Mbivilia nĩyathanie kana mĩthenyanĩ yitũ kũkeethĩwa na makaũ, ithingitho sya nthĩ, mowau ma kũkwatanwʼa, na “maũndũ [angĩ] ma kũtelemya.” (Luka 21:10, 11) Wathani ũsu nũnaendeeie kwĩanĩa mwakanĩ wa ũthũkũmi wa 2022. a Kwa ngelekanyʼo, kaũ ũla wĩ Ukraine nũnaendeeie na watuma andũ milioni mbingĩ makwata wasyo. Ĩvindanĩ o yĩu, isio mbingĩ ĩũlũ wa nthĩ, ninaendeee kũkitana na ũwau wa COVID-19. Kwongela kĩu, andũ aingĩ nĩmanakwatie wasyo nũndũ wa mĩisyo ta ithingitho ila ineethĩiwe Haiti, na iuutani syĩ vinya ila syakimie Central America, Philippines, na ngalĩko ya ĩtheo ya Africa welekele wumĩlonĩ wa syũa. Ngũsĩ sya Yeova ineekie ata nĩ kana itetheesye ala manakwatie wasyo?

 Mwakanĩ wa ũthũkũmi wa 2022, ũseũvyo witũ nũnanenganie ũtethyo kwa andũ ala manakwatie wasyo kumana na mĩisyo ta 200! Wongelanyʼa, tũnatũmĩie vakuvĩ ndola milioni 12 kũnengane ũtethyo. b Sisya wone ũndũ mĩvothi yatũmĩiwe kũtetheesya ala makwatie wasyo kumana na mĩisyo ĩlĩ yĩ kĩvathũkanyʼo.

 Twĩ Matukũ 14, Mwei wa 8, 2021, kĩthingitho kya nthĩ kĩ na ũito wa 7.2 nĩkyeethĩiwe ngalĩko ya ĩtheo ya Haiti. Ũndũ wa kũmakya nĩ kana, eĩtu-a-asa maitũ elĩ na mwana-a-asa ũmwe nĩmakwie. Ala mavonokie kĩthingitho kĩu yaĩ no nginya momĩanĩsye na woo wa ngoonĩ, na wasyo ũla makwatie. Mwana-a-asa wĩtawa Stephane aĩtye: “Taoninĩ ĩsu yonthe ve andũ aingĩ mũno makwie, kwoou veethĩawa na mathiko meana ũna kĩla kyumwa kwa ĩvinda ya myei mbee wa ĩlĩ.” Nake mwana-a-asa ũngĩ wĩtawa Éliézer aĩtye: “Ngũsĩ mbingĩ iyaĩ na vandũ va kwĩkala, ngũa, iatũ, o na syĩndũ ingĩ sya vata ila syendaa. Kwa myei mingĩ, andũ aingĩ nĩmekalile na wia nũndũ wa ithingitho ingĩ ila syaatĩĩie ĩtina wa kĩu.”

 Ũseũvyo witũ nĩwoosie ĩtambya na mĩtũkĩ nĩ kana ũtetheesye ala makwatie wasyo. Ovisi wa ũvonge wa Haiti nĩwanenganie tani mbee wa 53 sya lĩu, maeema, syandalũa, mĩto, vamwe na solar sya kwĩkĩa simũ mwaki. Kwongela ũu, mwakanĩ wa ũthũkũmi wa 2022, mĩsyĩ mbee wa 100 nĩnaakiwe ĩngĩ, kana yatũngĩĩwa. Ndola mbee wa milioni ĩmwe nĩsyatũmĩiwe kũnengane ũtethyo.

