1 Akolintho 10:1-33
10 Yu, ana-a-asa, nĩenda mũmanye kana aa-ũmae maitũ maĩ ungu wa yĩla ĩtu na onthe nĩmesĩile ũkanganĩ
2 na onthe nĩmavatisiwe na ĩtu na ũkanga nĩ kana methĩwe aatĩĩi ma Mose,
3 na onthe maĩe lĩu ũmwe wa kĩ-veva
4 na onthe manywie kyaũnyw’a kĩmwe kya kĩ-veva. Nũndũ manyusaa kuma ĩvianĩ ya kĩ-veva yĩla yamaatĩĩe, na ĩvia yĩu yaĩ Klĩsto.
5 Ĩndĩ Ngai ndaaendeew’a nĩ aingĩ moo, nĩkwĩthĩwa nĩmooaĩwe weũnĩ.
6 Na yu maũndũ asu matw’ĩkie ngelekany’o kwitũ, nĩ kana tũikethĩwe na wendi wa maũndũ mathũku, o tondũ mo mamendie.
7 Na tũikathaithe mĩvw’anano tondũ amwe moo meekie; o tondũ kũandĩkĩtwe: “Na andũ mekala nthĩ maye na kũnyw’a. Na mookĩla nĩ kana metanĩthye.”
8 Na tũikeke ũlaalai,* o tondũ amwe moo meekie ũlaalai* na makw’a andũ 23,000 mũthenya ũmwe.
9 Na tũikamũtate Yeova o tondũ amwe moo mamũtatie, na maũmwa nĩ nzoka makw’a.
10 O na tũikethĩwe andũ ma kũnyungunyĩsya o tondũ amwe meekie na mooawa nĩ mwanangi.
11 Maũndũ asu meekĩkie nĩ kana methĩwe ngelekany’o kwitũ, na maandĩkiwe kwondũ wa kũtũkany’a ithyĩ ala tũvikĩwe nĩ mũminũkĩlyo wa nthĩ ĩno.
12 Kwoou ekai ũla ũkũsũanĩa ta ũũngamĩte, ethĩwe e metho ndakese kũvalũka.
13 Vaiĩ ĩtatwa yaamũkwata eka ala makwataa andũ. Ĩndĩ Ngai nĩ mũĩkĩĩku na ndakaeka mũtatwe kũvĩtũka ũndũ mũtonya kũmĩĩsya, ĩndĩ o vamwe na ĩtatwa yĩu, akaumĩlya nzĩa nĩ kana mũtonye kũyũmĩĩsya.
14 Kwoou endwa makwa, kĩai ũthaithi wa mĩvw’anano.
15 Nĩneena ta ngũneena na andũ me na ũmanyi; kwoou tw’ai inyw’ĩ ene ethĩwa nĩneena w’o kana ndiũneena w’o.
16 Kĩkombe kya ũathimo kĩla tũathimaa, kw’o ku ti kwĩthĩwa na mũamba nthĩnĩ wa nthakame ya Klĩsto? Na mũkate ũla tũtilaa, kw’o ku ti kwĩthĩwa na mũamba nthĩnĩ wa mwĩĩ wa Klĩsto?
17 Nũndũ ve mũkate ũmwe, o na kau twĩ aingĩ, twĩ mwĩĩ ũmwe, nũndũ ithyonthe tũĩsaa mũkate o ũsu ũmwe.
18 Sũanĩai ĩũlũ wa Aisilaeli: Mo ala maĩsaa nthembo mayĩthĩawa me mũamba na kĩthembeo?
19 Yu nĩasya ata? Kyo kĩla kĩthembewe mũvw’anano nĩ kĩndũ, kana w’o mũvw’anano nĩ kĩndũ?
20 Aiee; ĩndĩ nĩasya kana syĩndũ ila andũ ma mbaĩ ingĩ mathembaa mathembeaa ndaimoni ĩndĩ ti Ngai; na ndikwenda inyw’ĩ mwĩthĩwe na mũamba na ndaimoni.
21 Mũitonya kũnyw’a kĩkombe kya Yeova na kĩkombe kya ndaimoni; mũitonya kũya “mesanĩ ya Yeova” na mesanĩ ya ndaimoni.
22 Kana ‘twĩenda Yeova ethĩwe na kĩwĩu’? Ithyĩ tũi vinya kũte we, kana twĩ naw’o?
23 Maũndũ onthe nĩmosanĩte na mĩao,* ĩndĩ ti maũndũ onthe matethasya. Maũndũ onthe nĩmosanĩte na mĩao, ĩndĩ ti onthe makaa.
24 Ekai kĩla ũmwe ndakamanthe kwĩyĩuna mwene, ĩndĩ amanthe kũuna ũla ũngĩ.
25 Yai kĩndũ o na kĩva kĩla kĩũthoow’a sokonĩ ya nyama, mũteũkũlĩĩlya nũndũ wa wasya wenyu wa ngoo,
26 nĩkwĩthĩwa “nthĩ na syĩndũ ila syĩ nthĩnĩ wayo nĩ sya Yeova.”
27 Ethĩwa mũndũ ũte mwĩtĩkĩli nĩwamũthokya na nĩmũkwenda kũthi, yai kĩla mwanengwa, mũteũkũlĩĩlya nũndũ wa wasya wenyu wa ngoo.
28 Ĩndĩ ethĩwa mũndũ o na wĩva akamwĩa, “Kĩĩ nĩ kĩndũ kyumĩtw’e nthembo,” mũikaye nũndũ wa ũla wamũtavya na nũndũ wa wasya wa ngoo.
29 Ndiũneenea wasya wenyu wa ngoo, ĩndĩ wa mũndũ ũla ũngĩ. Nũndũ ve vata mwaũ nĩtũmĩe ũthasyo wakwa na ngĩsilĩlwa nĩ wasya wa ngoo wa mũndũ ũngĩ?
30 Ethĩwa yĩla ngũya nĩngũtũnga mũvea, nyie nĩnaĩle kũya ethĩwa nĩngũneenewa naĩ ĩũlũ wa kĩla ngũtũngĩa mũvea?
31 Kwoou ethĩwa nĩmũũya kana nĩmũũnyw’a kana mwĩĩka ũndũ ũngĩ o na wĩva, ĩkai maũndũ onthe kwondũ wa kũmũtaĩa Ngai.
32 Mũikethĩwe kĩndũ kya kũlulutĩkya Ayuti vamwe na Akiliki na kĩkundi kya Ngai,
33 o tondũ ndataa kwendeesya andũ onthe maũndũnĩ onthe, ndekwenda kwĩyĩuna mwene, ĩndĩ ndyenda kũuna aingĩ, nĩ kana matangĩĩwe.
Maelesyo ma kwongeleela
^ Sisya Maelesyo ma Ndeto.
^ Sisya Maelesyo ma Ndeto.
^ Kana “no metĩkĩlĩke.”
