“Nĩ na Sophia * twatwaanĩte vandũ va myaka mbee wa 39, yĩla wakwie ĩtina wa kũvinyĩĩwa nĩ ũwau kwa ĩvinda ĩasa. Anyanyawa nĩmandethisye mũno, na o nakwa naĩ na maũndũ maingĩ ma kwĩka. Ĩndĩ vandũ va mwaka mũima, neew’aa nĩ na woo mwingĩ mũno. Mavinda amwe neethĩawa nĩ kavaa, ĩndĩ mavindanĩ angĩ maũndũ maithũkĩĩa vyũ. O na yu, o na kau myaka vakuvĩ ĩtatũ nĩ mĩthelu kuma akw’a, nĩnĩsaa kũkwatwa nĩ woo mwingĩ ngoonĩ, na kaingĩ ũngwataa ndataĩĩe.”—Kostas.

We waakw’ĩĩwa nĩ mũndũ wendete? Ethĩwa ũu nĩw’o vailye, nũtonya kwĩthĩwa wĩw’aa ũndũ Kostas weew’aa. Kũkw’ĩĩwa nĩ ũla ũtwaanĩte nake, mũndũ wa mũsyĩ, kana mũnyanya, nĩ ũmwe katĩ wa maũndũ ala matumaa mũndũ ethĩwa na kyeva kingĩ. Ala mekaa ũkunĩkĩli ĩũlũ wa kyeva kĩla kĩkwataa mũndũ yĩla wakw’ĩĩwa, nĩmetĩkĩlanĩte na ũndũ ũsu. Ũvoo ũmwe watumbĩthiw’e nthĩnĩ wa The American Journal of Psychiatry waĩtye atĩĩ: “Kĩkw’ũ nĩkyo ũndũ ũla mũnene ũtumaa mũndũ ew’a ta waasya mwendwa wake tene na tene, na ayĩw’a akwata wasyo mũnene.” Nũndũ wa woo mwingĩ ũla umanaa na kũkw’ĩĩwa, mũndũ nũtonya kwĩkũlya atĩĩ: ‘Nĩendeea kwĩw’a ũu nginya ĩndĩĩ? Yo ngeethĩwa nĩ mũtanu ĩngĩ? Ndonya kũtetheka ata?’

Mosũngĩo ma makũlyo asu me nthĩnĩ wa ĩkaseti yĩĩ ya Amkeni! Kĩlungu kĩla kĩatĩĩe kĩneeneete maũndũ amwe matonya kũũkwata ethĩwa nũnakw’ĩĩwe o mĩtũkĩ. Nasyo ilungu ingĩ ila iatĩĩe niũneenea nzĩa imwe itonya kũũtetheesya kũolanga kyeva kya kũkw’ĩĩwa.

Twĩĩkwatya kana ũvoo ũsu nũũkiakisya na ũitetheesya onthe ala maendeee kũmĩanĩsya na kyeva.