Kalunga oha pwilikine komailikano ovanhu vomoiwana aishe. (Epsalme 145:18, 19) Eendjovo daye, Ombibeli, otadi tu ladipike tu mu shiivifile oisho yetu. (Ovafilippi 4:6, 7) Ashike nande ongaho, iha hokwa omailikano amwe. Pashihopaenenwa, omailikano oo haa endululwa momutwe ihae mu hafifa. — Lesha Mateus 6:7.

Jehova oku tonde yo omailikano ovanhu ovo have lipwililikile owina omhango yaye. (Omayeletumbulo 28:9) Pashihopaenenwa, pefimbo lOmbibeli, ka li a pwilikina komailikano Ovaisrael ovo va li ve na ondjo yokudipaa. Osha yela kutya opo Kalunga a pwilikine komailikano etu otu na okuwanifa po oiteelelwa yonhumba. — Lesha Jesaja 1:15.

Itatu dulu okupopya naKalunga okupitila meilikano ngeenge katu na eitavelo. (Jakob 1:5, 6) Otu na okukala twa tomhwa kutya oko e li nohe tu file oshisho. Ohatu dulu okupameka eitavelo letu mokukonakona Ombibeli, molwaashi eitavelo lashili ole likolelela koumbangi nokeshilipaleko olo tali hangwa mEendjovo daKalunga. — Lesha Ovaheberi 11:1, 6.

Otu na okwiilikana tashi di komutima nonelininipiko. Nokuli nOmona waKalunga, Jesus, okwa li ha ilikana nelininipiko. (Lukas 22:41, 42) Onghee hano, ponhele yokukala hatu lombwele Kalunga osho e na okuninga, natu kendabaleni tu shiiveni oiteelelwa yaye mokukonakona Ombibeli. Nokungaho ohatu ka ilikana metwokumwe nehalo laye. — Lesha 1 Johannes 5:14.