Eduardu ku se mudjer, Djenifer, tenta da tistimunhu pa tilifóni pa primeru bês na 2010. a Dipôs di da tistimunhu, Djenifer fla: “N ka gosta nen un kuzinha. I N fla nha maridu ma nunka más N ka ta fazeba kel-la otu bês!” Eduardu tanbê xinti mésmu kuza. El fla: “N ka gosta di kes xamada di algen ta tenta bende-m algun kuza. Pur isu, nunka N ka atxa ma N ta konsigi daba tistimunhu pa tilifóni.”

 Dipôs COVID-19 kumesa i Tistimunhas di Jeová para di faze pregason di kaza en kaza. Má pa es obi ku órdi di Jizus di prega notísias sábi, es kontinua ta faze pregason, prinsipalmenti através di kartas i tistimunhu pa tilifóni. (Mateus 24:14; 28:19, 20) Tanbê kes runion, ki ta inklui runion pa pregason, bira ta fazedu através di prugramas sima Zoom. Dipôs di un runion pa pregason, Eduardu fitxa koraji i el tenta da tistimunhu pa tilifóni otu bês. Modi ki el xinti antis di el faze se primeru xamada? El fla: “N staba txeu nervozu i N faze orason ta pidi ajuda! Dipôs N faze xamada. I é si ki N konxe Timótiu.” b

 Timótiu ku se mudjer, Edite, ta mora na un zóna fóra di sidadi na stadu di Kentucky, na Mérka. Timótiu ten 83 anu i el ka ta odja dretu. Má simé, el seta studa Bíblia ku Eduardu. El ta lé kel publikason pa studa Bíblia ku lupa i el kumesa ta studa tudu simana ku Eduardu pa tilifóni.

 Más ô ménus un mês dipôs, Timótiu ku Edite kumesa ta sisti kes runion ki kongregason di la ta fazeba. Má, pamodi es ka tinha internet, es ta sistiba runion pa tilifóni. Kuzê ki poi Edite ku interesi?

 Duránti studu ku Timótiu, Eduardu ku Djenifer ta obiba vós di Edite na fundu ta djuda Timótiu da respósta i atxa testus na se Bíblia. Má éra sô kel-li ki Edite ta fazeba. Djenifer fla: “Se vós ta mostraba ma el staba tristi, má nen mi nen Eduardu nu ka sabia pamodi.”

 Un dia, Djenifer xinti gana di pâpia ku Edite. Nton, kantu parse ma éra un óra sértu, el pidi Eduardu tilifóni. El fla: “Timótiu, N ta konsigi obi vós di bu mudjer na fundu. N krê konvida-l pa el lé un testu di Bíblia ô da un respósta.”

 Dipôs di un pauza pikinoti, Edite pâpia na tilifóni. El fla ku un vós kalmu: “N tinha gana di pâpia ku bo.” Dipôs el fla: “Ami é Tistimunha di Jeová. Dja ten 40 anu ki N sta inativu.”

 Djenifer fika dimiradu i el fla: “Bo é nha irman!” I es kumesa ta txora.

 Lógu dipôs, Eduardu da Edite bruxura Volte para Jeová. Na kes simana dipôs, Eduardu i Djenifer repara bons mudansa na Edite. Eduardu fla: “Na komésu, se vós sta mostraba ma el staba tristi. Má gósi se vós ta mostra ma el sta kontenti.” Edite faze un bon prugrésu i el kumesa otu bês ta prega notísias sábi ku alegria. Se maridu batiza na julhu di 2022.

 Óras ki Eduardu ta lenbra di modi ki el ta xinti sobri da tistimunhu pa tilifóni, tanbê el ta lenbra di un konbérsu ki el tevi ku Timótiu. Dipôs ki Eduardu lé Juan 6:44 pa Timótiu i el splika-l ma Jeová ta atrai algen pa verdadi, Timótiu konkorda i el fla: “N staba ta spera pa bu txoma.” Djenifer sta kontenti pamodi el ku se maridu fitxa koraji i es da tistimunhu pa tilifóni. El fla: “Jeová ta abensua-nu óras ki nu ta sforsa pa faze algun kuza pa el.”