Mwaka wa 2023, ataaramu a ũgima wa mwĩrĩ nĩ moonanirie atĩ ihooru nĩ rĩtuĩkĩte thĩna mũnene wa mwĩrĩ na atĩ nĩ marabatara kuoya ikinya o na ihenya. Hihi no tũhote gũtooria ihooru?

•   Ndagĩtarĩ ũmwe mũnene thĩinĩ wa Amerika (US) wĩtagwo Vivek Murthy, aaugire ũũ: “Rĩrĩa tũraigua tũrĩ na ihooru na tũkeyamũrania na andũ arĩa angĩ, no twĩrehere mathĩna manene ma mwĩrĩ na twage gĩkeno.” No oongereire ũũ: “Nĩ harĩ ũndũ tũngĩka nĩguo tũtoorie ihooru.” Ũndũ ũrĩkũ? Aaugire: “Gwĩka tũmaũndũ tũnini tũnini o mũthenya twa gũtũteithia gũthondeka ũrata mwega na andũ arĩa angĩ.” a

 Ihooru rĩtiumanaga tu na mũndũ gũkorũo arĩ wiki. Andũ amwe no maigue ihooru o na rĩrĩa marĩ hamwe na andũ arĩa angĩ. Gũtekũmakania kĩrĩa kĩratũma tũigue ihooru, Bibilia no ĩtũteithie. Nĩ ĩkoragwo na ũtaaro ũngĩtũteithia gũtooria ihooru na njĩra ya gũthondeka ũrata mwega na andũ arĩa angĩ.

 Wĩrute kwaranagĩria na andũ arĩa angĩ na njĩra njega. Ũndũ ũcio ndũhutĩtie o kwĩra andũ ũrĩa ũraigua, no nĩ nginya kũmathikĩrĩria makĩĩyaria. O ũrĩa ũronia andũ arĩa angĩ atĩ nĩ ũrameciria, noguo ũrata wanyu ũrĩrũmaga.

•   Ũtaaro wa Bibilia: “Mũtekũrũmbũiya o maũndũ manyu moiki, no mũkarũmbũyagia nginya maũndũ ma arĩa angĩ.”—Afilipi 2:4.

 Tuma ũrata na andũ aingĩ ngũrani. Koragwo wĩhaarĩirie gũtuma ũrata na andũ arĩa akũrũ kana ethĩ gũgũkĩra kana maumĩte ũndũire-inĩ ngũrani na waku kana mabũrũri-inĩ mangĩ.

•   Ũtaaro wa Bibilia: “Hingũrai ngoro cianyu biũ.”—2 Akorintho 6:13.

 Nĩguo wone ũhoro makĩria wĩgiĩ ũrĩa ũngĩkũria ũrata mũrũmu hamwe na andũ arĩa angĩ, thoma gĩcunjĩ kĩrĩ na kĩongo “Kutosheleza Tamaa Yetu ya Kuwa na Marafiki.”