Mwaka-inĩ wa ũtungata wa 2021, a thĩ no yathiire na mbere kũgũmĩrũo nĩ mũrimũ wa COVID-19. O ta ũrĩa gĩcunjĩ kĩarĩ na kĩongo “Kũheana Ũteithio Thĩinĩ wa Thĩ Yothe Ihinda-inĩ rĩa Kĩngʼũki” gĩataarĩirie, nĩ tũhũthĩrĩte dola b milioni nyingĩ kũheana ũteithio hĩndĩ ya kĩngʼũki na tũgathondeka makĩria ma Kamĩtĩ 950 cia Gũteithĩrĩria Hĩndĩ ya Icanjama.

 O kĩngʼũki gĩgĩthiaga na mbere, aarĩ na ariũ a Ithe witũ kũndũ gũtiganĩte thĩinĩ wa thĩ nĩ maahutirio nĩ icanjama ingĩ. Nĩ ũndũ wa icanjama makĩria ma 200 ta icio, Kamĩtĩ ya Atabarĩri ya Kĩama Kĩrĩa Gĩtongoragia nĩ yetĩkĩririe kũhũthĩrũo dola milioni 8 hamwe na ũteithio ũrĩa waheanĩtwo nĩ ũndũ wa mũrimũ wa COVID-19. Rora wone ũrĩa mĩhothi yaku yahũthĩrirũo gũteithia arĩa maahutirio nĩ icanjama igĩrĩ iria ciĩrĩga gwĩkĩka.

 Kũrĩ Mĩĩ 22, 2021, Kĩrĩma kĩa Nyiragongo bũrũri-inĩ wa Democratic Republic of the Congo nĩ gĩatuthũkire. Mũtuthũko ũcio wathũkirie nyũmba, cukuru, na maĩ. No ũcio toguo ũgwati ũrĩa warĩ ho. Thikũ cigana ũna thutha wa mũtuthũko, rũkũngũ rũũru nĩ rwagũire taũni-inĩ ya Goma, na gũkĩgĩa ithingithia nyingĩ nini. Makĩria ma nuthu ya andũ arĩa maaikaraga taũni-inĩ ĩyo nĩ meerirũo mathame. Andũ ngiri nyingĩ nĩ morire, amwe magĩthiĩ bũrũri wa Rwanda.

 Gatagatĩ-inĩ ka acio moorire, haarĩ na Aira a Jehova ta 5,000. Amwe ao mĩciĩ yao yathũkirio nĩ mũtuthũko, nao angĩ mĩciĩ yao ĩkĩiywo indo thutha wao kũũra. Kamĩtĩ cia kũheana ũteithio bũrũri-inĩ wa Rwanda na Democratic Republic of the Congo nĩ ciabangire ũrĩa andũ mekũheo ũteithio. Ũhoro-inĩ wĩgiĩ kamĩtĩ ĩmwe ya kũheana ũteithio, wabici ya rũhonge ya Congo (Kinshasa) yaugire ũũ: “O na mbere ya andũ merĩtwo maume taũni-inĩ ĩyo, kamĩtĩ ĩyo nĩ yaambĩrĩirie kũheana irio, maĩ, indo cia gũkomera, na nguo o na gũtuĩka maũndũ matiarĩ mega taũni-inĩ ĩyo.” Taũni-inĩ ĩmwe kũrĩa ariũ a Ithe witũ makĩria ma 2,000 maacemanĩtie, kamĩtĩ ya kũheana ũteithio nĩ yaambire hema, ĩkĩheana maski, na ĩgĩtaarĩria ũrĩa andũ mangĩnyihanyihia ũgwati wa kũnyitwo nĩ mũrimũ wa COVID-19 na cholera.

 Ihinda-inĩ rĩa mĩeri ĩtatũ kuuma kwagĩa mũtuthũko ũcio, ariũ a Ithe witũ nĩ maaheanĩte makĩria ma kilo 6,000 cia mũcere, kilo 6,000 cia mũtu wa mbembe, lita 3,000 cia maguta ma kũruga, na lita 3,000 cia maĩ. Nĩguo wabici ĩhonokie mbeca, yabangire kũgũra irio nyingĩ o kũu bũrũri-inĩ handũ ha kũgũra irio cia goro kuuma mabũrũri ma na nja.

