Prublémas di saúdi mental ta afeta algen na mundu interu
“Sénpri N ta ten un kuzinha di ansiadadi, sikrê N sta xintadu na un kuartu mi sô.”
“Óras ki N ta xinti dretu dimás, N ta fika preokupadu. Dja N sabe ma óras ki N ta xinti txeu kontenti, lógu dipôs N ta xinti txeu tristi.”
“N ta tenta vive un dia di kada bês. Má alvês dirapenti, N ta fika preokupadu ku un monti kuza.”
Kel-li é kuzê ki alguns algen ki ten prublémas ki ta afeta ses menti fla. Abo, ô algun algen ki bu ta kuida di el ta xinti di mésmu manera?
Bu pode ten sertéza ma é ka sô bo. Gósi, ten txeu algen ki ten duénsas ki ta afeta ses menti ô ki ten algun família ku kes tipu di prubléma li.
Nu ka ten dúvida ma nu sta ta vive na ténpu ‘konplikadu, difísil di aguenta’ i kel-li sta ta traze txeu prubléma. (2 Timóteo 3:1) Fazedu un piskiza ki ta mostra ma na mundu interu, más ô ménus un na kada 8 algen sta ta lida ku un duénsa ki ta afeta ses menti. Pamodi COVID-19, na 2020 tevi más uns 26 pursentu di algen ku ansiadadi di ki na 2019. Tanbê tevi más uns 28 pursentu di algen ku depreson gravi di ki na 2019.
Enbóra é bon nu sabe kantu algen ki ten ansiadadi ô depreson gósi, kuzê ki é más inportanti é sabe modi ki nos ô kes algen ki nu ta ama pode midjora.
Kuzê ki é saúdi mental?
Óras ki nu ten bon saúdi na menti, normalmenti nu ta xinti dretu i nu ta konsigi faze kuzas sen prubléma. Nu ta konsigi lida ku preokupasons normal, nu ta trabadja dretu i nu ta xinti sábi na vida.
Óras ki algen ten un duénsa ki ta afeta menti...
-
KA krê fla ma kel algen é fraku.
-
É un prubléma di saúdi ki ta poi un algen ta sufri txeu i ki ta trapadja se manera di pensa, se manera di xinti i se manera di konporta.
-
Txeu bês, pode bira difísil kel algen ten amigus i lida ku kuzas normal di dia-dia.
-
El pode afeta algen di kalker idadi, kultura, rasa, tribu, relijion, kes ku poku skóla ô ku txeu skóla, ô ki ta ganha poku ô txeu dinheru.
Ajuda pa lida ku duénsas ki ta afeta menti
Alvês di un óra pa kel otu, un algen ta kumesa ta xinti diferenti. El ta kumesa ta durmi txeu dimás ô el ka ta durmi ki ta txiga-l. El ta kumesa ta kume mutu más txeu ô más poku ki antis, ta xinti txeu ansiadadi ô tristéza. Si kel-li sta kontise, talvês kel algen meste faze un tratamentu pa djuda-l intende kuzê ki sta ta pô-l ta muda i modi ki el pode rezolve kel prubléma. Má na undi ki nu pode atxa ajuda?
Jizus Kristu, ki é kel ómi ki ten más sabedoria ki dja vive na téra, fla: “Kes algen ki tene saúdi ka meste dotor, má é kes duenti ki meste.” (Mateus 9:12) Kes algen ki sta ta lida ku prublémas di saúdi mental i ki sta ta resebe tratamentu di un dotor i ki sta toma ramedi, es ta xinti midjór, es ta konsigi faze más kuza i ten un vida más filís. Nton si kuzê ki bu sta xinti é gravi i dja bu dura ta xinti si, é midjór bu kumesa ta faze tratamentu más faxi ki bu pode. a
Enbóra Bíblia é ka un livru di saúdi, kuzê ki el ta fla pode djuda-nu ten bon saúdi mental. Nu ta konvida-u pa bu lé kes otu artigu ki ta mostra modi ki Bíblia pode djuda-nu lida ku prublémas ki ta afeta menti.
a Sentinéla ka ta fla ningen kal ki é tratamentu ki es debe faze. Kada algen debe analiza ku kuidadu ki tratamentu ki el pode faze i dipôs toma un disizon di el pa el.
Bu pode gosta di kes-li tanbê
ESSENTIAL BIBLE TEACHINGS
Pamodi ki Deus ta dexa maldadi ku sufrimentu kontise?
Respósta ki sta na Bíblia é klaru i ta konsola-nu.
NU MANTE SIENTI!
Txeu jóven sta ku prublémas di saúdi mental — Kuzê ki Bíblia ta fla?
Bíblia ta da bons konsedju ki pode djuda kes jóven ki sta pasa pa prublémas di saúdi mental.
NOS ORGANIZASON
Pidi un vizita
Pâpia sobri un pergunta di Bíblia ô prende más sobri Tistimunhas di Jeová.
