Gũthera nĩ kuuga kwamũranio na ũndũ o wothe ũngĩrehe thahu. Kiugo gĩa Kĩhibirania kĩrĩa gĩtaũrĩtwo “ũtheru” kiumanĩte na kiugo kiugĩte “kwamũrũo.” Kwoguo, kĩndũ gĩtheru nĩ kĩndũ kĩamũrĩtwo nĩguo kĩhũthĩrũo na njĩra ya mwanya.

 Ngai nĩ mũtheru na gĩkĩro kĩrĩa kĩnene biũ. Bibilia yugaga ũũ: “Gũtirĩ o na ũmwe mũtheru ta Jehova.” a (1 Samueli 2:2) Kwoguo Ngai nĩ akoragwo na kĩhooto gĩa kũiga ithimi ciĩgiĩ ũtheru.

 Kiugo “ũtheru” no kĩhũthĩrũo harĩ kĩndũ o gĩothe kĩhutanĩtie ĩmwe kwa ĩmwe na Ngai, makĩria indo iria ikoragwo ciamũrĩtwo nĩguo ihũthĩrũo nĩ ũndũ wa ũthathaiya tu. Kwa ngerekano, Bibilia nĩ yaragia ũhoro wa:

•   Kũndũ gũtheru: Ngai eerire Musa ũũ arĩ hakuhĩ na kĩhinga kĩa mĩigua kĩrĩa gĩaakanaga mwaki: “Handũ hau ũrũgamĩte nĩ handũ hatheru.”—Thama 3:2-5.

•   Maũndũ matheru: Aisiraeli a tene nĩ maathathayagia Jehova hĩndĩ ya ciathĩ cia kĩĩndini iria maakoragwo nacio kaingĩ na cietagwo “igomano nyamũre.”—Maũndũ ma Alawii 23:37.

•   Indo nyamũre: Indo iria ciahũthagĩrũo harĩ gũthathaiya Ngai thĩinĩ wa hekarũ ya tene ĩrĩa yarĩ Jerusalemu cietagwo ‘indo nyamũre.’ (1 Athamaki 8:4) Indo ta icio nĩ ciaagĩrĩire kũheo gĩtĩo kĩnene, o na gũtuĩka itiaagĩrĩire gũthathaiyo. b

 Ĩĩ. Ngai athĩte Akristiano ũũ: “No mũhaka mũkorũo mũrĩ atheru, tondũ niĩ ndĩ mũtheru.” (1 Petero 1:16) Hatarĩ nganja, andũ matarĩ akinyanĩru matingĩkinyĩra gĩthimi gĩkinyanĩru kĩa Ngai kĩgiĩ ũtheru. O na kũrĩ ũguo, andũ arĩa mathĩkagĩra mawatho ma Ngai ma ũthingu no monwo marĩ ‘atheru na metĩkĩrĩke nĩ Ngai.’ (Aroma 12:1) Mũndũ ũrerutanĩria gũkorũo arĩ mũtheru nĩ onanagia ũndũ ũcio kũgerera ciugo na ciĩko ciake. Kwa ngerekano, nĩ arũmagĩrĩra motaaro maya ma Bibilia: “Mũkoragwo mũrĩ atheru na mwĩthemage ngomanio itagĩrĩire” na “tuĩkai atheru inyuĩ ene mĩthiĩre-inĩ yanyu yothe.”—1 Athesalonike 4:3; 1 Petero 1:15.

 Ĩĩ. Mũndũ angĩtigana na ithimi cia Ngai ciĩgiĩ mĩtugo, Ngai ndangĩmuona rĩngĩ arĩ mũtheru. Kwa ngerekano, ibuku rĩa Bibilia rĩa Ahibirania rĩaandĩkĩirũo ‘ariũ a Ithe witũ aamũre,’ no nĩ rĩheanaga mũkaana atĩ nĩ mangĩakũririe “ngoro njũru ĩtarĩ wĩtĩkio na njĩra ya kwĩyeheria kuuma harĩ Ngai ũrĩa ũtũũraga muoyo.”—Ahibirania 3:1, 12.

 Mawoni mahĩtanu: Mũndũ gũikara atarĩ thĩinĩ wa kĩhiko nĩ gũtũmaga akorũo arĩ mũtheru makĩria.

 Ũrĩa kũrĩ: O na gũtuĩka Mũkristiano no athuure kwaga kũingĩra thĩinĩ wa kĩhiko, ũndũ ũcio tiguo ũngĩtũma akorũo arĩ mũtheru maitho-inĩ ma Ngai. Nĩ ma atĩ andũ arĩa mathuuraga kwaga kũingĩra thĩinĩ wa kĩhiko no mahote gũthathaiya gũtarĩ ũndũ ũramahĩngĩca. (1 Akorintho 7:32-34) O na kũrĩ ũguo, Bibilia yonanagia atĩ o na arĩa marĩ thĩinĩ wa kĩhiko no makorũo marĩ atheru. O na Petero, ũrĩa warĩ mũtũmwo wa Jesu, nĩ aahikanĩtie.—Mathayo 8:14; 1 Akorintho 9:5.