We Ngai Nũũ?
Andũ aingĩ maasya kana nĩmamũĩkĩĩaa Ngai. Ĩndĩ ũkamakũlya Ngai nũũ, masũngĩa mosũngĩo me kĩvathũkany’o. Amwe maasya kana Ngai nĩ mũsili mũthũku na wendete kũsilĩla andũ nũndũ wa meko moo mathũku. Andũ angĩ maasya kana Ngai nĩwendete andũ na nũmaekeaa o na meeka maũndũ mathũkĩte ata. Namo angĩ maĩkĩĩaa kana Ngai e vaasa mũno na ndatwendete. Nũndũ wa mawoni asu me kĩvathũkany’o, andũ aingĩ nĩmatonya kũsũanĩa kana vaitonyeka kũmanya Ngai nũũ.
Yo ve vata wa kũmũmanya Ngai? Ĩĩ ve vata. Kũmũmanya Ngai nesa no kũtume tũmanya nĩkĩ twĩ thayũ na ũu ũituma twĩkala thayũ mũseo. (Meko ma Atũmwa 17:26-28) O ũndũ waendeea kũmũthengeea Ngai now’o nake ũendeeaa kũkwenda na kũũtetheesya. (Yakovo 4:8) O na ĩngĩ, kwĩthĩwa na ũmanyi wa w’o ĩũlũ wa Ngai no kũtume wĩsa kũkwata thayũ ũtathela.—Yoana 17:3.
Ũndũ ũtonya kũmũmanya Ngai. Kwa ngelekany’o, kwasũanĩa ĩũlũ wa mũndũ wĩsĩ nesa, ta mũndũ mwĩ ndũũ vyũ. Mwatumie ndũũ ata? Nĩvatonyeka ũkethĩwa wamanyie ĩsyĩtwa yake, ndaĩa syake, maũndũ ala wendete na ala ũtendete, o vamwe na maũndũ ala wĩkĩte na ala ũvangĩte kwĩka, na maũndũ angĩ maingĩ. Kũmũmanya nesa nĩkw’o kwatumie mwĩthĩwa na ndũũ ngamu.
O naitũ no tũmũmanye Ngai twamanya mosũngĩo ma maũndũ aa maatĩĩe:
Ĩkaseti yĩĩ nĩyĩũkũtetheesya ũkwate mosũngĩo ma makũlyo asu. Ilungu ila iatĩĩe nĩsiũkũtetheesya ũmanye Ngai nũũ, na ũmanye ũndũ ũkatetheka weethĩwa na ngwatanĩo nzeo nake.
No Wendeewʼe Nĩ Ii
MŨSYAĨĨSYA
Nĩvatonyeka Tũkamũmanya Ngai?
Maũndũ ala tũtatonya kũelewa ĩũlũ wa Ngai no matũtetheesye tũkamũthengeea.
