Kristons verdaderu sta disididu na ka dexa nada nen ningen straga ses amizadi ku Jeová. Di sertéza bu ta xinti asi tanbê. Jeová ta da valor pa bu lialdadi. (Lé 1 Crónicas 28:9.) Ki situasons pode poi bu lialdadi pa Jeová na próva? I modi ki bu pode lida ku es?

1. Modi ki otus algen pode poi nos lialdadi pa Jeová na próva?

Alguns algen ta tenta pô-nu para di sirbi Jeová. Kenha ki ta faze un kuza di kel-li? Alguns ki disvia di verdadi, ta konta mintira sobri organizason di Deus pa tenta kaba ku nos fé. Tanbê, alguns xéfi di relijion ta spadja mintira sobri nos pa tenta poi pesoas para di sirbi Jeová. É prigozu nu pâpia ku kes tipu di algen li, lé ses livru ô kuzas ki es ta poi na internet, bai na ses site ô odja ses vídiu. Jizus fla kes palavra li sobri kes algen ki ta tenta poi otus para di sirbi Jeová: ‘Nhos dexa-s. Gia ségu é kel ki es é. I si un ségu gia otu ségu, es tudu dôs ta kai na un braku.’ — Mateus 15:14.

I si un algen ki nu konxe disidi ma el ka krê ser Tistimunha di Jeová más? Kel-li pode ser un kuza tristi dimás si é un algen ki nos é txeu amigu. Talvês, kel algen pode krê obriga-nu pa nu skodje entri el i Jeová. Má, kontinua lial pa Jeová debe ser kel kuza más inportanti pa nos. (Mateus 10:37) Pur isu, nu ta obi ku órdi di Jeová pa nu ka konvive ku kes algen la. — Lé 1 Coríntios 5:11.

2. Ki disizons pode poi nos lialdadi pa Jeová na próva?

Nos amor pa Jeová ta pô-nu ka nvolve ku relijion falsu di ninhun manera. Pur isu, nen nos trabadju, nen kel organizason ki nu ta faze párti di el ô kalker otu kuza ki nu ta faze ka debe sta ligadu ku relijion falsu. Jeová ta aviza-nu: ‘Nhos sai di [Babilónia Grandi], nha povu’. — Apocalipse 18:2, 4.

 SABE MÁS

3. Toma kuidadu ku instrutoris falsu

Kuzê ki nu debe faze si nu obi ta fladu algun kuza mariadu sobri organizason di Jeová? Lé Provérbios 14:15, i dipôs pâpia sobri kel pergunta li:

• Pamodi ki nu ta toma kuidadu pa nu ka kridita na tudu kuza ki nu ta obi?

Lé 2 João 10, i dipôs pâpia sobri kes pergunta li:

• Modi ki nu debe trata kes algen ki bandona i bira kóntra organizason di Jeová?

• Mésmu si nu ka ta pâpia ku es, modi ki kes kuza ki es ta inxina pode influensia-nu?

• Modi ki bu ta atxa ma Jeová ta xintiba si nu obi kes kuza mariadu ki es ta fla sobri el ô se organizason?

4. Kontinua lial pa Deus óras ki un irmon peka

Si nu fika ta sabe ma un algen na kongregason faze un pekadu gravi, kuzê ki nu debe faze? Odja un prinsípiu ki nu ta atxa na kel Lei ki Deus daba Israel antigu. Lé Levítico 5:1.

Sima sta na kel versíklu li, si nu fika ta sabe ma un algen faze un pekadu gravi, nu debe fla ansions kuzê ki nu sabe. Má, antis di faze kel-li, nu ta mostra bondadi si nu insentiva kel algen pa pâpia ku ansions i konfesa se pekadu. Si el ka faze kel-la, nos lialdadi pa Jeová debe pô-nu ta konta ansions kuzê ki nu sabe. Modi ki faze si ta mostra nos amor lial pa. . .

• Jeová Deus?

• kel algen ki peka?

• otus algen na kongregason?

 5. Fika lonji di Babilónia Grandi

 REZUMU

Pa nu kontinua lial pa Jeová, nu meste ivita sta djuntu ku kes algen ki é ka lial pa el. Tanbê, nu meste fika lonji di tudu kuza ki sta ligadu ku relijion falsu.

Perguntas di rezumu

• Pamodi ki nu ka debe odja, lé ô obi kes ideia di kes algen ki bandona i fika kóntra organizason di Jeová?

• Modi ki nu debe trata kes algen ki ka krê ser Tistimunha di Jeová más?

• Kuzê ki nu pode faze pa nu obi ku kel avizu di sai di relijion falsu?