Palavra traduzidu pa ‘resureison’ na Bíblia ta ben di un palavra gregu ki é a·naʹsta·sis, ki ta siginifika “labanta” ô “fika sakédu otu bês.” Un algen ki resusitadu é un algen ki staba mortu ki labantadu pa el torna ser kel algen ki el éra antis. — 1 Coríntios 15:12, 13.

 Palavra ‘resureison’ ka ta parse na Skrituras Ebraiku, ki tanbê é konxedu pa Velhu Testamentu, má kel promésa di resureison ta parse na el. Pur izénplu, Deus faze kel promésa li através di proféta Ozeias: ‘N ta ben libra-s di puder di Sipultura; N ta ben resgata-s di mórti.’ — Oseias 13:14; Jó 14:13-15; Isaías 26:19; Daniel 12:2, 13.

 Undi ki kes algen ta ben ser resusitadu? Alguns algen ta resusitadu pa bai vive na Séu i pa governa ku Jizus Kristu. (2 Coríntios 5:1; Apocalipse 5:9, 10) Bíblia ta txoma kel resureison li di ‘primeru resureison’ i ‘kel resureison di mortus ki ta ben kontise más sédu.’ Kes dôs versíklu li ta da ideia ma ten otu resureison. (Apocalipse 20:6; Filipenses 3:11) Maioria di algen ta ben labantadu na kel sugundu resureison i es ta ben vive na Téra. — Salmo 37:29.

 Modi ki algen ta ben ser resusitadu? Deus da Jizus puder pa resusita algen. (João 11:25) Jizus ta ben resusita ‘tudu kes ki sta na sipultura mimorial’. Kada un di es ta labantadu sima es éra, ku ses manera di ser i ku kes lenbransa ki es tinha. (João 5:28, 29) Kes ki ta resusitadu pa bai vive na Séu ta dadu un korpu spritual, i kes ki resusitadu pa vive na Téra ta dadu un korpu novu di karni i osu, i xeiu di saúdi. — Isaías 33:24; 35:5, 6; 1 Coríntios 15:42-44, 50.

 Ken ki ta ben ser resusitadu? Bíblia ta fla ma ‘ta ben ten resureison di algen justu i tanbê di algen injustu.’ (Atos 24:15) Kes algen justu é kes algen fiel sima Nué, Sara i Abraon. (Génesis 6:9; Hebreus 11:11; Tiago 2:21) Kes injustu ta inklui kes algen ki ka obi ku leis di Deus pamodi es ka tevi oportunidadi di prende sobri el i di faze se vontadi.

 Má kes algen ki bira mau di tal manera ki ka ten soluson más, ka ta ben ser resusitadu. Óras ki un algen asi móre, el ta resebe distruison pa tudu ténpu sen ninhun speransa di torna vive. — Mateus 23:33; Hebreus 10:26, 27.

 Ki ténpu ki resureison ta ben kontise? Bíblia ta fla ma kel resureison pa bai vive na Séu ta kontiseba duránti prezénsa di Kristu ki kumesa na anu 1914. (1 Coríntios 15:21-23) Kel resureison pa vida na Téra ta ben kontise duránti kes mil anu ki Jizus ta ben governa, óras ki Téra ben bira un paraízu. — Lucas 23:43; Apocalipse 20:6, 12, 13.

 Pamodi ki nu pode kridita na resureison? Bíblia ta pâpia di 9 algen ki resusitadu i na kada un di kes resureison tevi algen ki odja-s ta kontise. (1 Reis 17:17-24; 2 Reis 4:32-37; 13:20, 21; Lucas 7:11-17; 8:40-56; João 11:38-44; Atos 9:36-42; Atos 20:7-12; 1 Coríntios 15:3-6) Resureison di Lázaru ta txoma nos atenson pamodi dja tinha kuatu dia ki el staba mortu i Jizus faze kel milagri li na frenti di un monti di algen. (João 11:39, 42) Ti kes inimigu di Jizus ka nega ma el resusitadu, é pur isu ki ti es krê mataba Jizus ku Lázaru. — João 11:47, 53; 12:9-11.

 Bíblia ta mostra ma Deus ten puder i el ten gana poi kes algen ki móre ta vive otu bês. El ta lenbra di tudu kuza di kada un di kes algen ki el ta ben resusita, através di se puder ki ka ten limiti. (Jó 37:23; Mateus 10:30; Lucas 20:37, 38) Deus ten puder di poi mortus ta vive otu bês i el krê faze kel-li! Óras ki Bíblia ta pâpia di resureison ki sta pa ben, el ta fla ma Deus ‘ta xinti sodadi di trabadju di se mô.’ — Jó 14:15.

Stórias inventadu sobri resureison

 Stória inventadu: Resureison é djunta alma ku korpu.

 Verdadi: Bíblia ta inxina ma alma é kel algen própi, el é ka un párti ki ta sipara di korpu óras ki algen móre i ki ta kontinua ta vive. (Génesis 2:7, nóta di rodapé; Ezequiel 18:4) Óras ki un algen ta resusitadu é ka alma ku korpu ki ta djuntadu, envês di kel-li Deus ta faze kel algen otu bês.

 Stória inventadu: Alguns algen ta resusitadu i es ta distruídu lógu otu bês.

 Verdadi: Bíblia ta fla ma ‘kes ki faze kuzas mariadu’ ta ben ten ‘un resureison di julgamentu.’ (João 5:29) Má, es ta ben ser julgadu ku bazi na kuzê ki es faze dipôs ki es resusitadu, é ka antis. Jizus fla: ‘Mortus ta ben obi vós di Fidju di Deus, i kes ki presta atenson ta ben vive.’ (João 5:25) Nómi di ‘kes ki obi’ ku kes kuza ki es prende dipôs ki es resusitadu ta skrebedu na ‘rolu di vida.’ — Apocalipse 20:12, 13.

 Stória inventadu: Kes algen ki resusitadu ta resebe mésmu korpu ki es tinha antis di es móre.

 Verdadi: Óras ki un algen móre se korpu ta volta pa téra ô el ta disfaze. — Eclesiastes 3:19, 20.