ĨSOMO YA 42
Mũtwaano na Mũndũ Kwĩkala Atatwaanĩte Kana Ate Mũtwae
Kwĩ kũndũ kũmwe andũ maĩkĩĩa kana mũndũ ndesa kwĩkala e mũtanu atatwaanĩte kana ate mũtwae. Ĩndĩ o na vailye ũu, ti onthe ala me mũtwaanonĩ methĩawa me atanu na ti onthe ala matatwaanĩte kana mate atwae methĩawa mate atanu. Ũwʼo nĩ kana, Mbivilia yaĩtye kana mũtwaano, na mũndũ kwĩkala atatwaanĩte kana ate mũtwae, yonthe nĩ mĩthĩnzĩo kuma kwa Yeova.
1. Ve moseo meva ma mũndũ kwĩkala atatwaanĩte kana ate mũtwae?
Mbivilia yaĩtye atĩĩ: “Mũndũ o na wĩva ũla watwaana ethĩawa eeka nesa, ĩndĩ mũndũ o na wĩva ũla wekala atatwaanĩte ethĩawa eeka nesanga.” (Soma 1 Akolintho 7:32, 33, 38.) Nĩ kwa nzĩa syĩva mũndũ ũtatwaanĩte kana ũte mũtwae ũtonya ‘kwĩka nesanga’? Aklĩsto ala matwaanĩte methĩawa mayendeka mathĩnĩkĩe mavata ma ũla matwaanĩte nake. Ĩndĩ ala matatwaanĩte kana mate atwae, mayĩthĩawa na vata wa kwĩka ũu. Kwoou, nĩmethĩawa na ũthasyo mwingangĩ. Kwa ngelekanyʼo, amwe nĩmethĩawa matonya kwongelanga ũthũkũmi woo kwa nzĩa sya kwendeesya, ta kũthi isionĩ ingĩ makatavanyʼe ũvoo mũseo. O na eka ũu, nĩmethĩawa na ĩvinda yingangĩ ya kwĩka maũndũ matonya kũmatetheesya kũmũthengeea Yeova.
2. Kwĩthĩwa mũndũ atwaanĩte kwosana na mĩao kwĩ ũseo mwaũ?
O tondũ kwĩthĩawa kwa ala matatwaanĩte kana mate atwae, o nawʼo mũtwaano wĩ moseo mawʼo. Mbivilia yaĩtye kana “elĩ me kavaa kwĩ ũmwe.” (Mũtavanʼya 4:9) Ũu nĩ wʼo, na mũno mũno kwa Aklĩsto ala maatĩĩaa myolooto ya Mbivilia mũtwaanonĩ woo. Mũndũũme na mũndũ mũka ala matwaana kwosana na mĩao nĩmethĩawa matwʼĩte kwendana, kũnengane ndaĩa, na kũthĩnĩkĩanaa. Na nũndũ wa ũu, mewʼaa me eanĩe mũnango kwĩ mũndũũme na mũndũ mũka ala mekĩte o kwĩkalanyʼa. Na mũtwaano wa mũthemba ũsu wĩthĩawa wĩ mũsingi mũseo wa kũeea syana.
3. Yeova onaa mũtwaano ata?
Yĩla Yeova wambĩlĩĩilye mũtwaano wa mbee aisye atĩĩ: “Mũndũ mũũme akatia ĩthe na nyinyia, na akalũmanʼya na mũka wake.” (Mwambĩlĩlyo 2:24) Yeova endaa mũndũũme na mũndũ mũka ala matwaanĩte mendane na mailũmanyʼa ĩvinda yonthe yĩla me thayũ. Nĩwĩtĩkĩlĩtye kũthasya mũtwaano o yĩla ũmwe weeka ũlaalai. Yĩla ũu weethĩwa, Yeova nũnengete ũla ũvĩtĩwʼe ũthasyo wa kũnyuva ethĩwa nũkũthasya mũtwaano. a (Mathayo 19:9) O na ĩngĩ Yeova ndetĩkĩlĩtye Mũklĩsto ethĩwe na iveti mbingĩ kana aũme aingĩ.—1 Timotheo 3:2.
ĨMANYĨSYE MŨNANGO
Ĩmanyĩsye wone ũndũ ũtonya kwĩkala wĩ mũtanu na ũimũtanĩthya Yeova, wĩthĩwe wĩ mũtwaanonĩ, ndũtwaanĩte, kana ndwĩ mũtwae.
