Tha nĩ “ũhoti wa kũigua na gũtaũkĩrũo nĩ maũndũ marĩa mũndũ ũngĩ aragerera na njĩra ya kũhũũra mbica ũrĩa ũngĩigua ũngĩĩkora ũndũ-inĩ ta ũcio.” Ndagĩtarĩ wa meciria wĩtagwo Rick Hanson ooigire atĩ “tha ikoragwo thĩinĩ witũ.”

TA WĨCIRIE: Hihi tũheetwo ũhoti wa kuonania tha nĩkĩ, ũhoti ũtakoragwo na indo iria ingĩ ciothe? Bibilia yonanagia atĩ Ngai oombire andũ na mũhianĩre wake. (Kĩambĩrĩria 1:26) Gũkorũo tũmbĩtwo na mũhianĩre wake nĩ kuuga atĩ no tũhote kũmũtũkia na tuonanie ũhoti ta wake na gĩkĩro kĩigana ũna. Kwoguo, rĩrĩa andũ ega matindĩkwo nĩ tha gũteithia arĩa angĩ, makoragwo makĩonania tha ta iria ikoragwo na Jehova Ngai, Mũũmbi wao mũcayanĩri.—Thimo 14:31.

Ngai nĩ atũiguagĩra tha na nĩ athũire kuona tũgĩthĩnĩka. Ũhoro-inĩ wĩgiĩ andũ a Isiraeli ya tene arĩa maarutithagio wĩra wa ũkombo Misiri magĩcoka magĩikara mũtũũrĩre mũritũ mĩaka 40 werũ-inĩ, Bibilia yugaga: “Mathĩna-inĩ mao mothe-rĩ, o nake nĩaathĩnĩkire.” (Isaia 63:9) Rora wone atĩ Ngai to kuona oonaga mathĩna mao. O nake nĩ aaiguaga ruo ta rũrĩa maaiguaga. Ooigire ũũ: “Nĩnjũĩ maruo marĩa marĩ namo.” (Thama 3:7) Ngai oigĩte atĩrĩ: ‘Mũndũ ũrĩa wothe ũmũhutagia inyuĩ, no ta kĩũma kĩa riitho rĩakwa mwene ahutagia.’ (Zekaria 2:8) Rĩrĩa twatuurithio ngoro nĩ andũ arĩa angĩ, o na ngoro yake nĩ ĩtuuragwo.

Bibilia ĩtwĩraga atĩ o na tũngĩigua tũhĩtĩtie na tũtagĩrĩire kũiguĩrũo tha nĩ Ngai, “Ngai nĩ mũnene gũkĩra ngoro citũ na nĩ oĩ maũndũ mothe.” (1 Johana 3:19, 20) Ngai nĩ atũĩ wega makĩria ma ũrĩa twĩyũĩ. Nĩ amenyaga maũndũ mothe marĩa tũragerera, ũrĩa tũreciria, na ũrĩa tũraigua. Nĩ atũiguagĩra tha.

 Maandĩko matũmagĩrĩria atĩ

• “Hĩndĩ ĩo nĩũgagĩĩtana, nake Jehova agwĩtĩke, o na wanĩrĩre, nake oige atĩrĩ, Niĩ ũyũ haha.”—ISAIA 58:9.

• “Nĩ gũkorũo nĩnjũĩ meciria marĩa ndĩĩciragia ũhoro-inĩ wanyu, o meciria ma thayũ, na ti ma ũũru, nĩ getha ndũme mũgĩe na kĩĩrĩgĩrĩro gĩa atĩ ũhoro wanyu nĩũkaagĩra thutha-inĩ; ũguo nĩguo Jehova ekuuga. Na nĩmũkangayagĩra, na mũcokage kũinamĩrĩra mũ’hoe, na niĩ nĩngamũigua.”—JEREMIA 29:11, 12.

• “Maithori makwa ta kĩmekĩre cuba-inĩ waku; githĩ to maandĩke mbuku-inĩ yaku?”—THABURI 56:8.

Hihi kũmenya atĩ Ngai nĩ atũiguagĩra tha no gũtũteithie gũkirĩrĩria moritũ? Ta wĩcirie ũhoro wa Maria:

Ooigire ũũ: “Ndonaga ũtũũro ũrĩ mũritũ na ũtarĩ mwega thutha wa kũigua ruo rũnene rwa gũkuĩrũo nĩ mwanake wakwa wa mĩaka 18 ũrĩa warũarĩte mũrimũ wa kansa ihinda rĩa mĩaka ĩĩrĩ. Ndaiguaga Jehova andakarĩtie nĩ ũndũ wa kwaga kũingĩrĩra maũndũ nĩguo amũhonie!

“Mĩaka ĩtandatũ thutha ũcio, mũrata wakwa ũmwe thĩinĩ wa kĩũngano warĩ na wendo na ũcayanĩri nĩ aathikĩrĩirie ngĩmwĩra ũrĩa ndonaga atĩ Jehova ndanyendete. Thutha wa gũthikĩrĩria mathaa maigana ũna atekũndinia na mĩario, nĩ angweteire rĩandĩko rĩahutirie mũno. Rĩarĩ 1 Johana 3:19, 20, rĩrĩa riugaga, ‘Ngai nĩ mũnene gũkĩra ngoro citũ na nĩ oĩ maũndũ mothe.’ Akĩndaarĩria atĩ Jehova nĩ ataũkagĩrũo nĩ mĩtangĩko itũ.

“O na kũrĩ ũguo, ndwarĩ ũndũ mũhũthũ harĩ niĩ gũtiga kũrakara! Ngĩcoka ngĩthoma Thaburi 94:19 ĩrĩa yugaga: ‘Rĩrĩa nyingĩhĩirũo thĩinĩ wakwa nĩ mĩtangĩko ũhoreria waku nĩguo ũngenagia ngoro.’ Ndaiguire ta rĩandĩko rĩu rĩandĩkĩtwo nĩ ũndũ wakwa! Thutha-inĩ, ndonaga ũrĩ ũndũ wa kũũhooreria mũno kũhota kwaranĩria na Jehova ngĩmwĩra mĩtangĩko yakwa, ngĩmenyaga atĩ nĩ aiguaga na agataũkĩrũo.”

Na githĩ tũtiũmagĩrĩrio mũno kũmenya atĩ Ngai nĩ ataũkagĩrũo nĩ ithuĩ na agatũiguĩra tha! No nĩ kĩĩ gĩtũmaga gũkorũo na mathĩna maingĩ ũguo? Hihi Ngai nĩwe ũkoragwo agĩtũherithia nĩ ũndũ wa mahĩtia maitũ? Hihi Ngai nĩ akooya ikinya kũniina mathĩna mothe? Ciũria icio nĩ igũcokio icunjĩ-inĩ iria irũmĩrĩire.