MAHINDA-INĨ ma Bibilia, mũhikania nĩ aatwaraga rũracio kũrĩ famĩlĩ ya mũirĩtu thutha wa famĩlĩ cierĩ gwĩtĩkĩra mahikanie. Nĩ aangĩatwarire indo cia goro, mahiũ, o na kana mbeca, irĩ rũracio. Rĩmwe na rĩmwe, rũracio nĩ rwarĩhagwo na njĩra ya kũruta wĩra, ta ũrĩa Jakubu aarutĩire Labani wĩra mĩaka mũgwanja nĩguo etĩkĩrio kũhikia Rakeli. (Kĩam. 29:17, 18, 20) Rũracio rwarĩhagwo nĩkĩ?

Mũthomi ũmwe wa maũndũ ma Bibilia wĩtagwo Carol Meyers aandĩkire ũũ: “Rũracio nĩ rũngĩarĩhire famĩlĩ ya mũirĩtu nĩ ũndũ wa kũũrũo nĩ wĩra ũrĩa mũirĩtu wao ararutaga, ũndũ ũrĩa warĩ wa bata famĩlĩ-inĩ iria ciarutaga wĩra wa ũrĩmi.” Ningĩ rũracio nĩ rũngĩekĩrire hinya ũrata wa famĩlĩ ya mũirĩtu na ya mwanake. Nĩ ũndũ wa ũrata ũcio, famĩlĩ icio cierĩ nĩ ingĩateithanirie hĩndĩ ya thĩna. Makĩria ma ũguo, rũracio nĩ rũngĩonanirie atĩ mũirĩtu nĩ etĩkĩrĩte kũingĩra kĩhiko-inĩ, na atĩ nĩ ekuuma rungu rwa ũgitĩri wa ithe athiĩ rungu rwa ũgitĩri wa mũthuri wake.

Kũruta rũracio gũtiaagĩrĩirũo kuonwo ta mũtumia arĩ kwendio arendio. Ibuku rĩmwe rĩĩtagwo Ancient Israel—Its Life and Institutions riugaga ũũ: “Gũkorũo atĩ kwarĩ o mũhaka kũrĩha mbeca cigana ũna kana indo ciganaine na mbeca icio kũrĩ famĩlĩ ya mũirĩtu, kuonanagia ta Mũisiraeli ũrĩa ũrahikania arĩ kũgũra aragũra mũndũ. No [rũracio] rũtioonagwo rũtariĩ ta marĩhi mararĩhwo famĩlĩ ya mũirĩtu.”

Mahinda-inĩ maya, thĩinĩ wa mabũrũri mamwe andũ no marĩhaga rũracio. Rĩrĩa aciari Akristiano maretia rũracio, nĩ ‘marekaga ũigananĩru wao ũmenyekage nĩ andũ othe’ na njĩra ya kwaga gwĩtia mbeca kana indo nyingĩ makĩria ma ũrĩa kwagĩrĩire. (Afil. 4:5; 1 Kor. 10:32, 33) Na njĩra ĩyo, nĩ monanagia atĩ o ti “endi mbeca,” na ti andũ akoroku. (2 Tim. 3:2) Makĩria ma ũguo, rĩrĩa aciari Akristiano maga gwĩtia rũracio rũnene, mwanake ũcio ũrahikania ndekũbatara gũtĩria ũhiki atĩ nĩguo acokanĩrĩrie mbeca njiganu cia rũracio. Ningĩ mwanake ũcio ũrahikania ndekuona ta arĩ o mũhaka ambe atiganĩrie ũtungata wake wa ũpainia, atĩ nĩguo arute wĩra mahinda mothe ahote kuona mbeca cia kũrĩha rũracio rũnene rũrĩa aretio.

Mabũrũri-inĩ mamwe thĩinĩ wa thĩ, nĩ gũkoragwo na mawatho megiĩ marĩhi ma rũracio. Mabũrũri-inĩ ta macio, aciari Akristiano nĩ mathĩkagĩra mawatho macio. Nĩkĩ? Tondũ Bibilia ĩraga Akristiano ‘mathĩkagĩre athani arĩa anene’ na mathĩkagĩre mawatho marĩa matararegana na mawatho ma Ngai.—Rom. 13:1; Atũm. 5:29.