4. Tũmĩa nesa mũthĩnzĩo wa kwĩthĩwa ũtatwaanĩte kana ũte mũtwae
Yesũ oonaa mũndũ kwĩthĩwa atatwaanĩte kana ate mũtwae ne mũthĩnzĩo. (Mathayo 19:11, 12) Somai Mathayo 4:23, na ĩndĩ mũineenea ĩkũlyo yĩĩ:
-
Yesũ atũmĩie ata mũthĩnzĩo wa kwĩthĩwa atatwaanĩte kũmũthũkũma Ĩthe wake na kũtetheesya ala angĩ?
O ta Yesũ, Aklĩsto ala matatwaanĩte kana mate atwae no matũmĩe mũthĩnzĩo ũsu nesa. Ĩloelei VITIO, na ĩndĩ mũineenea ĩkũlyo yĩla yĩatĩĩe.
-
Aklĩsto ala matatwaanĩte kana mate atwae matonya kũtũmĩa mũthĩnzĩo ũsu kwa nzĩa syĩva?
We nĩwĩsĩ?
Mbivilia ndĩwetete myaka ĩla mũndũ waĩle kũtwaana kana kũtwawa. Ĩndĩ o na ũu wĩ o vo, nĩthuthĩtye mũndũ eteele nginya avĩtũke “myaka ya ũika,” ĩvinda yĩla wendi mwingĩ wa kũmanyana kĩ-mwĩĩ ũtonya kũtuma mũndũ wa mũika eka ũtwi ũte mũseo.—1 Akolintho 7:36.
5. Nyuva nesa mũndũ wa kũtwaana nake
Kũnyuva mũndũ wa kũtwaana nake nĩ ũmwe katĩ wa motwi ala ma vata vyũ ũtonya kwĩsa kwĩka thayũnĩ waku. Somai Mathayo 19:4-6, 9, na ĩndĩ mũineenea ĩkũlyo yĩĩ:
-
Nĩkĩ Mũklĩsto ũtaĩlĩte kũsembea kũlika mũtwaanonĩ atambĩte kũsũanĩa nesa?
Mbivilia no ĩkũtetheesye ũkamanya nguma ila waĩle kũsisya mũndũnĩ ũla ũkwenda kũtwaana nake. Ĩndĩ ũndũ ũla wa vata vyũ nĩ kũnyuva mũndũ ũmwendete Yeova. b Somai 1 Akolintho 7:39 na 2 Akolintho 6:14. Na ĩndĩ mũineenea makũlyo aa:
-
Nĩkĩ twaĩle o kũtwaana na mũndũ ũmũthaithaa Yeova o taitũ?
-
We wĩona Yeova ta ũtonya kwĩwʼa ata ũkanyuva kũtwaana na mũndũ ũtamũthaithaa?
Ũkovanĩsya nyamũ ilĩ syĩ kĩvathũkanyʼo vyũ ĩsokinĩ yĩmwe, vailea kwĩthĩwa mathĩna. O ta ũu, Mũklĩsto ũla ũtwaanaa na mũndũ ũtamũthaithaa Yeova ndalea kũkwatwa nĩ mathĩna maingĩ
6. Onaa mũtwaano ũndũ Yeova ũwonaa
Ĩvindanĩ ya tene, aũme amwe Aisilaeli mathaasya mũtwaano na iveti syoo nũndũ wa itumi itaĩlĩte. Somai Malaki 2:13, 14, 16, na ĩndĩ mũineenea ĩkũlyo yĩĩ:
-
Nĩkĩ Yeova wĩwʼaa woo yĩla andũ mathasya mũtwaano nũndũ wa itumi itosanĩte na Maandĩko?
Kũthasya mũtwaano nĩkũtumaa ũla ũte na mavĩtyo, o vamwe na syana, maũmĩa mũno
Ĩloelei VITIO, na ĩndĩ mũineenea ĩkũlyo yĩla yĩatĩĩe.
-
Ethĩwa ũtwaanĩte na mũndũ ũtamũthũkũmaa Yeova, ũtonya kwĩka ata nĩ kana mũtwaano wenyu wĩthĩwe na ũtanu?
7. Atĩĩa myolooto ya Yeova ĩũlũ wa mũtwaano
Mũndũ nũtonya kwĩthĩwa ayendeka ekĩe kĩthito kingĩ nĩ kana aatĩĩe myolooto ya Yeova ĩũlũ wa mũtwaano. c Ĩndĩ Yeova nũathimaa ala mekaa ũu. Ĩloelei VITIO.