 Ana-a-asa na eĩtu-a-asa maitũ nĩmatũngaa mũvea mwingĩ mũno. Lorette aĩtye: “Kĩthingitho kĩu nĩkyaanangie vyũ nyũmba yitũ, vamwe na viasala witũ. O na tũyaĩ na kĩndũ kya kũya. Ĩndĩ ũseũvyo wa Yeova nĩwatũtetheeisye kwa kũtũnenga kyonthe kĩla twaĩ na vata nakyo.” Nake Micheline aĩtye: “Kĩthingitho kĩu nĩkyaanangie vala nekalaa nĩ na imwana syakwa ilĩ. Ndyeesĩ ũndũ ndonya kwĩka ate o kũvoya nĩkwate ũtethyo, na Yeova nĩwasũngĩie mboya ĩsu kwĩsĩla ũseũvyo wake. Yu twĩkalaa nyũmba mbake nesa na ndũmu. Nĩnĩtwʼĩte vyũ kwĩka kyonthe kĩla ndonya nĩ kana nĩmũtũngĩae Yeova mũvea.”

 Anene ma kĩsio kĩu nĩmoonie kĩthito kĩla twaĩ nakyo kya kũnengane ũtethyo. Mũnene ũmwe taoninĩ ya L’Asile aisye: “Nĩngũmũtũngĩa mũvea mũno nũndũ nĩmwookie na mĩtũkĩ kũnengane ũtethyo. Nĩmũkatha nũndũ nĩmwonasya anene ma taoni ĩno ndaĩa nene mũno. Nĩ na ũtanu kwona kana inywʼĩ mũitethasya wĩa ũũ nĩ kana mũkwate mbesa. Vandũ va ũu mwĩthĩawa mũyenda kũtetheesya andũ. Na mwĩkaa ũu nũndũ nĩmwendete andũ.”

 Twĩ Matukũ 24, Mwei wa 1, 2022, kĩuutani kĩnene kĩtawa Ana nĩkyakũnie nthĩ ya Mozambique, na ĩndĩ kyeelekela ngalĩko ya ũthũĩlonĩ wa syũa nginya Malawi. Kĩuutani kĩu nĩkyatumie kwĩthĩwa na mbua mbingĩ na iseve syĩ na vinya ila syauutanaa mũendo wa kĩlomita 100 kwa ĩsaa. Nĩkyaanangie waya sya sitima, iaao, na kyatuma kwĩthĩwa na mbua ya kĩwʼũ kingĩ.

 Ngũsĩ mbee wa 30,000 kuma nthĩ ya Malawi na Mozambique nĩsyakwatie wasyo kumana na kĩuutani kĩu. Mwana-a-asa ũmwe wĩtawa Charles, ũla watetheeasya kũnengane ũtethyo, aĩtye: “Yĩla noonie ũndũ ana-a-asa mathĩnaa na wasyo mũnene ũla makwatie, neewie woo mwingĩ mũno nũndũ ndyaĩ nĩtethya.” Na kũthũkya ũvoo nĩ kana, lĩu mũnini ũla maĩ nawʼo na syĩndũ ila mavandĩte mũũndanĩ nĩsyakuiwe nĩ kĩwʼũ. Na mĩsyĩ ya aingĩ nĩyaanangĩkie. Ũndũ wa kũmakya nĩ kana, mwana-a-asa ũmwe nĩwakwʼĩĩwe nĩ mũka na twĩlĩtu twake twĩlĩ, ĩtina wa kasiwa kala malikĩte kũkulumana kĩwʼũnĩ.

 Kĩuutani kĩu kyaĩ kya kũtelemya mũno. Twĩ saa mũonza sya ũtukũ taoninĩ ya Nchalo, ĩla yĩ Malawi, mũsyĩ wa Sengeredo nĩweewie wasya wa kũtelemya wa kĩwʼũ kĩsembete. Mbũsĩ ilĩ syaĩ inatũla! Mwana-a-asa Sengeredo nĩwoonie ve vata wa kuma nyũmba na mĩtũkĩ. Na ũsu waĩ ũtwi wa ũĩ nũndũ ĩtina wa ĩvinda ĩkuvĩ, nyũmba yoo nĩyavalũkilwʼe nĩ kĩwʼũ kĩu kingĩ. Syĩndũ syoo nĩsyaanangiwe na ingĩ syakuwa nĩ kĩwʼũ. Mũsyĩ ũsu nĩwatwie kũthi Nyũmbanĩ ya Ũsumbĩ, ĩla nĩ mũendo wa ndatĩka 30 kuma mũsyĩ kwoo. Ĩndĩ ĩvindanĩ yĩĩ, makuie masaa elĩ kũvika vau. Mavikie me auĩĩe makakola ki, ĩndĩ mayaĩ na ũũmĩsye.

