LYNNONG 16

U Jisu U la Leh Aiu Mynba U Don ha Pyrthei?

TEM

Bun ki briew ki kynmaw ïa u Jisu kum u khyllung, u nongïathuhlypa, ne uba la ïap na ka bynta ki briew. Hynrei, hato ngi lah ban tip shuh shuh shaphang jong u da kaba pule bniah shaphang ka jingim jong u ha pyrthei? Ha kane ka lynnong, ngin peit ïa ki katto katne kiei kiei kiba kongsan tam kiba u Jisu u la leh bad kumno kane ka lah ban ïarap ïa phi.

1. Kaei ka kam kaba kongsan jong u Jisu?

Ka kam kaba kongsan jong u Jisu ka long ban “ïalap ïa ka gospel ka Hima U Blei.” (Pule Loukas 4:43.) U la ïalap ïa ka khubor babha ba U Blei un seng ïa ka hima, ne ka sorkar, kaban weng noh ïa baroh ki jingeh jong u bynriew. a Haduh lai snem shiteng u Jisu u la trei shitom ban ïalap ïa kane ka khubor babha.—Mathaïos 9:35.

2. Balei u Jisu u la leh ïa ki kambah?

Ka Baibl ka batai ba “U Blei u la pynithuh shynna ha phi da ki kambah, bad da ki jingphylla, bad da ki dak khyllah de, kiba U Blei u la leh da u [Jisu].” (Kam 2:22) Da ka bor jong U Blei, u Jisu u la lah ban teh lakam ïa ki bor ka mariang, ban bsa ïa ki hajar ngut, ban pynkoit ïa kiba pang, bad wat ban pynmihpat ïa kito kiba la ïap. (Mathaïos 8:23-27; 14:15-21; Markos 6:56; Loukas 7:11-17) Ki kambah jong u Jisu ki pyni shai ba U Blei u la phah ïa u. Ki pyni ruh ba U Jehobah u don ka bor ban weng ïa baroh ki jingeh jong ngi.

3. Kaei ka jinghikai kaba ngi lah ban ïoh na ka rukom im jong u Jisu?

U Jisu u la kohnguh ïa U Jehobah ha baroh ki liang. (Pule Ïoannis 8:29.) Baroh shi jingim, u Jisu u la leh lut baroh kat kaba u Kpa jong u u la phah ïa u ban leh watla bun ki la pyrshang ban khang ïa u. U la pynshisha ba ki briew ki lah ban shakri ïa U Blei wat hapdeng ki jingeh. Kumta, u Jisu u la buh “ka rukom ïa ngi, khnang ba ngin ïoh bud ha kita ki jingjam jong u.”—1 Petros 2:21.

WAD SHUH SHUH

Peit kumno u Jisu u la ïalap ïa ka khubor babha bad kumno u la leh ïa ki kambah.

4. U Jisu u la ïalap ïa ka khubor babha

U Jisu u la ïaid lyngba ki surok kiba pum pum bad sha ki jaka kiba jngai, ban ïalap ïa ka khubor babha sha ki briew baroh. Pule Loukas 8:1, bad nangta sa ïa peit lang ïa kine ki jingkylli harum:

Hato u Jisu u la ïalap tang ïa ki briew kiba wan ban sngap ïa u?
Kumno u Jisu u la trei shitom ban shem ïa ki briew?

U Blei u la ïathuhlypa ba u Messaïah un wan ban ïalap ïa ka khubor babha. Pule Isaïah 61:1, 2, bad nangta sa ïa peit lang ïa kine ki jingkylli harum:

Kumno u Jisu u la pyndep ïa kane ka jingïathuhlypa?
Hato phi tharai ba ki briew mynta ki donkam ban ïohsngew ïa kane ka khubor babha?

5. U Jisu u la hikai ïa ki jingshisha bakordor

Nalor ba u la ïalap ïa ka khubor babha shaphang ka Hima U Blei, u Jisu u la hikai ruh kumno ba ngin im man la ka sngi. Peit katto katne ki nuksa shaphang ki jinghikai jong u ha u lum. Pule Mathaïos 6:14, 34 bad 7:12, bad nangta sa ïa peit lang ïa kine ki jingkylli harum:

Kiei ki jinghikai kiba u Jisu u la ai ha kine ki dkhot?
Hato phi tharai ba kine ki jinghikai ki dang lah ban ïarap ïa ki briew mynta?

6. U Jisu u la leh ïa ki kambah

U Jehobah u la ai bor ïa u Jisu ban leh shibun ki kambah. Ban peit kawei ka nuksa, pule Markos 5:25-34 ne peit ïa ka VIDEO. Nangta sa ïa peit lang ïa kine ki jingkylli harum:

VIDEO: Ka Briew kaba Pang ka la Koit (5:10) (Phareng)

Ha ka video, kane ka kynthei kaba pang ka la ngeit skhem ïa kaei?
Kaei kaba phi sngewtynnad shaphang kane ka kambah?

Pule Ïoannis 5:36, bad nangta sa ïa peit lang ïa kane ka jingkylli harum:

Ki kambah jong u Jisu ki sakhi, ne ki pynshisha, aïu shaphang jong u?

Hato phi tip?

Bun na kaei kaba ngi tip shaphang u Jisu, la thoh ha ki saw tylli ki Gospel—U Mathaïos, U Markos, U Loukas, bad U Ïoannis. Man la uwei pa uwei u nongthoh jong ka Gospel u thoh ïa ki jingtip bapher bapher shaphang u Jisu. Haba ngi pule ïa kine ki saw tylli ki Gospel, ngi tip shai shaphang ka jingim jong u.

U MATHAÏOS

u la thoh ïa ka Gospel banyngkong kaba ban ïa ki jinghikai jong u Jisu, khamtam shaphang ka Hima jong U Blei.
U MARKOS

u la thoh ïa ka Gospel kaba lyngkot tam, hynrei kaba don shibun ki jingjia ba sngewtynnad.
U LOUKAS

u la kham thoh kyrpang shaphang ki jingduwai bad kumno ba u Jisu u la ñiewkor ïa ki kynthei.
U ÏOANNIS

u la thoh shaphang ki jinglong jong u Jisu, bad u la ban ïa ki jingïakren hapdeng u Jisu bad ki paralok kiba u ïa jan, bad kiwei de.

DON KIBA ONG: “U Jisu u la wan sha pyrthei ban ïap na ka bynta jong ngi.”

Hato dei tang na kane ka daw ba u Jisu u la wan sha pyrthei?

KI MAT BAKONGSAN

U Jisu u la ïalap shaphang ka Hima U Blei, u la leh ki kambah, bad u la kohnguh ïa U Jehobah ha baroh ki liang.

Peit Biang

Kaei ka kam kaba kongsan kaba u Jisu u la leh mynba u don ha pyrthei?
Ki kambah jong u Jisu ki pynshisha ïa kaei?
Kiei ki jinghikai kiba u Jisu u la hikai na ka bynta ka jingim ba man la ka sngi?

Ka tarik ba la pyndep:

Ka Thong

Peit ïa ka video ‘To Tip skhem ba U Blei u la pynlong u Trai bad u Khrist ïa u Jisu’—Bynta II ne pule Mathaïos lynnong 5-7 ban tip shuh shuh shaphang ka kam ïalap u Jisu.

Kiwei de ki thong:

Your other goal