ŨENDEEE kũmũsyokea Yeova, ĩthĩwa na mũĩkĩĩo vyũ kana nũkũũtetheesya. Akaũtetheesya ũmine mawĩmakĩo, ũeke kwĩthĩwa na woo ngoonĩ, na ũikwata mũuo wa kĩlĩko na wa ngoo, ũla mũndũ ũkwataa ĩtina wa kwĩthĩwa na wasya mũtheu wa ngoo. Na ĩndĩ nũtonya kwĩw’a wakwata vinya wa kũmũthũkũma Yeova ĩngĩ wĩ vamwe na athaithi make. Ũndũ ũsu ũkeethĩwa ũvw’anene na wa Aklĩsto ma ĩvinda ya tene ala mũtũmwa Vetelo wamaandĩkĩie atĩĩ: “Mwaendaa mwaĩte ta malondu; ĩndĩ yu nĩmũmũsyokee Mũĩthi na Mũsyaĩĩsya wa ngoo syenyu.”—1 Vetelo 2:25.

Kũmũsyokea Yeova nĩw’o ũndũ ũla mũseo vyũ ũtonya kwĩka. Nĩkĩ tũkwasya ũu? Kĩtumi nũndũ ũkatanĩthya ngoo ya Yeova. (Nthimo 27:11) Nĩtwĩsĩ nesa kana meko maitũ no mamũtanĩthye Yeova kana makamũthatya. Vate nzika, Yeova ndatũlasimĩthasya tũmwende na kũmũthũkũma. (Kũtũngĩlĩlwa Kwa Mĩao 30:19, 20) Mũsomi ũmwe wa Mbivilia aisye atĩĩ: “No nginya ũvingũe ngoo yaku nũndũ vai mũndũ ũtonya kũmĩvingũa.” No tũnyuve kũvingũa ngoo yitũ kwa kũmũthaitha Yeova kuma ngoonĩ nũndũ nĩtũmwendete. Tweeka ũu, twĩthĩawa twamũnenga Yeova mũthĩnzĩo wa vata mũno, naw’o nĩ ũĩkĩĩku witũ kwake, na nĩtũtanĩthasya ngoo yake mũno. Ũw’o nĩ kana vai ũndũ ũtonya kwĩanana na ũtanu ũla tũkwataa nũndũ wa kũmũthaitha Yeova ũndũ we wendaa.—Meko ma Atũmwa 20:35; Ũvuan’yo 4:11.

O na ĩngĩ, ĩla wĩmũsyokea Yeova, wendi waku wa kwĩthĩwa na ngwatanĩo nzeo vamwe nake ũkeanĩw’a. (Mathayo 5:3) Kwa nzĩa yĩva? Andũ aingĩ ĩũlũ wa nthĩ mekũlasya, ‘Nĩkĩ twĩ thayũ?’ Nĩmethĩawa na mea ma kũmanya kĩeleelo kya thayũ. Andũ methĩawa na wendi ũsu nũndũ moombiwe naw’o. Twoombiwe kwa nzĩa tũtonya kwĩthĩwa twĩ eanĩe ĩla tũũmũthũkũma Yeova. Vai ũndũ ũngĩ ũtonya kũtuma twĩw’a twĩ eanĩe, kwĩ ũndũ twĩw’aa ĩla twamũthaitha Yeova nũndũ nĩ tũmwendete.—Savuli 63:1-5.

Mwa, manya kana Yeova nũkwenda ũmũsyokee! Nĩkĩ waĩle kũĩkĩĩa ndeto isu? Kwasũanĩa ũndũ ũũ: Ũvoo ũla wĩ mbulosuanĩ ĩno waandĩkiwe ĩtina wa kũvoya mũno. Nokwĩthĩwa ũnaeteiwe mbulosua ĩno nĩ mũtumĩa wa kĩkundi kana Mũklĩsto o ũngĩ. Na ĩndĩ wendeew’a nĩ kũmĩsoma na kwĩka ũndũ yaĩtye. Maũndũ asu onthe mekũĩkĩĩthya kana Yeova ndaaũlwa nue. Ĩndĩ aendeee na ũkũkusya aũsũvĩĩte nĩ kana ũmũsyokee.—Yoana 6:44.

No tũkwate ũkiakisyo twamanya kana Yeova ndesa kũlwa nĩ athũkũmi make ala maaie. Ũu nĩw’o mwĩĩtu-a-asa wĩtawa Donna wesie kũmanya. Aisye atĩĩ: “Naĩ natiie ũw’o, ĩndĩ mavinda maingĩ nĩnasũanĩaa ĩũlũ wa ĩandĩko ya Savuli 139:23, 24, yĩla yaĩtye: ‘Nthiana, ame Ngai, na manya ngoo yakwa: Ndata, na manya mosũanĩo makwa; noisisya ethĩwa ve nzĩa nthũku nthĩnĩ wakwa, noindongoesya nzĩanĩ ya tene na tene.’ Nĩneesĩ kana ndyaĩ wa nthĩ, na vandũ vala vaseo naaĩle kwĩthĩwa nĩĩ, nĩ kĩkundinĩ kya andũ ma Yeova. Nĩnambĩĩie kwona kana Yeova ndaĩ aaĩsa kũndia, ĩndĩ ninyie naaĩle kũmũsyokea. Na nĩ na ũtanu mũno nũndũ nĩnamũsyokeie!”

Twĩkũvoyea mũno kuma ngoonĩ wĩthĩwe ĩngĩ na “ũtanu wa Yeova.” (Neemia 8:10) Ndũkesa kwĩlila nongi wamũsyokea Yeova.