“NGAI aretĩkĩririe ũndũ ũyũ ũhaanĩke harĩ niĩ nĩkĩ?” Icio nĩ ciũria cieyũragio nĩ Sidnei kuuma Brazil rĩrĩa aarĩ na mĩaka 24. Thutha wa kũgĩa na aksidenti agĩkurutũkĩra maĩ-inĩ, aatuĩkire kĩonje ũũ atĩ no athiire na gakaari ga gũtindĩkwo.

Hĩndĩ ĩrĩa andũ magĩa na aksidenti, mĩrimũ, makuĩrũo nĩ mũndũ mendete, makorũo nĩ icanjama cia ndũire, kana mbaara, no maigue marakarĩire Ngai. Ũcio ti ũndũ mũgeni. Mũthuri wa tene Ayubu nĩ aacemanirie na maũndũ maingĩ maritũ. Nĩ ũndũ wa gwĩciria atĩ nĩ Ngai wamũrehagĩra maũndũ macio, oigire ũũ: “Nĩngũrĩragĩra, na ndũngĩnjĩtĩka; ngakĩrũgama na igũrũ, na no kũndora ũndoraga. Nĩ kũngarũrũka ũngarũrũkĩte ũkanyũmĩra ihu; nĩ gũ’thũkĩra ũ’thũkĩire na ũhoti wa guoko gwaku.”—Ayubu 30:20, 21.

Ayubu ndaamenyaga kĩhumo kĩa mathĩna make, gĩtũmi kĩamo, o na kĩrĩa gĩatũmĩte metĩkĩrio mamũkore. Ũndũ wa gĩkeno nĩ atĩ Bibilia nĩ ĩtũmenyithagia kĩrĩa gĩtũmaga maũndũ ta macio mekĩke na ũrĩa twagĩrĩirũo nĩ gwĩka mekĩka.

Bibilia ĩtwĩraga ũũ igũrũ rĩgiĩ Jehova: “Wĩra ũrĩa arutaga nĩ mwagĩrĩru kũna kũna; Nĩ gũkorũo mĩthiĩre yake yothe nĩ ya kĩhooto; Nake nĩwe Mũrungu ũrĩa mwĩhokeku, ũtarĩ ũũru, Na ningĩ nĩ wa ma, o na wa kĩhooto.” (Gũcokerithia Maathani 32:4) Angĩkorũo nĩguo-rĩ, hihi no kũhoteke atĩ Ngai ‘mwĩhokeku, na ũtarĩ ũũru’ abange andũ manyamarĩkage kana ahũthĩre maũndũ moru nĩguo aherithie kana arũnge andũ?

Mũgarũ na ũguo, Bibilia ĩtwĩraga ũũ: “Mũndũ o wothe aagerio, nĩatige kuuga, Ndagerio nĩ Ngai: amu Ngai ndangĩhota kũgerio nĩ maũũru; nake we mwene ndageragia mũndũ o na ũrĩkũ.” (Jakubu 1:13) O na tũthomaga Bibilia-inĩ atĩ Ngai ombire andũ marĩ akinyanĩru kĩambĩrĩria-inĩ. Aaheire andũ a mbere, Adamu na Hawa, mũciĩ mũthaka, maũndũ marĩa mothe maabataraga ũtũũro-inĩ, na akĩmahe wĩra mwega. Ngai aamerire ũũ: “Ciarai mũno, mũthegee, mũiyũre thĩ, na mũmĩtorie.” Adamu na Hawa matiarĩ na gĩtũmi gĩa kũrakarĩra Ngai.—Kĩambĩrĩria 1:28.

No ũmũthĩ, maũndũ ũtũũro-inĩ ti makinyanĩru. Mũtũũrĩre wa andũ ũkoretwo ũrĩ na moritũ maingĩ mũno kuuma o tene. Ciugo ici nĩ cia ma biũ: “Ciũmbe icio ciothe o nginya rĩu itũire icayaga o hamwe, ikĩiguaga ruo ta rũa mũndũ-wa-nja akĩrũmwo.” (Aroma 8:22) Kaĩ gwathiire atĩa?

Nĩguo tũtaũkĩrũo kĩrĩa gĩtũmaga andũ manyamarĩke, twagĩrĩire gũcokia meciria thutha nginya rĩrĩa mĩnyamaro yambĩrĩirie. Nĩ ũndũ wa kũheenererio nĩ mũraika mũremi, ũrĩa wacokire gwĩtwo Shaitani ũrĩa Mũcukani, Adamu na Hawa nĩ maaregire ithimi cia Ngai cia wega na ũũru iria ciarĩ watho-inĩ ũrĩa maheetwo wa kwaga kũrĩa “mũtĩ ũrĩa wa kũmenyithania wega o na ũũru.” Mũcukani eerire Hawa atĩ matingĩakuire maaga gwathĩkĩra Ngai, na kwoguo akĩenda gũtua atĩ Ngai nĩ wa maheeni. Shaitani ningĩ nĩ aaheenanirie atĩ Ngai nĩ aimaga andũ kĩhooto gĩa gwĩthuurĩra wega na ũũru. (Kĩambĩrĩria 2:17; 3:1-6) Shaitani eendaga kuonania atĩ andũ nĩ mangĩakorirũo na ũtũũro mwega makĩria mategwathwo nĩ Ngai. Maũndũ macio mothe mooimĩririe kĩũria kĩa bata mũno—Hihi Ngai nĩwe waagĩrĩire gwathana?

