Sima anus ta ba ta pasa, alguns kazal ta mostra ménus amor pa kunpanheru. Si kel-li sta kontise na bu kazamentu, bu debe fika preokupadu?

•  Kuzê ki bu debe sabe

•  Kuzê ki bu pode faze

 Amor é rei di inportanti pa un kazamentu fórti. Sima kume i bebe agu sénpri ta djuda un algen ten forsa i saúdi, mostra amor sénpri ta djuda kazamentu ser fórti. Mésmu ki maridu ku mudjer dja ten un monti anu kazadu, es meste mostra kunpanheru sénpri ma inda es ta ama i es ta preokupa ku kunpanheru.

 Amor di verdadi ka ta djobe sô ses interesi. El ta krê faze otu algen ser filís. Nton, envês di mostra amor sô óras ki el xinti vontadi di faze-l, ken ki ta sta sienti ta ntende ki óras ki se maridu ô mudjer meste di amor i el ta sforsa pa mostra-l amor.

 Normalmenti, mudjer meste mostradu amor más txeu ki maridu. Un maridu pode ama se mudjer di fundu di se korason. Má si el ta mostra-l amor sô na komésu ô na fin di dia, ô antis di es faze séksu, mudjer pode fika ku dúvida si maridu ta ama-l di verdadi. É mutu más midjór mostra amor txeu bês tudu dia.

 Mostra amor na kuzas ki bu ta fla. Fla “N kre-u txeu” ô “abo é kuza más inportanti ki N ten”, pode poi ken ki bu sta kazadu ku el xinti ma bu ta ama-l.

 Prinsípiu di Bíblia: ‘Bóka ta pâpia di kel ki korason sta xeiu.’ — Mateus 12:34.

 Konsedju: Bu pode mostra amor di otus manera. Skrebe un bilheti, manda e-mail ô mensájen pa ken ki bu sta kazadu ku el.

 Mostra amor na kuzas ki bu ta faze. Brasa bu mudjer ô bu maridu, da-l beju ô sô pega-l na mô pode mostra-l ma óras ki bu ta fla-l “N kre-u txeu”, bu sta pâpia di korason. Tanbê bu pode mostra amor pa bu mudjer ô bu maridu óras ki bu ta poi mô na el ku karinhu, djobe-l ku amor ô di vês en kuandu, da-l un prezenti. I bu pode faze alguns kuza pa djuda bu mudjer, sima karega bólsa, abri pórta, laba losa, laba ropa ô faze kumida. Pa txeu mudjer, faze kes kuza li é más di ki sô djuda-s. É mostra-s amor!

 Prinsípiu di Bíblia: ‘Nu debe ama, ka [sô] ku palavras nen ku bóka, má pa kuzas ki nu ta faze.’ — 1 João 3:18.

 Konsedju: Trata bu mudjer ô bu maridu ku karinhu sima kantu nhos staba na namoru.

 Nhos pasa ténpu ku kunpanheru. Pasa ténpu ku kunpanheru ta bira kazamentu más fórti i ta mostra bu mudjer ô bu maridu ma bu gosta di sta djuntu ku el. É klaru ki si nhos ten fidju, ô si ten txeu kuza ki nhos meste trata tudu dia, pode ser difísil ranja ténpu pa pasa ku kunpanheru. Talvês nhos pode faze planu pa faze algun kuza sô nhos dôs, sima ba anda djuntu.

 Prinsípiu di Bíblia: ‘Nhos konfirma kuzê ki é más inportanti.’ — Filipenses 1:10.

 Konsedju: Alguns kazal ki ten txeu kuza di faze ta tra ténpu manenti pa sta djuntu na alguns “noti romántiku” ô “fin di simana romántiku”.

 Nhos konxe kunpanheru dretu. Kada algen ta xinti nisisidadi diferenti di amor. Nhos pâpia ku kunpanheru sobri modi ki kada un di nhos gosta pa nhos mostradu amor i ki óras ki más nhos ta xinti falta di amor. Dipôs, nhos sforsa pa mostra kunpanheru kel amor ki kada un di nhos meste. Ka nhos skese ma amor é rei di inportanti pa un kazamentu fórti.

 Prinsípiu di Bíblia: ‘Amor ka ta djobe sô ses interesi’. — 1 Coríntios 13:4, 5.

 Konsedju: Envês di fika ta iziji pa bu mostradu amor, pergunta bu kabésa: “Kuzê ki N pode faze pa nha maridu ô nha mudjer mostra-m más amor?”