Macokio na Ciũria cia Bibilia
Nĩkĩ gĩtũmĩte kwage thayũ thĩinĩ thĩ?
Thirikari ĩrĩa ĩngĩhota kũgarũra mĩerekera ya andũ, nĩyo ĩkarehe thayũ thĩinĩ wa thĩ
Bibilia nĩ ĩheanaga itũmi igĩrĩ cia bata. Gĩtũmi kĩa mbere, ona gũtuĩka andũ nĩ mahingĩtie maũndũ manene ma magegania, matiũmbĩtwo marĩ na ũhoti wa gũtongoria makinya mao. Gĩtũmi gĩa kerĩ, andũ maremetwo kũrehe thayũ thĩinĩ wa thĩ tondũ “kĩrĩndĩ gĩa thĩ gĩothe nĩgĩtũire kĩnyitĩtwo nĩ ũcio mũũru,” Shaitani ũrĩa Mũcukani. Kwoguo, andũ o na makĩendaga nĩ maremetwo kũrehe thayũ thĩinĩ wa thĩ.—Thoma Jeremia 10:23; 1 Johana 5:19.
Ningĩ nĩ ũndũ wa andũ kwĩyenda na kwenda ũnene, thayũ nĩ wagĩte thĩinĩ wa thĩ. Thirikari ĩrĩa ĩngĩrehe thayũ thĩinĩ wa thĩ, no ĩrĩa tu ĩngĩhota kũruta andũ kwenda maũndũ mega na kwendana o ene.—Thoma Isaia 32:17; 48:18, 22.
Nũũ ũkaarehe thayũ thĩinĩ wa thĩ?
Ngai Mwene Hinya Wothe nĩ eranĩire atĩ nĩ akahanda thirikari ĩmwe ĩrĩa ĩgatongoria andũ othe. Ĩkoya ithenya rĩa thirikari ciothe cia andũ. (Danieli 2:44) Mũriũ wa Ngai, Jesu, nĩ agathana arĩ Mũnene wa Thayũ. Nĩ akaniina waganu wothe thĩinĩ wa thĩ na arute andũ mĩthiĩre ya thayũ.— Thoma Isaia 9:6, 7; 11:4, 9.
O na rĩu, Jesu nĩ aratongoria andũ milioni nyingĩ thĩinĩ wa thĩ yothe, kũhũthĩra Kiugo kĩa Ngai, Bibilia, kũruta andũ ũrĩa mangĩikarania na thayũ. Ica ikuhĩ, thĩ yothe nĩ ĩgũkorũo na thayũ.—Thoma Isaia 2:3, 4; 54:13.
