Kumno ban long kiba Kmen?

TEM

Ngi baroh—la ngi dang marwei ne la shongkurim, la ngi dang samla ne la tymmen, baroh ngi kwah ban long kiba kmen. U Nongthaw jong ngi ruh u kwah ïa ngi ban sngew kumta. Na kata ka daw u la ai katto katne ki jingmut ban ïarap ïa ngi ban long kiba kmen.

Trei Minot

“To un da trei shitom, da kaba trei da la ki kti ïa kata kaba bha, ba un ïoh ei ei ban ïa ai ha uta uba kyrduh.”—EPHESOS 4:28.

U Blei u kwah ïa ngi ban long kiba trei shitom. U briew uba trei shitom u kmen namarba u lah ban pyndap pynbiang ïalade bad ïa la ka ïing ka sem. U lah wat ban ïarap ïa kiwei ruh kiba donkam. U nongaikam jong u ruh u ñiewkor ïa u. Te u nongtrei uba bha un ym duh ïa la ka kam. Ka Baibl ka ong ba ka bainong jong ka jingtrei shitom ka dei “ka jingai jong U Blei.”—Eklesiastis 3:13.

Im Hok

“Ngi ngeit ba ngi don ka jingïatiplem babha, ba ngi da kwah ban im hok ha kiei kiei baroh.”—HEBRU 13:18.

Lada ngi trei hok, kiwei kin burom ïa ngi, bad ngi don ka jingsuk mynsiem, bad ngi thiahsuk mynmiet. Nalor kata, kiwei kin shaniah bad burom ïa ngi. Ki briew kibym hok kim ïoh ïa kito kiei kiei kiba bha. Bad ruh ka jingïatiplem ka jong ki kan pynrem ïa ki bad ki lah ban im ha ka jingsyier ba ha kawei ka sngi kiwei kin sa lap ïa ka jingleh bymhok jong ki.

Wat ai ba ka Pisa kan Long kaba Kongsan Tam ha ka Jingim

“To long kiba lait na kaba ieid sbai, da kaba sngewhun bad kita kiei kiei ba phi don.”—HEBRU 13:5.

Ngi donkam pisa na ka bynta ka bam bad kiwei kiwei ki jingdonkam. Hynrei ka jingieid ïa ka pisa ka long kaba ma bha. Ka lah ban pynlong ïa u briew ban pynlut ïa la ka por bad ka bor khnang ban kamai pisa shuh shuh. Kane ka jingbeh ïa ka pisa ka lah ban ktah ïa ka jingïadei jong u bad ka lok, ki khun, bad ka lah ban ktah wat ïa ka koit ka khiah jong u ruh. (1 Timothi 6:9, 10) Nalor kata, u briew uba ieid pisa u lah ban shah pynshoi ban leh bymhok ne ban thok. Uwei u briew uba stad u la ong: ‘U briew uba leh hok un ïoh kyrhai ki jingkyrkhu, hynrei uta uba kyrkieh ban riewspah un ym lait na ka jingpynshitom.’—Proberb 28:20.

Jied ïa ka Jinghikai kaba Bha Tam

“To bat ïa ka jingstad kaba shisha bad ka jingsian.”—PROBERB 3:21.

Ka jingnang jingstad ka lah ban ïarap ïa ngi ban long ki briew kiba lah ban shaniah bad ki kmie ki kpa kiba bha. Hynrei tang ka jinghikai kaba ngi ïoh na skul kam pat biang ban ai ïa ngi ïa ka jingkmen bashisha ne ban pynbiang ia ki jingdonkam jong ngi baroh. Te khnang ban long kiba man bha shisha ha kat kaba ngi leh, ngi donkam ruh ïa ka jinghikai kaba U Blei u ai. Shaphang kito kiba sngap ïa U Blei, ka Baibl ka ong: “Kaei kaei ruh kaba u leh kan man bha.”—Salm 1:1-3.

AWAKE!