 Ovisi wa ũvonge wa Malawi na wa Mozambique nĩwambĩĩie kũnengane ũtethyo na mĩtũkĩ. Nĩmatũmie asyaĩĩsya ma mũthyũlũlũko na atumĩa, nĩ kana mamanye kĩla ana-a-asa na eĩtu-a-asa ala makwatĩte wasyo maĩ na vata nakyo na maimekĩa vinya. Kamitii siana ũna sya kũnengane ũtethyo ĩvinda ya mũisyo nĩsyanengiwe wĩa wa kũũngamĩa kũnengane ũtethyo, na vau kwa vau syambĩĩa kũtetheesya ana-a-asa makwate lĩu na syĩndũ ingĩ ila maĩ na vata nasyo. Ndola mbee wa 33,000 nĩsyatũmĩiwe kũtetheesya andũ ala makwatie wasyo, na ingĩ mbee wa 300,000 syatũmĩwa kũtũngĩĩa na kwaka ĩngĩ mĩsyĩ ĩla yaanangĩkie.

 Kamitii isu nĩsyatũmĩie mbesa ila syavathĩtwe kwa ũĩ, na ũsu waĩ ũndũ wa vata mũno nũndũ thooa wa syĩndũ waĩ mwongeleku. Kwa ngelekanyʼo, myeinĩ mũonza ya mbee ya kũnengane ũtethyo, thooa wa mũtu wa mbemba, lĩu ũla ũtũmĩkaa mũno Malawi, nĩwongelekile kwa kĩlungu kya 70 ĩũlũ wa 100. O nawʼo thooa wa mauta ma ngalĩ nĩwongelekile. Nĩ kana masũvĩe mbesa ila syavathĩtwe, ana-a-asa nĩmathooie lĩu na syĩndũ sya mwako o kũu maĩ na kwa wingĩ vandũ va kũthooa kaindo kamwe kamwe. Kwoou nĩmaolawa mbesa maithooa syĩndũ na matũmĩie mbesa nini kũikuĩthya.

 Wĩa wa kũnengane ũtethyo nĩwakiitie ngoo sya andũ ma Yeova. Mwana-a-asa wa Mozambique wĩtawa Felisberto aĩtye: “Ndyaaona ũseũvyo ũngĩ ũnenganae syĩndũ singĩvĩte ũu ta syĩndũ sya mwako, ngalĩ sya kũkua syĩndũ, mavundi ma mwako, lĩu, na ũtao kwa nzĩa ya wendo. Ũtethyo ũũ waĩ ngelekanyʼo nzeo mũno ya wendo wa ana-a-asa ũla Yesũ waeleisye ĩvukunĩ ya Yoana 13:34, 35.” Nake mwĩĩtu-a-asa ndiwa wĩtawa Ester kuma Malawi, ũla mũsyĩ wake waanangiwe aĩtye: ”Neewʼaa nde na wĩkwatyo nũndũ naĩ na tũvesa tũnini tũtesa kwaka nyũmba ĩngĩ. Kwoou yĩla ana-a-asa mookie na mambakĩa nyũmba ĩngĩ, mwa neewie ta navika Valatiso.”

 O ũndũ tũthengeee nthĩ nzaũ ĩla twathĩtwe, twĩĩkwatya kwona mĩisyo mingangĩ. (Mathayo 24:7, 8) Ĩndĩ o na vailye ũu, nĩtwĩsĩ kana nũndũ wa mĩvothi yenyu ya kuma ngoonĩ, andũ ma Yeova nĩmekũendeea kũkwata ũtethyo ũla me na vata nawʼo. Nzĩa sya kumya mĩvothi ieleetwʼe nthĩnĩ wa donate.dan124.com. Nĩ mũvea nũndũ wa ũlau waku.