Ɛzɩma ɖɩpɩzɩɣ nɛ ɖɩsɩnɩ mba palʋkɩnɩ lɩmaɣza taa kʋdɔŋ yɔ
BIBL YƆƆDƲƲ SE: «Ɛsɔɔlʋʋ paa ɖooye, weyi ɛkɛ ɛgbaɣdʋ yɔ, nɛ kʋñɔŋ taa lɛ, ɛpɩsɩɣ koobu.»—ADUWA 17:17.
Pʋ-tɔbʋʋ lɛ se
Alɩwaatʋ ndʋ lɩmaɣza taa kʋdɔŋ yeki nɛ ɖa-taabalʋ nɔɔyʋ nɩɣ siziŋ yɔ, pɩpɩzɩɣ nɛ pɩlabɩ-ɖʋ ɛzɩ ɖɩfɛyɩnɩ ɖoŋ nɩɩyɩ se ɖɩsɩnɩ-ɩ yɔ. Ɛlɛ ɖɩpɩzɩɣ nɛ ɖɩwɩlɩ ɖa-taabalʋ ɛnʋ se ɖɩmaɣzɩɣ ɛ-yɔɔ siŋŋ ye ɖɩsɩɣnɩ-ɩ se ɛlʋbɩnɩ lɩmaɣza taa kʋdɔŋ ŋgʋ yɔ. Ɛzɩma tɩyɛ?
Ɛzɩma tɔm tʋnɛ tɩpɩzɩɣ nɛ tɩsɩnɩ-ɖʋ yɔ
‘Wɛɛ kpekpeka tɔm welisuu taa.’ —YAKUBU 1:19.
Nʋmɔŋ kɩbaŋ weyi ɩ-yɔɔ ŋpɩzɩɣ ŋtɩŋna nɛ ŋsɩnɩ ña-taabalʋ yɔ, ɩ-taa nakʋyʋ lɛ se ŋwelisini-i alɩwaatʋ ndʋ ɛsɔɔlaa se ɛyɔɔdɩ yɔ. Taamaɣzɩ se pɩcɛyaa se ŋcosi ndʋ payɩ ɛyɔɔdʋʋ yɔ tɩ-yɔɔ. Yele nɛ ɛtɩlɩ se ŋwɛɛ nɛ ŋwelisiɣni-i nɛ ŋmaɣzɩɣ ɛ-yɔɔ. Ñaɣ pana nɛ ŋnɩɩ ɛzɩma pɩlakɩ-ɩ yɔ pɩ-taa nɛ taakʋ ɛ-tɔm. Taasɔɔ se ɛpɩzɩɣ nɛ ɛyɔɔdɩ tɔm natʋyʋ ndʋ ɛtaaɖʋna yɔ nɛ ekpiɖi tɩ-yɔɔ pʋwayɩ.—Yɔɔb 6:2, 3.
‘Yɔɔdɩnɩ nɔɔ kɩbaŋa.’ —1 TESALOONIIKI MBA 5:14.
Pɩtɩla yɔ, ña-taabalʋ wɛ nɩɣzɛ taa yaa pɩtɩla ɖɔɖɔ yɔ ɛmaɣzɩɣ se ɛfɛyɩ wazaɣ nakɛyɛ. Ye ŋheyi-i se ŋmaɣzɩɣ ɛ-yɔɔ yɔ, pɩpɩzɩɣ nɛ pɩhɛzɩ ɛ-laŋɩyɛ nɛ pɩkpazɩ-ɩ ɖoŋ paa ŋŋsɩŋ ndʋ ɖeyi ɖeyi ŋyɔɔdɩ yɔ.
«Ɛsɔɔlʋʋ paa ɖooye, weyi ɛkɛ ɛgbaɣdʋ yɔ.»—ADUWA 17:17.
La nabʋyʋ ɖeyi ɖeyi nɛ ŋsɩna. Mbʋ ɛzɩ ŋŋkɔ tɔm ñʋʋ se ŋsɩm mbʋ ŋla nɛ ŋsɩna yɔ lɛ, pɔzɩ-ɩ se ɛbɛ ŋpɩzɩɣ nɛ ŋla. Ye pɩwɛ ña-taabalʋ kaɖɛ se eheyi-ŋ mbʋ ɛsɔɔlaa se ŋlabɩ-ɩ yɔ, ŋpɩzɩɣ nɛ ŋheyi-i se ŋsɔɔlaa se ña nɛ ɩ ɩlɩɩ nɛ ɩɖɔ pazɩ. Yaa ŋpɩzɩɣ nɛ ŋheyi-i se ŋsɔɔlaa se ŋsɩɩ-ɩ nɛ ɛya wondu, ɛñɔɔzɩ ɛ-ɖɩɣa taa yaa ɛla tʋmɩyɛ lɛɛɖɛ.—Galaatii mba 6:2.
‘Wɛɛ suuɖu.’—1 TESALOONIIKI MBA 5:14.
