Tɔm pee “Sika Paɣtʋ” fɛyɩ Bibl taa. Ɛlɛ ɛyaa sakɩyɛ lakɩnɩ tɔm pee ana tʋmɩyɛ alɩwaatʋ ndʋ pɔyɔɔdʋʋ paɣtʋ natʋyʋ ndʋ Yesu ɖʋwa pɩlɩɩnɩ wezuu caɣʋ yɔɔ yɔ tɩ-tɔm yɔ. Alɩwaatʋ ndʋ Yesu yɔɔdaɣ Pʋʋ Yɔɔ Tɔm Yɔɔdʋʋ yɔ, ɛtɔm se: “Mbʋ payɩ ɩsɔɔlaa se ɛyaa ɩlabɩ-mɩ yɔ, pɩwɛɛ se mɩ ɖɔɖɔ ɩlabɩ-wɛ pʋ.” (Maatiyee 7:12; Luka 6:31) Nabʋyʋ taa, palɩzɩ Sika Paɣtʋ taa ɖɔɖɔ se: “Ɩla lalaa mbʋ ɩsɔɔlaa se palabɩ-mɩ yɔ.”—Encyclopedia of Philosophy

•  Sika Paɣtʋ tɔbʋʋ lɛ suwe?

•  Wazasɩ nzɩ paɣtʋ ndʋ tɩkɔŋna?

•  Mbʋ lalaa pɩzɩɣ palabɩ-ɖʋ yɔ pɩ-tɔm ɖeke Sika Paɣtʋ yɔɔdʋʋ?

•  Ɛzɩma ŋpɩzɩɣ nɛ ŋlabɩnɩ tʋmɩyɛ Sika Paɣtʋ?

 Sika Paɣtʋ seɣtiɣ-ɖʋ se ɖɩla lalaa mbʋ ɖɩsɔɔlaa se palabɩ-ɖʋ yɔ. Kɩɖaʋ nakʋyʋ yɔ: Ɛyaa sakɩyɛ sɔɔlaa se pɛwɛɛnɩ ñamtʋ pɔ-yɔɔ, palabɩ-wɛ kɩbandʋ nɛ pɔsɔɔlɩ-wɛ. Pɩwɛɛ se ɖa ɖɔɖɔ ‘ɖɩla lalaa mbʋ.’—Luka 6:31.

 Papɩzɩɣ palabɩnɩ Sika Paɣtʋ tʋmɩyɛ paa wɛtʋ ndʋ lɛ tɩ-taa. Kɩɖaʋ nɩɩyɩ yɔ . . .

•   Tɩsɩɣnɩ halʋ nɛ ɛ-walʋ se pɛcɛyɩsɩ pa-taabalɩyɛ.—Efɛɛzɩ mba 5:28, 33.

•   Tɩsɩɣnɩ lʋlɩyaa se pasɩɣzɩ pe-piya lɔŋ camɩyɛ.—Efɛɛzɩ mba 6:4.

•   Tɩsɩɣnɩ taabalaa, cɔlɔ ñɩma nɛ mba pɛkpɛndɩɣ nɛ palakɩ tʋmɩyɛ yɔ se pɛ-hɛkʋ taa ɛwɛɛ camɩyɛ.—Aduwa 3:27, 28; Koloosi mba 3:13.

 Ɛgbɛyɛ Kɩbɩnɖɛ taa paɣtʋ sakɩyɛ lakɩ nɔɔ kʋɖʋmaɣ nɛ Sika Paɣtʋ. Yesu yɔɔdaɣ Sika Paɣtʋ tɔm lɛ, ɛtɔm se “tɔm ndʋ Paɣtʋ [Bibl kajalaɣ takayɩsɩ kagbanzɩ] nɛ Nayaa [takayɩsɩ nzɩ nayaa mawa yɔ] pawɩlaa.” (Maatiyee 7:12) Pɩ-tɔbʋʋ lɛ se Sika Paɣtʋ ñɩkɩɣ niye Ɛgbɛyɛ Kɩbɩnɖɛ taa paɣtʋ kiɖe sɔsɔɖɛ naɖɩyɛ yɔɔ. Nɖɩ yɔ: Sɔɔlɩ ña-taabalʋ.—Roma mba 13:8-10.

 Aayɩ. Sika Paɣtʋ seɣtiɣ-ɖʋ se ɖɩla lalaa kɩbam, ɛlɛ ɖɩtaaɖaŋ se pɛhɛyɩ-ɖʋ. Alɩwaatʋ ndʋ Yesu ɖʋ Sika Paɣtʋ yɔ, ɛyɔɔdaɣ mbʋ pɩwɛɛ se ɖɩla ɛyaa kpeekpe pɩkpɛndɩnɩ ɖo-koyindinaa yɔ pɩ-tɔm. (Luka 6:27-31, 35) Ye mbʋ, Sika Paɣtʋ seɣtiɣ-ɖʋ se ɖɩla kɩbam ɛyaa kpeekpe.

1.  1. Tɩlɩ cɔnʋʋ camɩyɛ. Cɔŋnɩ ɛyaa mba pɔcɔŋ nɛ pata yɔ camɩyɛ. Ɛzɩ pɩwɛ nɔɔyʋ kaɖɛ se ɛsɩɣlɩ wondu ndʋ ɛyaba yɔ? Ɛzɩ pɩwɩɣ nɔɔyʋ nɛ pasɩ-ɩ ɖɔkɔtɔ tɛ? Yaa mba ña nɛ wɛ ɩlakɩ tʋmɩyɛ yɔ, pitibi pa-taa nɔɔyʋ yɔɔɔ? Ye ‘ŋmaɣzɩ lalaa kɛzɛsɩ yɔɔ’ yɔ, ŋkaɣ tɩlɩ ndʋ ŋyɔɔdɩ yaa mbʋ ŋla nɛ ŋsɩnɩ-wɛ yɔ.—Filiipi mba 2:4.

2.  2. Nɩɩ lalaa siziŋ. Kpaɣ ña-tɩ nɛ ŋɖʋ nɔɔyʋ lone taa. Wɛtʋ ndʋ tɩ-taa ɛwɛɛ yɔ, ye ŋŋwɛ tɩ-taa ɛzɩma pɩɩlabɩ-ŋ? (Roma mba 12:15) Ye ŋñakɩ pana se ŋnɩɩ lalaa tɔm taa yɔ, pituyuu-ŋ nɛ ŋsɩnɩ-wɛ.

3.  3. Kɛ weyi ɛnɩɣ tɔm taa yɔ. Taasɔɔ se paa ɛyʋ weyi lɛ, ɛwɛ ndɩ nɛ ɛyaa lalaa. Nabʋyʋ taa, mbʋ nabɛyɛ sɔɔlaa se palabɩ-wɛ yɔ, pɩpɩzɩɣ nɛ pɩwɛɛ ndɩ nɛ mbʋ ŋsɔɔlaa se palabɩ-ŋ yɔ. Ye mbʋ, mbʋ payɩ ŋpɩzɩɣ nɛ ŋla lalaa yɔ pɩ-taa lɛ, lɩzɩ mbʋ ŋnawa se pɩkɩlɩɣ-wɛ kɛdɩnʋʋ yɔ.—1 Kɔrɛntɩ mba 10:24.