Alikana tu kufila ko konakudiwa yoye yokounona.

Onda dalelwa moItaly, mo 1943. Onda putukila pamwe novamwameme ovamati noukadona mokamukunda kanini, omo tate a kala omunafaalama nomuhongi woipilangi. Ovadali vetu ove tu tekulila muKatolika.

Omolwashike wa li wa hala okuninga omupristeri?

Eshi nda li okamatyona, onda li ndi hole okupwilikina kovapristeri mongeleka. Onda li handi fuulwa komawi avo nokonghedi omo hava ningi oinima. Nomolwaasho nda ka kala nda hala okuninga omupristeri. Eshi nda li ndi na omido 13, meme okwa li a twala nge kofikola komuhandjo, oko haku hongwa ounona voumati ehongo olo tali va longekida va ka ninge ovapristeri.

Mbela edeulo loye ola li la kwatela mo okukonakona Ombiibeli?

Hasho naanaa. Eshi nda li ndi na omido 15, umwe womovahongi vange okwa li a pange okambo kOmavaengeli, omahokololo ondjokonona yonghalamwenyo yaJesus noukalele waye, nonda li nde ka lesha lwoikando ihapu. Eshi nda li ndi na omido 18, onda li nda ya koRoma ndi ke lihonge kounivesiti yopombada, oyo hai wilikwa kovapapa. Onde lihonga Oshilatina, Oshigreka, ondjokonona, oufilosofi, oinima i na sha nouluvi nosho yo oinima yopalongelokalunga. Nonande otwa li hatu popi eevelishe dOmbiibeli momutwe nohatu pwilikine kelesho lOmbiibeli komambo mOsoondaxa, inatu konakona lela Ombiibeli.

Eshi wa li wa ningwa omukwatelikomesho, mbela owa li ho hongo?

Oilonga yange oya li ya kwatela mo unene okuunganeka oinima. Ashike onda li handi dulu okuhonga ngeenge nda lombwelwa kovakulunhu vongeleka.

Oshike she ke ku etela omalimbililo e na sha nongeleka?

Opa li oinima itatu oyo nda kala handi lipula nayo. Ongeleka ohai kufa ombinga mopolotika. Elihumbato lii lovafita nolovakwaneongalo ohave li lipwililikile. Omahongo amwe aKatolika kae li mondjila. Pashihopaenenwa, otashi shi shiiva ngahelipi Kalunga kohole a hepeke ovanhu fiyo alushe konima ngeenge va fi? Shikwao vali, mbela Kalunga okwa hala ngoo shili tu endulule omailikano oikando omafele hatu longifa oumanya, ile olusaalia? *

Oshike wa li wa ninga po?

Onda li nda ilikana handi lili ndi pewe ewiliko. Onda li yo nda landa Ombiibeli yaKatolika Jerusalem Bible, oyo ya li opo ya nyanyangidwa mOshiitalia, ndele handi hovele oku i lesha. Opo nee efiku limwe Osoondaxa ongula, fimbo handi tulike enguwo lange konima yomambo emisa, poseminari opa li pe uya ovalumenhu vavali. Ova li va lombwela nge kutya vo Eendombwedi daJehova. Otwa li twa kundafana oule wefimbo li dule povili imwe kombinga yOmbiibeli, naashi tai ti shi na sha nanghee elongelokalunga lashili tali dulu okudidilikwa mo.

Omolwashike wa li wa hokwa ovatalelipo ovo?

Onda li nda hokwa unene eitavelo lavo, naashi va li tava mono noupu omishangwa mOmbiibeli yaKatolika. Lwanima, Ondombwedi imwe yedina Mario oya li ya hovela okukala hai talele nge po. Okwa li he lididimike nomudiinini, ongula keshe yOlomakaya, ku na odula, ile omutenya, oto udu ashike eshi ta denge okangedjo kopomuvelo woseminari pomuwoi.

Ovapristeli vakweni ova li ve uditile ngahelipi etalelepo la tya ngaho?

Onda li ngoo nde va ifana ve tu waimine peenghundafana detu, ndele kape na oo a li e litula mo mekonakonombiibeli, ashike ame onda li ndi li hole. Onda li handi lihongo oinima i kumwifi, ngaashi kutya omolwashike Kalunga a efa pa kale owii nokumona oixuna, oshinima osho nda kala handi lipula nasho oule wefimbo.

Mbela ovakwatelikomesho voye inave ku shololifa nande uha konakone vali Ombiibeli?

Mo 1975, onda li handi i koRoma lwoikando opo ndi ka yelife etaleko lange. Ovakomesho vange ova li tava kendabala okulundulula etaleko lange, ashike puvo kapa li nande oumwe a longifa Ombiibeli. Xuuninwa, mo 9 Januali 1976, onda li nda shangela koRoma ndi va lombwele kutya inandi litala ko vali ndi li Omukatolika. Lwanima konima yomafiku avali, onda li nda fiya po oseminari, ndele handi i neshina ndi ka ye kokwoongala kwEendombwedi daJehova, nofiku olo mboli okwa li ku na oshoongalele oko kwa ongala omaongalo Eendombwedi mahapu. Keshe shimwe osha li sha yooloka ko kwaasho nda ikilila okuninga! Ondombwedi keshe oya li i na Ombiibeli nova li tava tale omishangwa eshi ovapopi tava kundafana oikundafanwa i lili noku lili.

Oukwaneumbo weni owa li tau tile ngahelipi mbela ashishe osho sha ningwa po?

Vahapu ova li tava pataneke nge neenghono. Ashike lwanima, onda ka uda kutya mumwameme umwe womumati naye ota konakona Ombiibeli nEendombwedi daJehova koLombardy, oshitukulwa shi li koumbangalanhu waItaly. Onda li nda ya ko kuye, nEendombwedi daakwinya oda li da kwafela nge ndi mone oilonga nonhele yokukala. Pexulilo lomudo oo, onda li nda ninginifwa ndi li Ondombwedi yaJehova.

Mbela owe lipa oushima?

Ahowe nandenande! Paife ondi udite lela nda ehena popepi naKalunga molwaashi osho ndi shii kombinga yaye oshe likolelela kOmbiibeli, ndele hakounongo wopanhu, ile keenghulunghedi dongeleka. Nohandi dulu okuhonga vamwe nda tomhwa nopaushili.