĩ laisi kũkwata mwanya wa kwonana kĩla ĩvinda, ĩndĩ Kari ndaakwʼa ngoo. Nĩwambandĩkĩaa valũa asũngĩĩte makũlyo ala namũkũlasya yĩla tũkwĩmanyĩsya. Mbivilia yaĩ na mosũngĩo ma makũlyo onthe ala makonetye thayũ. Kwoou kavola kwa kavola nĩnambĩĩie kũelewa ũndũ ũla mũnene Mbivilia ĩmanyĩasya, nawʼo nĩ kana, Ũsumbĩ wa Ngai ũkeanĩsya vyũ kĩeleelo kyake. Nĩneewie nakiitwa ngoo mũno yĩla namanyie syĩtwa ya Ngai, Yeova, na noona maũndũ ala ũtwĩkĩte. (Savuli 83:18) Ĩndĩ ũndũ ũla wangiitie ngoo mũno vyũ, nĩ ũndũ Yeova waumisye nthembo ya wovosyo. Ndaaĩka ũu aĩ nũndũ oona ũsu nowʼo ũndũ ũla waĩle, ĩndĩ eekie ũu nũndũ wa wendo. (Yoana 3:16) Nĩnamanyie kana o nakwa no nĩtwʼĩke mũnyanya wa Ngai na ndyĩsa kwĩkala tene na tene nthĩnĩ wa nthĩ nzaũ. (Yakovo 4:8) Nambĩĩie kwĩkũlya-ĩ, “Ndonya kũmũtũngĩa Ngai mũvea ata?”

 Nĩnasũanĩie kwa ũito ũndũ nekalaa. Nũndũ nĩneemanyĩĩtye Mbivilianĩ kana mũndũ atonya kwĩthĩwa na ũtanu wa wʼo kwa kũnengane, nĩneewʼaa ndyenda mũno kũtavya angĩ maũndũ ala neemanyĩĩtye. (Meko ma Atũmwa 20:35) Naĩ mũthaũki wa tennis, na kĩla mwaka nĩnaminaa mĩthenya 200 ũu nde mũsyĩ yĩla kwĩ masindano. Maũndũ onthe ala neekaa makonanĩtye na mathaũ nĩmo maĩ ma vata nthĩnĩ wa mũsyĩ witũ. Ĩndĩ yu nĩmamanyie kana nĩnaĩlĩte kwĩka moalyũku.

 Nĩneesĩ kana andũ aingĩ mayaĩ matonya kũelewa ũndũ maũndũ ma ndĩni matonya kũtuma nĩkola maũndũ ma mathaũ. Ĩndĩ mwanya ũla naĩ nawʼo wa kũmũmanya Yeova nesa na kwĩsa kũkwata thayũ wa tene na tene nĩwʼo waĩ wa vata mũno vyũ kũvĩtũka mũthĩnzĩo o na wĩva ũla nesaa kũkwata ndithaũka tennis. Kwoou kũmanya ũu kwatumie wĩthĩwa wĩ ũndũ wĩ laisi mũno kũtwʼa kĩla nendaa kwĩka. Natwie kwĩka ũndũ navangĩte ndekwĩthukĩĩsya kĩla andũ mekwasya. Ĩandĩko yĩla yandetheeisye kwĩka ũtwi ndeũthingʼĩĩwʼa nĩ andũ nĩ Savuli 118:6. Yaĩtye: “Yeova e ngalĩ yakwa; ndikakĩa: mũndũ atonya kũmbĩka ata?”

 Ĩvindanĩ o yĩu, andũ amwe ala maũngamĩaa ngalama sya athaũki nĩmangũlilye mambose ta mũthaũki wa kũĩvwa. Nesaa kũĩvwa mbesa mbingĩ itonya kũndetheesya nĩendeee na mathaũ ndeũthĩna. Ĩndĩ nũndũ naĩ neekie ũtwi, nĩnaleanile na ndeto syoo na mũthya nesa kuma masindanonĩ ma ATP. Nĩnaendeeie kwĩmanyĩsya Mbivilia, na kwĩ Matukũ 2, Mwei wa 7, 1994, nĩnavatisiwe na natwʼĩka ũmwe wa Ngũsĩ sya Yeova.

 Ngalĩ ĩ yakwa vai ũndũ mũthũku waangwata ũtonya kũtuma nĩsũanĩa ĩũlũ wa Ngai. O na ndyĩsa kwasya aĩ nĩnamanthaa ũwʼo. Neewʼaa maũndũ makwa me o maseo na vai kĩndũ kĩngĩ nendaa thayũnĩ. Ĩndĩ o na ndataĩĩe nĩnesie kũmanya kana ve kĩtumi kya kwĩthĩwa thayũ, na kuma ĩvinda yĩu nĩendeee nesa vyũ o na kũvĩtũka ũndũ nasũanĩaa. Noonie ũwʼo wa Mbivilia ta weeteele nĩũmanye. Yu mũsyĩ witũ wĩ ngwatanĩo vyũ o na kũvĩtũka ĩvinda o na yĩva. Na nĩ na ũtanu mũnene nũndũ imwana syakwa itatũ nĩsyaatĩĩie ngelekanyʼo yakwa. Ti ngelekanyʼo ya kwenda mathaũ ĩndĩ nĩ kũtwʼĩka Aklĩsto.

 O nayu no nĩtanĩaa kũthaũka tennis. Kwa myaka yĩana ũna nĩnĩthĩĩtwe ndimanthĩa andũ makwa kwa kũthũkũma wĩa ũkonanĩtye na ĩthaũ yĩu. Kwa ngelekanyʼo, nĩnĩthĩĩtwe nĩ mũũngamĩi wa kĩwanza kĩmwe kya tennis na nĩnĩmanyĩasya athaũki. Ĩndĩ mathaũ ti mo ma vata mũno thayũnĩ wakwa. Mbeenĩ nĩnatũmĩaa masaa maingĩ kĩla kyumwa ndyĩka masoesi nĩtwʼĩke mũthaũki mũseo vyũ wa tennis. Yu nĩ mũtavanyʼa wa ĩvinda yonthe na nĩndanĩaa kũtũmĩa ĩvinda yakwa kũtetheesya angĩ maelewe na maitũmĩa myolooto ya Mbivilia, ĩla yavĩndũie mwĩkalĩle wakwa. Nĩnĩkwatĩte ũtanu mwingĩ nũndũ maũndũ ala ma vata vyũ thayũnĩ wakwa nĩ ngwatanĩo yakwa na Yeova Ngai, na kũtetheesya andũ angĩ methĩwe na wĩkwatyo wa ĩvinda yũkĩte nĩ.—1 Timotheo 6:19.