Ningĩ Mũcukani nĩ oimĩririe thitango ĩngĩ. Oigire atĩ andũ matungatagĩra Ngai nĩ ũndũ wa mwĩyendo. Mũcukani eerire Ngai ũũ igũrũ rĩgiĩ mũthuri mwĩhokeku Ayubu: “Githĩ ti kũmũirigĩra ũmũirigĩire mĩena yothe, nyũmba yake, na indo ciothe iria e nacio? . . . No rĩrĩ, rĩu ta coka ũtambũrũkie guoko, ũhutie indo ciothe icio e nacio, nake ndarĩ hingo ategũkũruma o ũthiũ-inĩ waku.” (Ayubu 1:10, 11) O na gũtuĩka Shaitani aaragia ũhoro wa Ayubu, eendaga kuonania atĩ andũ othe matungatagĩra Ngai nĩ ũndũ wa mwĩyendo.

Nĩ njĩra ĩrĩkũ ĩngĩkorũo ĩrĩ njega ya gũcokia wega thitango icio? Ngai, ũrĩa ũrĩ ũũgĩ mũingĩ, aarĩ na macokio mega biũ, marĩa matangĩtũma tũmũrakarĩre. (Aroma 11:33) Aatuire itua rĩa kũreka andũ meyathe kwa ihinda nĩguo moimĩrĩro monanie nĩ wathani ũrĩkũ mwega.

Maũndũ maingĩ moru marĩa marĩ thĩinĩ wa thĩ ũmũthĩ nĩ ũira mũiganu atĩ wathani wa andũ nĩ ũremetwo biũ. Makĩria ma thirikari cia thĩ kũremwo kũrehe thayũ, ũgitĩri, na gĩkeno, nĩ cianangĩte thĩ mũno. Maũndũ macio maronania ũũma wa ciugo ici igwetetwo thĩinĩ wa Bibilia: ‘Gũtirĩ mũndũ wa gũkũ thĩ ũngĩhota kũrũngĩrĩria makinya make njĩra-inĩ ĩrĩa yerekereire.’ (Jeremia 10:23) Wathani wa Ngai noguo tu ũngĩtũrehera thayũ wa gũtũũra, gĩkeno, na ũtũme andũ magaacĩre, tondũ ũcio nĩguo muoroto wa Ngai.—Isaia 45:18.

Gũkĩrĩ ũguo-rĩ, Ngai akaagarũra maũndũ atĩa nĩguo ahingie muoroto wake? Ririkana ũrĩa Jesu aarutire arũmĩrĩri ake mahoyage: “Ũthamaki waku ũũke. O ũrĩa wendete Wee, nĩwĩkagwo gũkũ thĩ, o ta ũrĩa wĩkagwo kũu Igũrũ.” (Mathayo 6:10) Ihinda-inĩ rĩrĩa rĩagĩrĩire, Ngai nĩ arĩeheria maũndũ mothe marĩa matũmaga tũnyamarĩke, kũgerera Ũthamaki wake. (Danieli 2:44) Gũtigaakorũo rĩngĩ na ũthĩni, mĩrimũ, na gĩkuũ. Ũhoro wĩgiĩ andũ arĩa athĩni, Bibilia yugaga atĩ Ngai nĩ ‘arĩteithũraga mũndũ mũkĩa aakaya.’ (Thaburi 72:12-14) Nao andũ arĩa arwaru, Bibilia ĩranĩire ũũ: “Nake mũndũ ũrĩa ũtũũraga bũrũri ũcio ndarĩ hingo agacoka kuuga ũũ: Ndĩ mũrũaru.” (Isaia 33:24) O na ũhoro wa andũ arĩa makuĩte marĩ kĩririkano-inĩ kĩa Ngai, Jesu oigire ũũ: “Kwĩ hingo ĩroka arĩa othe me thĩinĩ wa mbĩrĩra makaigua mũgambo wake, na moime kuo.” (Johana 5:28, 29) Na githĩ icio ti ciĩranĩro njega mũno!

Sidnei ũrĩa ũgwetetwo kĩambĩrĩria-inĩ gĩa gĩcunjĩ gĩkĩ oigire ũũ mĩaka 17 thutha wa aksidenti, “Ndirĩ ndoiga atĩ nĩ Ngai watũmire ngĩe na aksidenti ĩyo, no ũhoro wa ma nĩ atĩ kĩambĩrĩria-inĩ nĩ ndamũrakaragĩra. Harĩ hĩndĩ njiguaga nguĩte ngoro mũno, na ngarĩra ndeciria ũhoro wa wathe wakwa. O na kũrĩ ũguo, nĩ ndaũkĩirũo kũgerera Bibilia atĩ aksidenti ĩyo ndĩarĩ iherithia kuuma kũrĩ Ngai. Bibilia yugaga ‘gĩkuũ na maũndũ materĩgĩrĩirũo makinyagĩra andũ othe.’ Kũhoya Jehova na gũthoma Maandĩko nĩ gũtũmĩte ngorũo na hinya mũno kĩĩroho na ngakorũo na mwerekera ũrĩa wagĩrĩire.”—Kohelethu 9:11; Thaburi 145:18; 2 Akorintho 4:8, 9, 16.

Gũikara tũkĩririkanaga itũmi iria itũmĩte Ngai etĩkĩrie mĩnyamaro na atĩ ica ikuhĩ nĩ ĩkeherio no gũtũteithie tũniine marakara marĩa tũngĩkorũo namo harĩ Ngai. Tũrĩ na ma atĩ Ngai “nĩwe ũheaga andũ arĩa mamũcaragia ngerenwa yao.” Gũtirĩ mũndũ ũmwĩtĩkĩtie na agetĩkia Mũrũwe ũgaconorithio.—Ahibirania 11:6; Aroma 10:11.