Somai Aevelania 13:4, na ĩndĩ mũineenea makũlyo aa:
-
We nũkwona ne ũndũ ũtonyeka kwĩkala kwosana na myolooto ya Yeova ĩũlũ wa mũtwaano? Nĩkĩ wasũngĩa ũu?
Yeova endaa Aklĩsto maandĩkĩthye mĩtwaano yoo, na mayĩka oou yĩla mathasya mĩtwaano nũndũ nthĩnĩ wa nthĩ mbingĩ silikalĩ syendaa andũ meke ũu. Somai Tito 3:1, na ĩndĩ mũineenea ĩkũlyo yĩĩ:
-
Ethĩwa nũtwaanĩte kana wĩ mũtwae, nũĩkĩĩthĩtye kana mũtwaano wenyu nũandĩkĩthĩtwʼe kwosana na mĩao ya silikalĩ?
ANDŨ AMWE NO MAKŨLYE: “Ve vata mwaũ wa kũandĩkĩthya mũtwaano kwosana na mĩao? Ethĩwa andũ nĩmendanĩte tyo mekalanyʼe o ĩmwe?”
-
We ũtonya kũsũngĩa ata?
KĨLA TWEEMANYĨSYA
Mũtwaano, na mũndũ kwĩkala atatwaanĩte kana ate mũtwae, nĩ mĩthĩnzĩo kuma kwa Yeova. Na onthe no mekale me atanu na me eanĩe maatĩĩa myolooto ya Yeova.
Makũlyo ma Kũsyokeleela
-
Ala matatwaanĩte kana mate atwae matonya kũtũmĩa mũthĩnzĩo ũsu nesa ata?
-
Nĩkĩ Mbivilia ĩtavĩtye Aklĩsto kana maĩle o kũtwaana na ala mamwendete Yeova?
-
Mbivilia yaĩtye kĩtumi kya kũthasya mũtwaano nĩ kĩva?
MAŨNDŨ ANGĨ MA KWĨMANYĨSYA
Kũtwaana “o nthĩnĩ wa mwĩaĩi” kwonanasya ata?
“Makũlyo Kuma kwa Asomi Maitũ” (Mũsyaĩĩsya, Ĩtukũ 1, Mwei wa 7, 2004)
Ĩloele vitio ilĩ nguvĩ nĩ kana wone ũndũ ũtonya kwĩka motwi maseo ĩũlũ wa kwĩvaanyʼa na kũtwaana.
Ĩloele vitio wone ũndũ mwana-a-asa ũmwe wĩwʼaa Yeova amũnengie kĩndũ kĩseo vyũ kũthonoka syĩndũ ila weeyĩimie.
Nĩ maũndũ meva mũndũ waĩlĩte kũsũanĩĩa nesa atanatwʼa kũthasya mũtwaano kana kũtaanĩsya na ũla ũtwaanĩte nake?
Nenga Ndaĩa Kĩla “Ngai Ũlũmanĩtye” (Mũsyaĩĩsya, Mwei wa 12, 2018)
a Sisya Maelesyo ma Mũthya Namba 4 ala maneeneete ĩũlũ wa kũtaanĩsya yĩla vate ũmwe wĩkĩte ũlaalai.
b Isionĩ imwe, asyai nĩmo manyuvĩaa kĩmwana kyoo kana mwĩĩtu woo mũndũ wa kũtwaana nake. Ethĩwa kwenyu kũilye ũu, asyai aseo maĩle kũsisya ethĩwa mũndũ ũla meũnyuvĩa mwana woo nũmwendete Yeova, ĩndĩ ti mbesa kana kĩlasi kyake.
c Ethĩwa wĩkalanasya na mũndũ mũtatwaanĩte kwosana na mĩao, nue waĩle kũtwʼa ethĩwa nũũmũtia, kana nĩmũtwaana kwosana na mĩao.
No Wendeewʼe Nĩ Ii
MAKŨLYO MAKŨLAWʼA MAVINDA MAINGĨ
Mũvango wa Ngũsĩ sya Yeova wa Kũmanyĩsya Andũ Mbivilia Ũtwaĩĩawʼa Ata?
Mũvango ũũ wa masomo ma Mbivilia ũseũvĩtwʼe nĩ Ngũsĩ sya Yeova ndwĩ ndĩvi, na no ũtũmĩe Mbivilia ĩla ũkwenda. Ĩwʼa wĩ mũthasye kũthokya mũsyĩ waku wʼonthe kana mũnyanya ũla ũkwenda.