 Mwarĩ wa Ithe witũ ũmwe aakoretwo aka nyũmba no ĩgĩthũkio nĩ mũtuthũko ũcio. Aaugire ũũ: “Nĩ twakuire ngoro mũno na tũkĩgĩa kĩeha.” No nĩ aamũkĩrire ũteithio wa kĩĩmwĩrĩ na wa kĩĩroho marĩ hamwe na famĩlĩ yake. Aacokire akiuga ũũ: “Nĩ ũndũ wa ũteithio wa Jehova, tũrĩ o na kĩrĩa tũrabatara. Nĩ tuonete Jehova agĩtũkuuĩra mũrigo witũ na agatũteithia gũkirĩrĩria.”

 Nĩ gũkoretwo na mathĩna ma kĩĩmbeca bũrũri-inĩ wa Venezuela kwa ihinda rĩa mĩaka mĩingĩ. Aarĩ na ariũ a Ithe witũ nĩ macemanĩtie na mathĩna ta ũtũũro kũritũha, ũnyihu wa irio, na wĩki-naĩ kuongerereka. No ithondeka rĩa Jehova rĩtimatiganĩirie.

 Mwaka ũcio ũrathirire wa ũtungata, makĩria ma dola milioni 1.5 nĩ ciahũthĩrirũo kũgũra na gũtwara irio na thabuni kũrĩ famĩlĩ iria ciabataraga ũteithio. Wabici ya Venezuela yaugire ũũ: “Ti ũndũ mũhũthũ gũtwara kilo 130,000 cia irio kũndũ guothe bũrũri-inĩ o mweri na gũtigĩrĩra nĩ ciakinyĩra ariũ a Ithe witũ arĩa marĩ na ũbataro.” Nĩguo irio itigathũke, kaingĩ ariũ a Ithe witũ maheanaga indo igũikara ihinda iraihu. Ningĩ wabici ĩyo nĩ yaugire ũũ: “Tũgũraga irio irĩ nyingĩ, na tũkagũra ihinda rĩrĩa iragethwo tondũ itiendagio goro. Tũcokaga tũgacitwara tũkĩhũthĩra njĩra ĩrĩa ĩgũkorũo na ngarama nini biũ.”

 Leonel, ũrĩa ũrutaga wĩra Kamĩtĩ-inĩ ya Gũteithĩrĩria Hĩndĩ ya Icanjama bũrũri-inĩ wa Venezuela, nĩ endete wĩra wake. Aaugire ũũ: “Wĩra wa kũheana ũteithio nĩ wa mwanya. Mweke ũyũ wa ũtungata nĩ ũnjĩkĩrĩte ngoro mũno kuuma rĩrĩa mũtumia wakwa aakuire nĩ ũndũ wa mũrimũ wa COVID-19. Nĩ ngoragwo na wĩra mũingĩ wa kũruta na ngakena gũteithia ariũ a Ithe witũ arĩa marĩ na ũbataro. Nĩ ndĩyoneire niĩ mwene ũrĩa Jehova ahingagia kĩĩranĩro kĩrĩa eranĩire atĩ ndangĩtiganĩria andũ ake.”

 Mũrũ wa Ithe witũ ũmwe waamũkĩrire ũteithio, anatungata Kamĩtĩ-inĩ ya Gũteithĩrĩria Hĩndĩ ya Icanjama. Aaugire ũũ: “Rĩu nĩ niĩ ndabataraga ũteithio. Tũtiaheirũo ũteithio wa indo cia kĩĩmwĩrĩ tu. Ariũ Ithe witũ nĩ maatũteithirie twĩ na mũtumia wakwa gũikara tũhooreire. Nĩ maatũrũmbũirie, magĩtũmĩrĩria, na magĩtwĩkĩra ngoro.”

 Icanjama imwe ciumagĩra andũ materĩgĩrĩire. O na kũrĩ ũguo, kaingĩ ithondeka rĩa Jehova nĩ rĩhotaga kuona na kũheana indo na ihenya, nĩ ũndũ wa mĩhothi ĩrĩa ũrutaga ya gũteithĩrĩria wĩra wa thĩ yothe. Njĩra imwe cia kũruta mĩhothi nĩ itaarĩirio thĩinĩ wa donate.dan124.com. Nĩ ngatho mũno nĩ ũndũ wa ũtaana waku.