Pɩtɩla yɔ, pɩtɩkɛ paa ɛzɩmtaa ña-taabalʋ sɔɔlaa se ɛyɔɔdɩ. Heyi-i se ŋkaɣ-ɩ welisinuu nɛ taa leleŋ alɩwaatʋ ndʋ ɛsɔɔlaa yɔ. Ɛ-kʋdɔŋ yɔɔ lɛ, ɛpɩzɩɣ nɛ ɛyɔɔdɩ natʋyʋ yaa ɛla nabʋyʋ nɛ pɩwɩzɩ-ŋ. Ña nɛ ɩ ɩpɩzɩɣ ɩnɩɩnɩ ɖama se ɩlakɩ nabʋyʋ ɛlɛ eheyiɣ-ŋ pʋwayɩ se pɩɩtasɩɣ labʋ yaa ɛkɔʋ pana yem yem. Wɛɛ suuɖu nɛ ŋnɩɩ ɛ-tɔm taa alɩwaatʋ ndʋ ŋheyiɣ-i se ŋñɩnɩɣ se ŋsɩɣnɩ-ɩ nɛ ɛla mbʋ pɩpɔzʋʋ-ɩ yɔ.—Aduwa 18:24.
Ye ŋɖʋʋ ña-taabalʋ nesi yɔ, pɩpɩzɩɣ nɛ pɩsɩnɩ-ɩ
«Mañakɩ pana se mɛnkɛ taabalʋ weyi ɛpɩzɩɣ nɛ ɛtaa-ɩ liu yɔ. Paa maapɩzɩɣ se mɔncɔnɩ kala wena ɛkatɩɣ yɔ a-ɖeɖe yɔ, mañakɩ pana nɛ mewelisiɣ ndʋ ɛwɛna se ɛyɔɔdʋʋ yɔ. Nabʋyʋ taa mbʋ pɩpɔzʋʋ-ɩ yɔ lɛ se pewelisini-i nɛ pewelisiɣni-i nɛ pɩtɛ lɛ, pɩlakɩ-ɩ sooci.»—Farrah a weyi ɛ-taabalʋ wɛ nɩɣzɛ taa, pɩlakɩ-ɩ kaɖɛ se ɛtɔɔ tɔɔnaɣ nɛ ɛwɛnɩ lɩmaɣza taa kʋdɔŋ ɖɔɖɔ yɔ.
«Man-taabalaa taa lɛlʋ lakɩ camɩyɛ kpem nɛ ɛkpazɩɣ ɛyaa ɖoŋ. Ɛya-m nɛ mowolo ɛ-tɛ nɛ ɖɩtɔɔ tɔɔnaɣ kɩbaŋa nakɛyɛ. Ɛwɩlɩ-m se ɛwɛnɩ sɔɔlɩm nɛ eyeba nɛ pɩwɛ-m kɛlɛʋ se mɔyɔɔdɩ ɛzɩma pɩlakɩ-m yɔ. Pɩkpazɩ-m ɖoŋ siŋŋ!»—Ha-eun weyi ɛwɛnɩ lɩmaɣza taa kʋdɔŋ yɔ.
«Suuɖu tɔm cɛyɩ siŋŋ. Ma-halʋ lakɩ nabʋyʋ nɛ pɩwɩzɩ-m lɛ, mɔntɔzʋʋ se ɛ-kʋdɔŋ yebina nɛ ɛla mbʋ, pɩtɩkɛ ɛ-wɛtʋ lɛ. Pɩsɩɣnɩ-m se mantaakɔ pana, ɛlɛ mawɩlɩ-ɩ se mamaɣzɩɣ ɛ-yɔɔ.»—Jacob weyi ɛ-halʋ wɛnɩ lɩmaɣza taa kʋdɔŋ yɔ.
«Ma-halʋ kɛ-m sɩnɩyʋ nɛ laŋɩyɛ hɛzɩyʋ siŋŋ. Alɩwaatʋ ndʋ nɩɣzɛ kɩlɩɣ-m yɔ, ɛɛñɩkɩɣ mɔ-yɔɔ kpa se mala mbʋ mantɩsɔɔlɩ labʋ yɔ. Pɩwɩlɩɣ se nabʋyʋ taa lɛ, piyeki nɛ ɛɛlakɩ mbʋ ɛɛsɔɔlaa se ɛla yɔ. Mɔnsɔɔlɩ ɛ-tɔm kpem mbʋ pʋyɔɔ yɔ ɛwɛnɩ tɩ laʋ lɩmaɣza nɛ ɛkɛ kʋjɔŋ laɖʋ.»—Enrico weyi nɩɣzɛ kadadayaɣ yeba nɛ ɛwɛɛnɩ lɩmaɣza taa kʋdɔŋ yɔ.
a Pɛlɛɣzɩ hɩla naayɛ.
Kalɩ ɖɔɖɔ....
POCOSI BIBL TAA TƆM YƆƆ
Suwe Bibl yɔɔdʋʋ taabalɩyɛ yɔɔ?
Taabalaa kɩbama wɛnɩ ɖoŋ kɩbaŋ ɖama yɔɔ, nɛ papɩzɩɣ peyele nɛ ɖɩkɛ ɛyaa kɩbama nɛ pɩkpaɖɩ. Lɩzɩ ña-taabalaa nɛ camɩyɛ!
ƐYAA MBA ÐƖKƐNAA?
Pɔzɩ se nɔɔyʋ ɛkɔɔ nɛ ɛna-ŋ
Pɔzɩ tɔm natʋyʋ pɩlɩɩnɩ Bibl yɔɔ yaa pɔzɩ nɛ ŋtɩlɩ Yehowa Aseɣɖe Tɩnaa yɔɔ tɔm nɛ pɩkpaɖɩ.
