Bafakazi ba Jehova ba no amuchila dzitshambiso ne dzividiyo dza ka teyiwa mu Baibili dza ka paphidzika ne zila ye electronic ku pinda kene lini. Ngono mu ndawo njinji, bazwalani bedu a ba to khona wana mari e ku ngina mu Internet. Bangwe ba mu ndawo i na Internet i no thubuka kanjinji, kene kwa i no shinga i nonoka kene i li slow, kene kwa i si po choselele.

 Ne kwa ka jalo, ngwenu bunji gwe bazwalani ne dziazwadzi dzedu ba no khona ku zwitolela dzitshambiso ne zila ye electronic ne ku si na Internet! Ichechi cho khoneka chini?

 JW Box i thulusunyana i no piwa makubungano a si nga khone bata Internet zubuyanana. I na router ya ka tengwa, ne software ya ka thamiwa ne Computer Department ku Bethel, kose ne dzitshambiso dze electronic ne dzividiyo dzi yapo mu jw.org. Mari e bokisinyana li ngompela a ngabe P857.86.

 Ku Holo ye Bushe, bazwalani ne dziazwadzi ba no batshanya zwishingisiwa zwabo zwe electronic ne JW Box ne zila ye wireless ku dwa po be be be zwitolela dzitshambiso ne dzividiyo. Dumbu ne ba na zwishingisiwa zwa ntolonyana kene zwi si nga ture ba nga zwibatshanya ne bokisinyana ileli. Ngono apa i li kuti gubungano a li to khona ku be ne Internet, JW Box i no gala i na dzitshambiso ptshwa chini? Shule kwe chibaka chingwe ne chingwe cha ka tini, litabi go tumila dzi USB memory stick, dza ingwe ne ingwe yadzo i nga tengiwa ne mari a ngabe P45.75, dzi na zwiptshwa ku dwa mu jw.org zwi nga longwa mu JW Box.

 JW Box ya ka batsha bazwalani bedu chini? Bangwe tate ba no gala ku Democratic Republic of Congo, ba no yi Nathan Adruandra, ba ka ti: “Nda ka gwisa chibaka chi lefu ku zwitolela dzi drama dze ‘O Jehovah, . . . I Trust in You’ ne Remember the Wife of Lot. Ngono ha ndi zo khona, ichecho chi ka ndi tema mafupa. Ngwenu ndo khona ku zwitolela dzividiyo idzedzi mu phone yangu, ngono ichechi cho ti batsha se bazwadzi ku diya bana bedu ne zila i butuka.”

 Nzwalani u no batsha makubungano ku Nigeria ku tangisa JW Box a ka ti: “Bazwalani ba no linga JW Box i li chipo cha ka shalulika chi no dwa ku na Jehova. Ba ka shatha kwazo kube ngwenu ba nga zwitolela dzitshambiso ne dzividiyo ku dwa mu Teaching Toolbox ne zila i lelu.”

 Dzi JW Box dzi no pinda 1,700 dza ka tumiligwa bazwalani bedu ku Africa, Oceania, ne South America, ngono ko thamiwa ndongoloso dze kuti dzi tumiligwe makubungano mangwe manjinji. Mari a no thama kuti ichechi chi khoneke a no dwa ngayi? Mu zwipo zwi no dusigwa nshingo we shango yose, bunji gwazo zwi dusiwa mu donate.dan124.com. To bokela batsho yenyu ya mu no thama ne moyo nchena.