Kuzê ki Bíblia ta fla sobri Natal?

TOKA

Respósta di Bíblia

Bíblia ka ta pâpia di kel data ki Jizus nase, nen el ka ta fla ma nu debe komemora se aniversáriu. Un ensiklopédia a ta fla: “Komemorason di Natal é ka un kuza ki Deus ta manda pa nu faze, nen el ka sta na NT [Novu Testamentu].”

Na verdadi, un piskiza sobri stória di Natal ta mostra ma kel komemorason li ben di relijion falsu. Bíblia ta mostra ma nu ta ofende Deus si nu tenta adora-l di un manera ki el ka ta aprova. — Êxodo 32:5-7.

Di undi ki ben alguns di kes kuza ki ta fazedu na Natal

Komemorason di aniversáriu di Jizus. “Kes primeru sigidor di Jizus ka ta komemoraba se nasimentu pamodi es ta atxaba ma faze fésta di anu éra un kuza di relijion falsu.” — The World Book Encyclopedia.
Dia 25 di dizenbru. Ka ten nada ki ta prova ma Jizus nase na kel dia li. Talvês kes xéfi di Igreja skodje kel data li pamodi éra mésmu dia ki kes algen di relijion falsu ta fazeba ses fésta ki tinha aver ku invérnu.
Da kunpanheru prezenti i féstas. Un ensiklopédia b ta fla: “Txeu di kes kuza ki es ta faze na fésta di Natal ta ben di un fésta, ki txoma Saturnália, ki romanus ta fazeba la pa metadi di mês di dizenbru. Pur izénplu, é di kel fésta li ki ben kel ideia di faze txeu kumida, di da kunpanheru prezenti i sende vélas.” Un otu ensiklopédia c ta fla ma duránti Saturnália “es ta paraba di trabadja i es ta fitxaba kes lugar di nogósiu”.
Lus di Natal. Di akordu ku un ensiklopédia, d kes algen di Europa ta infeitaba ses kaza ku “lus i ku txeu tipu di planta verdi” pa es komemoraba komésu di invérnu i protejeba kóntra kes spritu mau.
Plantas ki ta uzadu na Natal. “Na txeu país normalmenti ta uzadu kes mésmu tipu di planta pa faze kes infeitu di Natal. Kes druida [ki éra un povu antigu di Gran-Britanha,] ta flaba ma bu pode uzaba un di kes planta, ki txoma visku, pa faze majia. Tanbê, es ta adoraba un otu planta, ki txoma azevinhu, sima si es staba ta faze un promésa ma sól ta binha otu bês.” — The Encyclopedia Americana.
Arvi di Natal. “Adorason di arvi éra un kuza normal pa txeu di kes algen na Europa, ki ta adoraba kes deus falsu. I es kontinua ta adora arvi mésmu dipôs ki es muda pa kes relijion Kriston.” Un izénplu di kel-li é “óras ki la pa meiu di invérnu pesoas ta poi un arvi di Natal na entrada ô déntu di ses kaza.” — Encyclopædia Britannica.